හම්බන්තොට මත්තල රාජපක්ෂ ජාත්යන්තර ගුවන් තොටුපොළේ මෙහෙයුම් කටයුතු වඩාත් කාර්යක්ෂමව පවත්වාගෙන යාම සඳහා සුදුසු ආයෝජකයන්ගෙන් අභිලාෂ ප්රකාශ කිරීමේ අයදුම්පත් කැඳවීමට වරාය සහ සිවිල් ගුවන් සේවා අමාත්යාංශය පියවර ගෙන තිබේ. ගුවන් තොටුපොළ සහ ගුවන් සේවා (ශ්රී ලංකා) පෞද්ගලික සමාගම වෙනුවෙන් ක්රියාත්මක වන මෙම වැඩපිළිවෙළේ ප්රධාන අරමුණ වන්නේ මත්තල ගුවන් තොටුපොළ සතු සම්පත් උපරිම අයුරින් ප්රයෝජනයට ගැනීම සඳහා සුදුසු ආයෝජන අවස්ථා හඳුනා ගැනීමයි.
මෙම ආයෝජන අවස්ථාවන් සඳහා එක්වීමට කැමැත්තක් දක්වන දේශීය හෝ විදේශීය ආයෝජකයන්, ආයතන මෙන්ම ඒකාබද්ධ ව්යාපාර සඳහා ද අවස්ථාව විවෘතව පවතින බව රජය දැනුම් දෙයි. කෙසේ වෙතත්, මේ සඳහා ඉදිරිපත් වන සියලුම සමාගම් ශ්රී ලංකාවේ පවතින නීති පද්ධතියට අනුකූලව මෙරට ලියාපදිංචි වූ ආයතන විය යුතු බවට විශේෂ කොන්දේසියක් පනවා ඇත.
තෝරා ගනු ලබන ආයෝජකයන් හට මත්තල ගුවන් තොටුපොළේ ගුවන් යානා මෙහෙයුම් සිදු කරන ප්රදේශයේ එනම්, ගුවන් යානා ගොඩබැස්සවීම් සහ ගුවන් ගත කිරීම් ඇතුළු සියලුම දෛනික සිවිල් ගුවන් මෙහෙයුම් කළමනාකරණය කිරීමේ වගකීම පැවරේ. මීට අමතරව, මගීන් සහ සාමාන්ය ජනතාව ගැවසෙන ප්රදේශවල සිදු කෙරෙන සියලුම ගොඩබිම් මෙහෙයුම් කටයුතු ද මෙම ආයෝජන ව්යාපෘතිය යටතේ කළමනාකරණය කිරීමට අපේක්ෂිතය.
අභිලාෂ ප්රකාශ කිරීමේ මෙම ක්රියාවලිය අධීක්ෂණය කිරීම සඳහා කැබිනට් මණ්ඩලය විසින් පත් කරන ලද සාකච්ඡා සම්මුති කමිටුවක් ක්රියාත්මක වන අතර, ඔවුන් විසින් අයදුම්පත් විශ්ලේෂණය කර වඩාත් සුදුසු පාර්ශ්වයන් තෝරා ගනු ඇත. මේ සඳහා වන අයදුම්පත් අප්රේල් මස 27 වැනිදා සිට ජූනි මස 08 වැනිදා දක්වා වූ කාලසීමාව තුළ සෑම රජයේ වැඩ කරන දිනකම පෙරවරු 9.00 සිට පස්වරු 2.30 දක්වා භාර ගැනීමට නියමිතය.
සියලුම යෝජනා ජූනි මස 09 වැනිදා පස්වරු 2.00 ට පෙර ඉදිරිපත් කළ යුතු අතර, ඒ සඳහා අදාළ ආයෝජකයන් ඇමෙරිකානු ඩොලර් 500 ක් වටිනා බැංකු කෙටුම්පතක් ඉදිරිපත් කිරීම අනිවාර්ය වේ. මෙම ගෙවීම ශ්රී ලංකා මහ බැංකුව හෝ ජාත්යන්තර බැංකුවක් විසින් අනුමත කරන ලද මෙරට වාණිජ බැංකුවක් හරහා සිදු කළ යුතු අතර, එසේ නොමැති නම් කටුනායක බණ්ඩාරනායක ජාත්යන්තර ගුවන් තොටුපොළේ පිහිටි ගුවන් තොටුපොළ සහ ගුවන් සේවා සමාගමේ මූල්ය අංශය වෙත මුදල් තැන්පතුවක් ලෙස ද එය ගෙවීමට අවස්ථාව සලසා ඇත.
