ශ්රී ලංකාව තුළ ඉදිරි නොවැම්බර් මාසය දක්වා කිසිදු ආකාරයක ඉන්ධන හිඟයක් ඇති වීමට ඉඩක් නොමැති බව ලංකා ඛනිජ තෙල් නීතිගත සංස්ථාව නිල වශයෙන් සහතික කරයි. දිවයින පුරා පවතින ඉන්ධන අවශ්යතාව අඛණ්ඩව සපුරාලීම සඳහා අවශ්ය කරන තොග ලබාගැනීමට අදාළ සියලුම ණයවර ලිපි මේ වන විටත් විවෘත කර අවසන් බව එම සංස්ථාවේ කළමනාකාර අධ්යක්ෂ ආචාර්ය මයුර නෙත්තිකුමාර මහතා ප්රකාශ කර සිටී.
මේ වන විටත් ඇණවුම් කරන ලද ඉන්ධන තොග මෙරටට ලැබෙමින් පවතින බැවින්, එළඹෙන ජූලි මාසය දක්වා රටේ පරිභෝජනයට ප්රමාණවත් තරම් ඉන්ධන සංචිත පවතින බව ඛනිජ තෙල් නීතිගත සංස්ථාව පෙන්වා දෙයි. මීට අමතරව මැයි මාසයේ 28 වැනිදා සහ 31 වැනිදා යන දිනවලදී මෙට්රික් ටොන් 90,000 බැගින් වූ බොරතෙල් රැගත් නෞකා දෙකක් දිවයිනට ළඟා වීමට නියමිතව ඇත. දේශීය ඉන්ධන සමාගම්ද තමන්ට අවශ්ය බෙදාහැරීමේ ඇණවුම් සිදුකර ඇති අතර, සිංගප්පූරුව සහ ඉන්දියාව ඇතුළු සැපයුම්කරුවන් කිහිප දෙනෙකුගෙන් අතිරේක ඉන්ධන තොග ලබාගැනීමටද අවශ්ය කටයුතු සූදානම් කර තිබේ.
සමාජ මාධ්ය ජාලාවල සංසරණය වන ඉන්ධන හිඟයක් පිළිබඳ පුවත් සහ පිරවුම්හල් අසල දිගු පෝලිම් නිර්මාණය වී ඇති බවට කෙරෙන ප්රකාශ සම්පූර්ණයෙන්ම සාවද්ය බව කළමනාකාර අධ්යක්ෂවරයා අවධාරණය කරයි. මේ හේතුවෙන් මහජනතාව අනවශ්ය ලෙස කලබලයට පත්වෙමින් ඉන්ධන රැස්කර තබාගැනීමෙන් වැළකිය යුතු අතර, තමන්ට එදිනෙදා අවශ්ය වන ප්රමාණයන් පමණක් මිලදී ගැනීමට කටයුතු කළ යුතුය. එමෙන්ම වාහනවල අංක තහඩුවේ අවසාන ඉලක්කම් පදනම් කරගනිමින් දැනට ක්රියාත්මක වන QR කේත ක්රමවේදය ඔස්සේ ඉන්ධන නිකුත් කිරීමේ කටයුතු කිසිදු බාධාවකින් තොරව සාමාන්ය පරිදි ඉදිරියටත් සිදුකෙරේ.
ලෝක වෙළෙඳපොළේ බොරතෙල් බැරලයක මිල ඇමෙරිකානු ඩොලර් 80 සිට 150 දක්වා කැපී පෙනෙන ලෙස ඉහළ යාම හේතුවෙන් මැයි 31 වැනිදා මිල සංශෝධනයක් සිදුකිරීම කෙරෙහි මේ වන විට අවධානය යොමුව ඇත. පවත්නා භූ දේශපාලනික අර්බුද හමුවේ පසුගිය දෙසැම්බර් මාසයේදී ඇමෙරිකානු ඩොලර් මිලියන 152ක් ලෙස සටහන් වූ මෙරට මාසික ඉන්ධන ආනයන වියදම, මැයි මාසය වන විට ඩොලර් මිලියන 521ක් දක්වා විශාල වශයෙන් ඉහළ ගොස් තිබේ. එසේ වුවද, මේ දක්වා මෙරටට ලබාගෙන ඇති ඉන්ධන තොග වෙනුවෙන් ගෙවීමට ඇති සියලුම මුදල් පියවා ඇති බැවින් කිසිදු හිඟ මුදලක් ඉතිරිව නොමැති බව ලංකා ඛනිජ තෙල් නීතිගත සංස්ථාව වැඩිදුරටත් තහවුරු කරයි.
