හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ සහ ඔහුගේ මිත්තණිය වන ඩේසි ෆොරස්ට් යන මහත්මියට එරෙහිව ගොනු කර ඇති මුදල් විශුද්ධිකරණය පිළිබඳ නඩුව ලබන ජූනි මස 10 වනදා දක්වා කල් තැබීමට කොළඹ මහාධිකරණය අද (24) තීරණය කළේය.
කොළඹ මහාධිකරණ විනිසුරු රශ්මි සිංගප්පුලි මහතා ඉදිරියේ මෙම නඩුව කැඳවූ අවස්ථාවේදී රජයේ නීතිඥවරයා විසින් අධිකරණයට විශේෂ කරුණු දැක්වීමක් සිදු කරන ලදී. එහිදී ඔහු සඳහන් කළේ මෙම චෝදනාවලට අදාළව තවත් නඩුවක් අංක 08 දරණ මහාධිකරණයේ දැනට විභාග වෙමින් පවතින බවයි. එම නඩුවට අදාළව සංශෝධිත අධි චෝදනා පත්රයක් ඉදිරිපත් කිරීමට නියමිතව ඇති හෙයින්, මෙම නඩුව සඳහා ද එලෙසම සංශෝධිත අධි චෝදනා පත්රයක් ගොනු කිරීමට සිදුවන බව රජයේ නීතිඥවරයා පෙන්වා දුන්නේය.
එම නීතිමය කටයුතුවල ප්රගතිය අධිකරණයට දැනුම් දීම සඳහා විනිසුරුවරයා විසින් මෙලෙස නව නඩු දිනයක් ප්රකාශයට පත් කර ඇත. නීතිපතිවරයා විසින් විත්තිකරුවන්ට එරෙහිව මුදල් විශුද්ධිකරණය වැළැක්වීමේ පනත යටතේ අධි චෝදනා තුනක් ගොනු කර තිබේ. 2009 වසරේ මාර්තු 31 වනදා සහ 2013 වසරේ දෙසැම්බර් 12 වනදා යන කාලසීමාව අතරතුරදී උපයාගත් ආකාරය නීත්යානුකූලව තහවුරු කළ නොහැකි රුපියල් මිලියන 59කට අධික මුදලක් පෞද්ගලික බැංකු තුනක ස්ථාවර තැන්පතු ලෙස පවත්වාගෙන යාම හරහා ඔවුන් මෙම වරද සිදුකර ඇති බවට අදාළ චෝදනා පත්රයේ වැඩිදුරටත් සඳහන් වේ.
