කටුනායක බණ්ඩාරනායක ජාත්යන්තර ගුවන්තොටුපළ සහ ඒ අවට ප්රදේශයට හදිසියේ ඇදහැළුණු අධික වර්ෂාපතනය හේතුවෙන් ගුවන්තොටුපළ වෙත පැමිණි ගුවන් යානා හයකට ගොඩබැස්සවීමට නොහැකිව ඉහළ අහසේ රැඳී සිටීමට සිදුවූ බව ගුවන්තොටුපළ කාර්යභාර නිලධාරීවරයා තහවුරු කළේය. පසුගිය 31 වැනිදා රාත්රී 9.45 ට පමණ හදිසියේම මෙම අයහපත් කාලගුණික තත්ත්වය නිර්මාණය වී ඇති අතර, ඒ හේතුවෙන් ගුවන් යානා ගොඩබැස්සවීම සැලකිය යුතු වේලාවකට ප්රමාද වී තිබේ.
මෙලෙස ගොඩබැස්සවීමට නොහැකිව ගුවනේ සැරිසරමින් සිටි යානා අතරට චීනයේ කුංමිං සිට පැමිණි චයිනා ඊස්ටන් යානයක්, ඩුබායි සිට පැමිණි එමිරේට්ස් යානයක් සහ තායිලන්තයේ බැංකොක් නුවර සිට පැමිණි එයාර් ඒෂියා ගුවන් යානයක් අයත් වේ. ඊට අමතරව, මෙල්බර්න්, ඉන්දියාවේ චෙන්නායි සහ පකිස්තානයේ ලාහෝර් යන නගරවල සිට පැමිණි ශ්රී ලන්කන් ගුවන් සේවයට අයත් යානා තුනක් ද මෙම අයහපත් කාලගුණය හේතුවෙන් අපහසුතාවයට පත්ව තිබුණි.
මෙම යානා අතුරින්, රාත්රී 9.49 ට කටුනායකට ගොඩබැස්සවීමට නියමිතව තිබූ චීනයේ කුංමිං සිට පැමිණි ගුවන් යානයට පැයකට ආසන්න කාලයක් අහසේ රැඳී සිටීමට සිදුවී ඇත. එලෙස දිගු වේලාවක් ගුවනේ සැරිසැරීම හේතුවෙන් එම යානයේ ඉන්ධන ප්රමාණය ක්රමයෙන් අඩුවී ඇති අතර, ඒ අනුව ආරක්ෂිත පියවරක් ලෙස රාත්රී 10.50 ට පමණ එම යානය මත්තල ජාත්යන්තර ගුවන්තොටුපළ වෙත යොමු කිරීමට බලධාරීන් පියවර ගෙන තිබේ.
පසුව කටුනායක ගුවන්තොටුපළ අවට පැවති අයහපත් කාලගුණික තත්ත්වය පහව යාමත් සමඟ, මත්තලට හරවා යැවූ චයිනා ඊස්ටන් ගුවන් යානය පසුදා (01) අලුයම 1.01 ට යළිත් කටුනායක වෙත පැමිණ ඇත. අනතුරුව අලුයම 2.15 ට පමණ මගීන් පිරිසක් ද රැගෙන එම යානය නැවතත් චීනයේ කුංමිං නුවර බලා පිටත්ව ගොස් තිබේ. කාලගුණය යහපත් වීම හේතුවෙන් එතෙක් ඉහළ අහසේ රවුම් ගසමින් සිටි අනෙකුත් ගුවන් යානා පහ ද කිසිදු බාධාවකින් තොරව කටුනායක ගුවන්තොටුපළ වෙත සුරක්ෂිතව ගොඩබැස්සවීමට පියවර ගත් බව කාර්යභාර නිලධාරීවරයා වැඩිදුරටත් සඳහන් කළේය.
