කොළඹ බණ්ඩාරනායක අනුස්මරණ ජාත්යන්තර සම්මන්ත්රණ ශාලා පරිශ්රයේ රූගත කෙරෙමින් පැවති ඉන්දීය චිත්රපටයකට සම්බන්ධ වීමට පැමිණි පුද්ගලයෙකු හදිසියේ රෝගාතුර වී ඇද වැටීමෙන් ජීවිතක්ෂයට පත්ව තිබේ. කුරුඳුවත්ත පොලිසිය විසින් මෙම මරණය පිළිබඳව තොරතුරු තහවුරු කර ඇති අතර, අදාළ පුද්ගලයා එහි ඉන්දීය පාර්ලිමේන්තු මන්ත්රීවරයෙකුගේ චරිතයක් නිරූපණය කිරීම සඳහා වෙස් ගැන්වීමට සූදානම් වෙමින් සිටියදී මෙම අවාසනාවන්ත ඉරණමට මුහුණ දී ඇත.
මෙලෙස මියගොස් ඇත්තේ මාතලේ, කළුදෑවල රත්තොට පාර ප්රදේශයේ පදිංචිව සිටි 52 හැවිරිදි අලගර් කරප්පු සාමි නැමැති අයෙකි. ඔහු අවිවාහක පුද්ගලයෙකු වන අතර, රූගත කිරීම් සඳහා සූදානම් වන අතරතුර නාන කාමරය වෙත ගිය අවස්ථාවේදී එහි හදිසියේම ඇද වැටී තිබේ. අනතුරුව සිහිසුන් වූ ඔහුව එහි සිටි රූගත කිරීම් කණ්ඩායම විසින් කඩිනමින් කොළඹ ජාතික රෝහල වෙත ඇතුළත් කිරීමට පියවර ගෙන ඇතත් ඔහුගේ ජීවිතය බේරාගැනීමට හැකි වී නොමැත.
මෙම රූගත කිරීම ඉන්දීය සිනමාවේ ජනප්රිය තරු යුවළක් වන සරවනන් සිවකුමාර් හෙවත් සූර්යා සහ ට්රිෂා ක්රිෂ්ණන් යන නළු නිළියන්ගේ ප්රධාන සහභාගීත්වයෙන් සිදු කිරීමට නියමිතව තිබූ එකකි. පොලිස් මූලික විමර්ශනවලට අනුව, ඊයේ (21) පස්වරු 2.30 ට පමණ ඉන්දීය පාර්ලිමේන්තු මණ්ඩලය නිරූපණය කෙරෙන දර්ශනයක් සම්මන්ත්රණ ශාලා පරිශ්රයේදී රූගත කිරීමට සැලසුම් කර තිබී ඇති අතර, ඒ සඳහා අදාළ පිරිස දහවල් 12.30 ට පමණ සිට සූදානම් වෙමින් සිටියදී මෙම හදිසි මරණය සිදුවී ඇත.
