එළඹෙන සිංහල හා දෙමළ අලුත් අවුරුදු සමය වෙනුවෙන් රතිඤ්ඤා සහ ගිනිකෙළි සඳහා වෙළෙඳපොළ තුළ ඉහළ ඉල්ලුමක් පැවතියද, මෑතකදී ඇති වූ 'දිට්වා' (Ditwah) සුළි කුණාටුවේ බලපෑම හේතුවෙන් එහි සැපයුමට දැඩි බාධා එල්ල වී ඇති බව සමස්ත ලංකා ගිනිකෙළි නිෂ්පාදකයින්ගේ සංගමය පවසයි.
එම සංගමයේ සභාපති දිනේෂ් ප්රනාන්දු මහතා පෙන්වා දෙන්නේ, උත්සව සමය ඉලක්ක කරගනිමින් නිෂ්පාදනය කර තිබූ ගිනිකෙළි තොගවලින් සැලකිය යුතු ප්රමාණයක් සුළි කුණාටුව හේතුවෙන් විනාශ වී ඇති බවත්, මේ නිසා සමස්ත සැපයුම් ක්රියාවලිය දැඩි අර්බුදයකට ලක්ව ඇති බවත්ය.
මෙම ස්වාභාවික ආපදාවට අමතරව නිෂ්පාදකයින්ට අවශ්ය අමුද්රව්ය ලබා ගැනීමේ දැඩි ගැටලුවකට ද මුහුණ දීමට මේ වනවිට සිදුව තිබේ. අප්රේල් මාසය සඳහා ඔවුන්ට නිකුත් කර ඇත්තේ අවශ්ය සම්පූර්ණ පොටෑසියම් නයිට්රේට් කෝටාවෙන් සියයට 50ක් පමණක් බව සභාපතිවරයා සඳහන් කළේය. උත්සව සමයන්හිදී අමුද්රව්ය සැපයීම ක්රමවත් කරන ලෙස අවස්ථා කිහිපයකදීම බලධාරීන්ගෙන් ඉල්ලා සිටියද මෙතෙක් ඊට කිසිදු සාධනීය ප්රතිචාරයක් ලැබී නොමැත.
මැදපෙරදිග කලාපයේ පවතින භූ දේශපාලනික අර්බුද ඇතුළු ගෝලීය වෙළෙඳපොළ තත්ත්වයන් මත පොලිතින්, සල්ෆර් සහ අනෙකුත් ප්රධාන රසායනික ද්රව්යවල මිල ඉහළ යාම හේතුවෙන් ගිනිකෙළි කර්මාන්තයේ නිෂ්පාදන පිරිවැය ද සැලකිය යුතු ලෙස ඉහළ ගොස් තිබේ. එමෙන්ම ඉන්ධන මිල ඉහළ යාම නිසා ප්රවාහන ගාස්තු ද වැඩි වී ඇති බව ඔහු වැඩිදුරටත් පෙන්වා දුන්නේය.
කෙසේ වෙතත්, වත්මන් වෙළෙඳපොළ තත්ත්වය හමුවේ මෙලෙස ඉහළ ගිය නිෂ්පාදන පිරිවැය පාරිභෝගිකයා මත පැටවීමට නිෂ්පාදකයින්ට හැකියාවක් නොමැති බව හෙතෙම අවධාරණය කළේය.
මෙම කර්මාන්තයේ නියැලී සිටින කම්කරුවන්ගෙන් සියයට 60කට පමණ සුළි කුණාටුවෙන් දැඩි බලපෑම් එල්ල වී ඇති බවද අනාවරණය වේ. මෙරට සමස්ත ගිනිකෙළි නිෂ්පාදනයෙන් සියයට 90ක්ම ගම්පහ දිස්ත්රික්කයේ කිඹුලාපිටිය ප්රදේශය කේන්ද්ර කරගනිමින් සිදුවන බැවින්, මෙවැනි ප්රාදේශීය ආපදා තත්ත්වයන් හමුවේ සමස්ත කර්මාන්තයම කෙතරම් අවදානමකට ලක්ව ඇත්ද යන්න මෙයින් මනාව පැහැදිලි වන බව දිනේෂ් ප්රනාන්දු මහතා ප්රකාශ කළේය.
