මෙය ඇගේ අවසන් ගමනේ ගැයූ අවසන් ගීතය දැයි එදා කිසිවෙකුත් දැන සිටියේ නැත.
ඉන්දියාවේ කේරළයම දැඩි කම්පනයකට පත් කළ වල්පාරෙයි (Valparai) බස් අනතුරින් පාසල් ගුරුවරුන් ඇතුළු 9 දෙනෙකුට දිවි අහිමි වූ අතර, ඒ අතර සිටි ආශා ගුරුතුමියගේ සංවේදී වීඩියෝවක් මේ වනවිට සමාජ මාධ්යයේ බොහෝ දෙනෙකුගේ හදවත් සසල කරමින් තිබේ. අඩි 300ක පමණ ප්රපාතයකට පෙරළී ගොස් ඇති එම බස් රථයේ ගමන් කරමින් සිටියේ පාන්ග් පල්ලිපරම්බු රජයේ ප්රාථමික විද්යාලයේ විනෝද චාරිකාවකට එක්වූ පිරිසකි. තමිල්නාඩුවේ කොයිම්බතූර් දිස්ත්රික්කයේ වල්පාරෙයි ප්රදේශයේදී ප්රපාතයකට පෙරළීමෙන් පුද්ගලයන් නව දෙනෙකු ජීවිතක්ෂයට පත්ව ඇති බව වාර්තා වේ. රියදුරුට වාහනය පාලනය කර ගැනීමට නොහැකි වීම ඊට හේතුව ලෙස සැක කෙරේ. 13 වන වංගුවෙන් පහළට පෙරළුණු වෑන් රථය අනෙකුත් වංගු කිහිපයක් ද පසුකරමින් ගොස් අවසානයේ 9 වන වංගුව ආසන්නයේ නතර වී ඇති බව පොලිස් පරීක්ෂණ මගින් හෙළි වී තිබේ.
මියගිය පිරිස අතර මලප්පුරම් දිස්ත්රික්කයේ කුරුවා රජයේ පාසල්වල ගුරුවරුන් හය දෙනෙකු, පාසල් කෝකියෙකු, 12 හැවිරිදි පිරිමි දරුවෙකු සහ තවත් ඥාතියෙකු සිටින බව තහවුරු වී ඇත. අනතුර සිදුවන අවස්ථාවේ රථයේ පුද්ගලයන් 12 දෙනෙකු ගමන් කර ඇති අතර ඉන් කාන්තාවන් හත් දෙනෙකු ජීවිතක්ෂයට පත්ව ඇති බව සඳහන් වේ. තුවාල ලැබූ රියදුරු ඇතුළු සිව් දෙනාගෙන් තිදෙනෙකුගේ තත්ත්වය බරපතළ බැවින් ඔවුන් වැඩිදුර ප්රතිකාර සඳහා කොයිම්බතූර් වෛද්ය විද්යාල රෝහල වෙත ඇතුළත් කර තිබේ.
මෙම පිරිස එදින උදෑසන කේරළයේ අතිරපිලි දියඇල්ල නැරඹීමෙන් අනතුරුව වල්පාරෙයි ප්රදේශයේ සංචාරය කර නැවත පොල්ලාචි හරහා පැමිණෙමින් සිටියදී මෙම අනතුරට මුහුණ දී ඇත. වල්පාරෙයි සහ පොල්ලාචි අතර පිහිටි අතිශය දුෂ්කර මාර්ගය මාරක වංගු 40 කින් සමන්විත වන බැවින් එම මාර්ගය නිතර අනතුරු සිදුවන අවදානම් කලාපයක් ලෙස හඳුනාගෙන තිබේ. ප්රදේශවාසීන් සහ මුදාගැනීමේ කණ්ඩායම් එක්ව සුන්බුන් අතර සිරවී සිටි පිරිස දැඩි පරිශ්රමයක් යොදා පිටතට ගෙන ඇත. මරණයට පෙර සිනහමුසු මුහුණින් යුතුව මියුරු ස්වරයෙන් ගීතයක් ගායනා කරන 41 හැවිරිදි ආශා ගුරුතුමියගේ දසුන් පෙළ ඇගේ සමකාලීන මිතුරෙකු වූ නීතීඥ කේ.ආර්. සුභාෂ් චන්ද්රන් විසින් අන්තර්ජාලයට එක් කර තිබුණි. තමන්ට විශ්වවිද්යාල මිතුරු සමූහයකින් ලැබුණු එම වීඩියෝව පිළිබඳව ඔහු සටහන් කර තිබුණේ, මෙය ඇයගේ අවසන් ගමනේදී ගැයූ ගීතය දැයි තමා නොදන්නා නමුත්, කඳුළු නොමැතිව එම දසුන් නරඹා අවසන් කළ නොහැකි බවයි.
මෙම අතිශය ශෝකජනක ඛේදවාචකයේදී පාසලේ විදුහල්පතිනිය වූ 54 හැවිරිදි අජිතා, ආශා ඇතුළු ගුරුවරියන් පිරිසක්ද, පාසලේ කෝකිවරිය මෙන්ම එක් ගුරුවරියකගේ 12 හැවිරිදි පුතු වන හිෂාම් ද සදහටම දෑස් පියාගත්තේය. දින කිහිපයකට පෙර සතුටින් පිරී ඉතිරී ගිය විනෝද චාරිකාවක් නිමේෂයකින් මරණයේ නිම්නයකට ඇද වැටීම සමස්ත කේරළයේම ජනතාවට දරාගත නොහැකි වේදනාවක් ගෙන දී ඇත.
තවත් කුඩා දරුවන් ඇතුළු කිහිප දෙනෙකු රෝහල්ගතව දැඩි සත්කාර මැද ජීවිතයත් මරණයත් අතර සටනක නිරතව සිටීම තත්වය තවත් ඛේදනීය කර තිබේ. සතුටින් ආරම්භ වූ මේ ගමන මෙතරම් කුරිරු අයුරින් නිමාවීම, මනුෂ්ය ජීවිතයේ ඇති අතිශය අනපේක්ෂිත ස්වභාවය පිළිබඳව අප හමුවේ කිසිදා විසඳිය නොහැකි ප්රශ්නයක් ඉතිරි කර ඇත.
ප්රපාතයට පෙරළී ගොස් සදහටම නිහඬ වූ ඒ බස් රථයේ සුන්බුන් අතරින්, ආශා ගුරුතුමියගේ අවසන් ගීතයේ දෝංකාරය පමණක් අදටත් සදාකාලිකවම රැව්දෙමින් පවතී.
