එංගලන්තයේ ගුරුවරියක ලෙස සේවය කළ තිස් නව හැවිරිදි දෙදරු මවක බොල්ගොඩ ගඟේ සිදු වූ බෝට්ටු අනතුරකින් ඊයේ (29) සවස ජීවිතක්ෂයට පත් වූ බව පිළියන්දල පොලිසිය වාර්තා කරයි. සමෘද්ධි අනුරුද්ධිකා වනිගසේකර නැමැති මෙම කාන්තාව සිය පවුලේ සාමාජිකයන් සමග දම්පේ ප්රදේශයේදී බෝට්ටු සවාරියක නිරත වෙමින් සිටියදී මෙම අවාසනාවන්ත සිදුවීමට මුහුණ දී තිබේ.
කෙසේ වෙතත්, මෙම අනතුරින් ඇයගේ දරුවන් දෙදෙනා ඇතුළු තවත් සිව් දෙනෙකුගේ ජීවිත බේරා ගැනීමට හැකි වී ඇත.පොලිස් විමර්ශනවලට අනුව ඇය මෙරටට පැමිණ ඇත්තේ මීට සති කිහිපයකට පෙර තම සැමියා සහ දරුවන් සමග නිවාඩුවක් ගත කිරීමේ අරමුණෙනි. ඔවුන් එළඹෙන පස්වැනිදා යළි එංගලන්තය බලා පිටත්ව යාමට සියලු කටයුතු සූදානම් කර තිබී ඇත.
පිළියන්දල සහ කැස්බෑව හදිසි මරණ පරීක්ෂක අජිත් විජේසිංහ මහතා සඳහන් කළ පරිදි, ඇය මෙම ගමනට එක්ව ඇත්තේ සිය කුඩා පුතු, දියණිය, පියා සහ ඥාති සහෝදරියක සමගිනි. ඥාතිවරියකගේ ස්වාමිපුරුෂයාගේ මිතුරෙකුට අයත් ක්රීඩා සමාජයක බෝට්ටුවකින් ඔවුන් ගමන් කරමින් සිට ඇත. එහිදී එක්වරම බෝට්ටුවේ එන්ජිම ක්රියාවිරහිත වී එහි ඉදිරිපස ඉහළට එසවී ඇති අතර, එන්ජිම සහිත පසුපස කොටසට ජලය පිරීමෙන් බෝට්ටුව සම්පූර්ණයෙන්ම පෙරළී ගොස් තිබේ.
බෝට්ටුව පෙරළෙන අවස්ථාවේදී ජීවිතාරක්ෂක කබා පැලඳ සිට ඇත්තේ කුඩා දරුවන් දෙදෙනා පමණක් වන අතර, එම නිසා ඔවුන් ජලය මතුපිට පාවෙමින් ආරක්ෂිතව සිට ඇත. එහෙත් මියගිය කාන්තාව ඇතුළු අනෙක් වැඩිහිටියන් තිදෙනා එවැනි ආරක්ෂිත කබා පැලඳ නොසිටි බව පරීක්ෂණවලදී තහවුරු වී තිබේ.
අනතුරට පත් වූවන් පෙරළුණු බෝට්ටුවේ එල්ලී සිටියදී එම ස්ථානයට පැමිණි වෙනත් බෝට්ටුවක් මගින් ඔවුන්ව මුදාගෙන පිළියන්දල දිසා රෝහල වෙත ඇතුළත් කර ඇත. එහෙත් රෝහලට රැගෙන එන විටත් අදාළ කාන්තාව මරණයට පත්ව සිටි බව හදිසි මරණ පරීක්ෂකවරයා තහවුරු කළේය.
බොල්ගොඩ බෝට්ටු සේවාවන් මගීන්ට සලසන ආරක්ෂාව සම්බන්ධ ගැටලුවක් මෙහිදී පෙන්නුම් කර ඇති අතරම හදිසි අවස්ථාවක ප්රමාද නොවී අවශ්ය ක්රියාමාර්ග ගැනීමට නිසි වැඩපිළිවෙලක් නොමැතිකමින් මෙම අවාසනාවන්ත සිදුවීමට ගුරුවරිය ගොදුරු වූවාය
අදාළ පශ්චාත් මරණ පරීක්ෂණය කළුබෝවිල ශික්ෂණ රෝහලේදී පැවැත්වීමට නියමිතව තිබේ.
සමෘද්ධි අනුරුද්ධිකා වනිගසේකර ගුරුවරිය දරුවන්ට දයාබර මවක වූවාය. ඇය ඉගෙන ගත් පාසලේ ශාන්ත පාවුළු බාලිකාවන්ද ඇගේ සමුගැනීම නිසා කම්පනයට පත්ව ඇත.
