පරිගණකයකට මිනිසෙකු මෙන් සිතිය හැකිද? නැතහොත් එය හුදෙක් අපව මුලා කරන දෘෂ්ටි මායාවක් පමණක්ද?
අද වන විට ලොව දැවැන්තම තාක්ෂණික සමාගම් කෘත්රිම බුද්ධිය සැබැවින්ම අලුත් දෙයක් "සිතීමට" සමත් යැයි පවසමින් මහත් ආන්දෝලනයක් ඇති කරමින් සිටී. නමුත් මේ නවතම පෙරළියේ සැබෑ ආරම්භය සිලිකන් නිම්නයේ අති නවීන විද්යාගාරයක නොව, 2020 වසරේදී අන්තර්ජාලයේ කුප්රකට 4chan වෙබ් අඩවියේ වීඩියෝ ක්රීඩකයන් පිරිසක් අතර සිදු වූවක් බව බොහෝ දෙනෙක් නොදනිති.
'AI Dungeon' නම් කෘත්රිම බුද්ධිය හරහා ක්රියාත්මක වූ පරිගණක ක්රීඩාවක නිරත වූ මෙම තරුණයින්, එහි චරිත ලවා විවිධ දේවල් කරවන අතරතුරම ඔවුන්ගෙන් ගණිත ගැටලු විසඳීමටද ඉල්ලා සිටියහ. ඔවුන් අපේක්ෂා නොකළ පරිදි, එකල පැවති දෝෂ සහිත AI පද්ධති පවා ගණිත ගැටලුවක් ලබා දුන් විට එය පියවරෙන් පියවර විස්තර කරමින්, ක්රීඩාවේ චරිතයට ගැළපෙන ආකාරයෙන්ම පිළිතුරු ලබා දීමට සමත් විය.
අද 'Chain of Thought' හෙවත් 'සිතීමේ දාමය' ලෙස තාක්ෂණික ලෝකයේ මහත් ඉහළින් කතාබහට ලක්වන්නේ අහඹු ලෙස සිදු වූ මෙම සොයාගැනීමයි. අද වන විට Google සහ OpenAI වැනි දැවැන්ත සමාගම් තම නවතම AI මාදිලි ගැටලුවක් විසඳීමට පෙර "සිතන" බව පවසමින් මෙය තාක්ෂණික විප්ලවයක් ලෙස හුවා දක්වයි. Anthropic වැනි ආයතන මෙම පද්ධති මිනිස් මොළයකට සමාන කරමින් ඊට විද්යාත්මක පෙනුමක් ලබා දීමට උත්සාහ කළද, මුල් කාලීන 4chan ක්රීඩකයින් මීට වඩා යථාර්ථවාදී විය. ඔවුහු 2024 වසරේදී විශේෂ සටහනක් තබමින් වටහා දුන් සත්යය නම්, මේ කිසිදු AI පද්ධතියක් සැබැවින්ම සිතන්නේ නැති බවත්, ඒවා හුදෙක් තමන්ට ලබා දී ඇති දත්ත මත පදනම්ව මීළඟ වචනය අනුමාන කරන යන්ත්ර පමණක් බවත්ය.
Apple සමාගමේ පර්යේෂකයින් පවා මෑතකදී මෙම සිතීමේ හැකියාව හුදෙක් මායාවක් බව තහවුරු කර තිබේ. ඔවුන් පෙන්වා දෙන්නේ, ඉතා සාර්ථකව ගණිත ගැටලුවක් විසඳන AI පද්ධතියකට එම ගැටලුවට කිසිදු අදාළත්වයක් නැති අමතර තොරතුරක් එක් කළ විට එහි සාර්ථකත්වය සියයට හැටපහකින් පමණ කඩා වැටෙන බවයි. සැබෑ මිනිස් බුද්ධියක් එලෙස නොමඟ යන්නේ නැත. අනෙක් අතට, ක්රීඩකයින්ට සමගාමීව මෙම ක්රමයම සොයාගත් ස්ටැන්ෆර්ඩ් සරසවියේ ශිෂ්යයෙකු වන සැක් රොබට්සන් පවා පවසන්නේ මෙය අපූරු උපක්රමයක් මිස ඊට එහා ගිය සැබෑ බුද්ධියක් නොවන බවයි.
කෘත්රිම බුද්ධිය මිනිසා මෙන් සිතීමට පටන් ගෙන ඇතැයි ඩොලර් බිලියන ගණන් වටිනා සමාගම් කොතරම් උදම් ඇනුවද, යථාර්ථය නම් එය තවමත් අපේම වචන යොදාගෙන අපවම විශ්මයට පත් කරන අති සාර්ථක ඉන්ද්රජාලයක් පමණක් වීමයි.
