හෝමාගම පොලිස් බලප්රදේශයට අයත් මොරගහහේන මාර්ගයේ පිහිටි හෝටලයක පැවති සාදයක් අතරතුර සිසුන් දෙපිරිසක් අතර ඇතිවූ ගැටුමකින් දහනව හැවිරිදි තරුණයෙකු ඝාතනයට ලක්ව තිබේ. අප්රේල් 09 වනදා රාත්රී කාලයේදී මෙම අවාසනාවන්ත සිදුවීම වාර්තා වී ඇති අතර, මෙලෙස ජීවිතක්ෂයට පත්ව ඇත්තේ නිකදළුපොත, වැල්ලව ප්රදේශයේ පදිංචිව සිටි තරුණයෙකි.
හෝමාගම ප්රදේශයේ පිහිටි පෞද්ගලික විශ්වවිද්යාලයක සිසුන් පිරිසක් විසින් අදාළ හෝටල් පරිශ්රය තුළ මෙම සාදය සංවිධානය කර තිබුණි. එම සාදය අතරතුරදී පිරිසක් අතර හටගත් බහින්බස්වීමක් දුරදිග ගොස් සිදුවූ බරපතළ පහරදීමක් හේතුවෙන් මෙම මරණය සිදුව ඇති බවට පොලිස් විමර්ශන මගින් මේ වනවිට අනාවරණය කරගෙන ඇත. අදාළ හෝටලය තුළ පුද්ගලයෙකු මියගොස් සිටින බවට හෝමාගම පොලීසියට ලැබුණු තොරතුරක් මත මෙම මූලික විමර්ශන ආරම්භ කර තිබුණි.
මෙම ඝාතන සිද්ධියට අදාළව එම පෞද්ගලික විශ්වවිද්යාලයේම අධ්යාපනය ලබන බව කියන සැකකාර සිසුන් පස්දෙනෙකු මේ වනවිටත් පොලීසිය විසින් අත්අඩංගුවට ගෙන තිබේ. මියගිය තරුණයාගේ මෘත දේහය සම්බන්ධයෙන් වන මහේස්ත්රාත් පරීක්ෂණය සිදුකිරීමට නියමිතව ඇති අතර, සිද්ධිය සම්බන්ධයෙන් වන වැඩිදුර විමර්ශන කටයුතු හෝමාගම පොලීසිය විසින් තවදුරටත් ක්රියාත්මක කරනු ලබයි.
