රථවාහන අනතුරු සම්බන්ධයෙන් වන්දි ගෙවීමේදී අවශ්ය වන රජයේ රස පරීක්ෂක වාර්තා ලබා ගැනීම සඳහා අල්ලස් ලබා දුන්නේ යැයි කියන සිද්ධියකට අදාළව රක්ෂිත බන්ධනාගාරගත කර සිටි පෞද්ගලික රක්ෂණ සමාගමක සාමාන්යාධිකාරීවරයෙකු ඇප මත මුදා හැරීමට කොළඹ ප්රධාන මහෙස්ත්රාත් අසංග බෝදරගම මහතා නියෝග කළේය.
අල්ලස් හෝ දූෂණ චෝදනා විමර්ශන කොමිසම මගින් අත්අඩංගුවට ගෙන සිටි අදාළ රක්ෂණ සමාගමේ මෝටර් තාක්ෂණ අංශයේ සාමාන්යාධිකාරීවරයා වන සනත් ප්රියන්ත රණවීර නැමති මෙම සැකකරුට ඇප ලබා දීමට අමතරව ඔහුගේ විදෙස් ගමන් තහනම් කරමින් ද මහෙස්ත්රාත්වරයා නියෝගයක් නිකුත් කරනු ලැබීය. සැකකරු වෙනුවෙන් අධිකරණය හමුවේ පෙනී සිටි ජනාධිපති නීතිඥ අලි සබ්රි මහතා විසින් ඉදිරිපත් කළ දීර්ඝ කරුණු දැක්වීමක් සැලකිල්ලට ගැනීමෙන් අනතුරුව මෙම තීරණය ප්රකාශයට පත් කෙරිණි.
අදාළ රක්ෂණ සමාගම විසින් නඩුවේ පළමු සැකකරු ලෙස නම් කර සිටින විශ්රාමික අතිරේක රජයේ රස පරීක්ෂක ජයමාන්න මහතාගේ සේවය ලබා ගෙන ඇත්තේ සම්පූර්ණයෙන්ම නීත්යානුකූල පදනමක් යටතේ බව ජනාධිපති නීතිඥවරයා එහිදී පෙන්වා දුන්නේය. තවද, වෙනත් පෞද්ගලික රක්ෂණ සමාගම් කිහිපයක්ම මෙවැනිම ආකාරයෙන් රස පරීක්ෂක වාර්තා ලබාගෙන තිබියදී අල්ලස් කොමිසම විසින් සිය සේවාදායකයාගේ සමාගම පමණක් ඉලක්ක කරමින් දූෂණ චෝදනා එල්ල කරන්නේ කුමන පදනමක් යටතේදැයි ඔහු අධිකරණයෙන් ප්රශ්න කර සිටියේය. එම කරුණු මත පදනම්ව සැකකරුට ඇප ලබා දෙන ලෙස හෙතෙම ඉල්ලා සිටියේය.
කෙසේ වෙතත්, පැමිණිල්ල මෙහෙයවූ අල්ලස් කොමිසමේ නිලධාරීන් අධිකරණයට දැනුම් දුන්නේ රජයේ රස පරීක්ෂක දෙපාර්තමේන්තුවෙන් නීති විරෝධී ලෙස වාර්තා ලබා ගැනීම වෙනුවෙන් රුපියල් ලක්ෂ හැටහතරකට අධික මුදලක් අල්ලස් ලෙස ලබා දීම සහ දූෂණයට ආධාර අනුබල දීම යන චෝදනා මත මෙම අත්අඩංගුවට ගැනීම සිදු කළ බවයි. සිද්ධියට අදාළ විමර්ශන තවදුරටත් ක්රියාත්මක වන බැවින් සැකකරුට ඇප ලබා නොදී තවදුරටත් රක්ෂිත බන්ධනාගාරයේ රඳවා තබන ලෙස ඔවුහු ඉල්ලීමක් කළහ.
දෙපාර්ශවයේම කරුණු සලකා බැලූ ප්රධාන මහෙස්ත්රාත්වරයා, විත්තියේ නීතිඥවරයා විසින් මතු කළ කරුණු සුවිශේෂී තත්ත්වයක් ලෙස සලකා සැකකරු ඇප මත මුදා හැරීමට තීන්දු කළේය. එසේම, මෙම සිද්ධියට අදාළ විමර්ශනවල ප්රගතිය ඇතුළත් සවිස්තරාත්මක වාර්තාවක් එළඹෙන ජුනි මස 23 වැනි දින අධිකරණයට ඉදිරිපත් කරන ලෙස ද අල්ලස් කොමිසමට වැඩිදුරටත් නියෝග කෙරිණි.
