වනජීවී සංරක්ෂණ දෙපාර්තමේන්තුවට අනුයුක්තව සේවය කළ සේවකයෙකු වනතවිල්ලුව ප්රදේශයේදී වන අලියෙකුගේ ප්රහාරයකට ලක්ව ජීවිතක්ෂයට පත්ව තිබේ. මෙසේ අවාසනාවන්ත ලෙස මියගොස් ඇත්තේ වනතවිල්ලුව ප්රදේශයේම පදිංචිකරුවෙකු වූ 34 හැවිරිදි වර්ණකුලසූරියගේ අමිල උදාර නමැති අයයි.
ඔහු වනතවිල්ලුව වනජීවී කාර්යාලයේ සුළු සේවකයෙකු ලෙස සේවය කර ඇති අතර, සිද්ධිය වූ කාලසීමාවේදී ඔහුව වනතවිල්ලුව සහ තේවානුවර අතර පිහිටි විදුලි වැටෙහි රාජකාරි සඳහා යොදවා තිබී ඇත.මෙම ඛේදවාචකය සිදුව ඇත්තේ ඔහු සිය රාත්රී කාලයේ රාජකාරි කටයුතු නිමවා තවත් කිහිප දෙනෙකු ද සමඟින් ආපසු තම නිවස බලා යමින් සිටි අවස්ථාවේදීය. එලෙස ගමන් කරමින් සිටි පිරිසට එක්වරම මෙම රෞද්ර වන අලියා මුණගැසී ඇති බව පොලිසිය විසින් සඳහන් කරනු ලබයි.
සිද්ධිය ඇසින් දුටුවන් පවසන ආකාරයට, අලියා ඔවුන් දෙසට කඩා පනින විට එයින් බේරීම සඳහා මියගිය පුද්ගලයා එම ස්ථානයෙන් වේගයෙන් දිවගොස් ඇත. එහෙත්, වන අලියා ඔහු පසුපස ලුහුබැඳ ගොස් ඇති අතර, එහිදී කලබලයට පත්ව ඔහු බිම ඇද වැටී ඇති අතර ඉන් අනතුරුව අලියා විසින් ඔහුව පාගා දමා ඝාතනය කර තිබේ.
මෙම අවාසනාවන්ත සිදුවීම සම්බන්ධයෙන් වනතවිල්ලුව පොලිසිය විසින් මේ වන විටත් වැඩිදුර විමර්ශන කටයුතු සිදු කරමින් පවතී.
