රත්නපුර දිස්ත්රික්කයේ හිටපු පාර්ලිමේන්තු මන්ත්රීවරයෙකු වන ප්රේමලාල් ජයසේකර හෙවත් 'චොකා මල්ලි' නුවරඑළිය පොලීසියේ අපරාධ විමර්ශන අංශය විසින් අත්අඩංගුවට ගෙන තිබේ. නුවරඑළිය ප්රදේශයේදී පුද්ගලයින් පිරිසකට ගිනි අවියක් පෙන්වා මරණ තර්ජනය කරමින් බිය ගැන්වීම සහ වලංගු බලපත්රයක් නොමැතිව පිස්තෝලයක් නීතිවිරෝධී ලෙස ළඟ තබා ගැනීම යන චෝදනා මත ඔහු මෙලෙස අත්අඩංගුවට පත්ව ඇත.
පොලිස් තොරතුරු වලට අනුව මෙම සිද්ධිය හටගෙන ඇත්තේ හිටපු මන්ත්රීවරයා සිය පවුලේ ඥාතීන් පිරිසක්ද සමග නුවරඑළියේ සංචාරයක නිරත වෙමින් සිටි අවස්ථාවකදීය. එහිදී අවිස්සාවේල්ල ප්රදේශයේ සිට නුවරඑළියේ සංචාරයක් සඳහා පැමිණ සිටි වෙනත් පිරිසක් සමඟ ඔවුන් බහින්බස්වීමකට පැටලී ඇති අතර, එම උණුසුම් වචන හුවමාරුව දුරදිග යාමෙන් පසු ප්රේමලාල් ජයසේකර මහතා විසින් සිය අත වූ පිස්තෝලය පෙන්වා අදාළ පිරිසට තර්ජනය කර තිබේ.
මෙම සිදුවීම සම්බන්ධයෙන් අගතියට පත් පාර්ශ්වය විසින් නුවරඑළිය පොලීසියට සිදු කළ පැමිණිල්ලකට අනුව වහාම ක්රියාත්මක වූ නිලධාරීන් සැකකාර හිටපු මන්ත්රීවරයාව අත්අඩංගුවට ගෙන ඇත. නුවරඑළිය පොලීසියේ අපරාධ විමර්ශන අංශයේ ස්ථානාධිපති ප්රධාන පොලිස් පරීක්ෂක රවීන්ද්ර ප්රේමලාල් මහතා ඇතුළු පොලිස් කණ්ඩායමක් විසින් මෙම අත්අඩංගුවට ගැනීම සිදු කර ඇති බව පොලිස් මාධ්ය ප්රකාශක කාර්යාලය විසින්ද තහවුරු කරනු ලැබීය.
සැකකරු සන්තකයේ තිබී පොලිස් භාරයට ගත් පිස්තෝලය සඳහා ආරක්ෂක අමාත්යාංශය මගින් නිකුත් කර තිබූ බලපත්රය මේ වන විටත් එනම් 2025 වසරේදී කල් ඉකුත් වී ඇති එකක් බවට විමර්ශනවලදී වැඩිදුරටත් අනාවරණය වී තිබේ. සිද්ධිය සම්බන්ධයෙන් නුවරඑළිය පොලීසිය විසින් අඛණ්ඩව පරීක්ෂණ මෙහෙයවන අතර, අත්අඩංගුවට ගත් සැකකාර හිටපු මන්ත්රීවරයා නුවරඑළිය මහෙස්ත්රාත් අධිකරණය වෙත ඉදිරිපත් කිරීමට නියමිතව ඇත.
