2026 වසරේ මාර්තු මස 07 සහ 08 යන දිනයන්හි ක්රියාත්මක වීමට නියමිතව තිබූ ගුවන් ගමන් වාර කිහිපයක් අවලංගු කිරීමට ශ්රීලංකන් ගුවන් සේවය තීරණය කර ඇත. අදාළ දිනවල රාත්රී 11.59 දක්වා මෙම ගුවන් ගමන් අත්හිටුවීම ක්රියාත්මක වන බව එම ගුවන් සේවය විසින් නිවේදනය කර තිබේ.
මෙම තීරණය හේතුවෙන් කොළඹ සහ මැදපෙරදිග ගමනාන්ත කිහිපයක් අතර ක්රියාත්මක වන ගුවන් ගමන් රැසකට බාධා එල්ල වී ඇත. ඒ අනුව කොළඹ සහ ඩුබායි අතර ක්රියාත්මක වන UL225 සහ UL226, කොළඹ සහ රියාද් අතර පියාසර කරන UL265 සහ UL266 මෙන්ම දෝහා දක්වා වන UL217 සහ UL218 යන ගුවන් ගමන් වාර අත්හිටුවා තිබේ. ඊට අමතරව දම්මාම් දක්වා වන UL253 සහ UL254 ගුවන් ගමන් ද, කුවේට් දක්වා වන UL229 සහ UL230 යන ගුවන් ගමන් වාර ද මෙම අවලංගු කිරීම්වලට ඇතුළත් වේ. එසේම, මාර්තු 08 වන දින කොළඹ සිට ඩුබායි දක්වා ගමන් කිරීමට නියමිත UL231 සහ ඩුබායි සිට කොළඹ දක්වා පැමිණීමට නියමිත UL232 යන ගුවන් ගමන් වාර ද ක්රියාත්මක නොවන බව ගුවන් සේවය සඳහන් කරයි.
ගුවන් ගමන් වාර සම්බන්ධ යාවත්කාලීන තොරතුරු කඩිනමින් ලබා ගැනීම සඳහා www.srilankan.com වෙබ් අඩවිය හරහා තම ගුවන් ගමනේ වර්තමාන තත්ත්වය නිරන්තරයෙන් පරීක්ෂා කරන ලෙස මගීන්ට උපදෙස් දී තිබේ. මේ සම්බන්ධයෙන් යම් සහයක් අවශ්ය වන මගීන්ට ශ්රී ලංකාව තුළ සිටින්නේ නම් 1979 යන අංකය ඔස්සේ ද, විදේශයන්හි සිටින්නේ නම් +94 11 777 1979 යන අංකය ඔස්සේ ද ශ්රීලංකන් ගුවන් සේවයේ ගෝලීය ඇමතුම් මධ්යස්ථානය අමතා තොරතුරු ලබාගත හැක. එසේත් නොමැති නම් ළඟම පිහිටි ශ්රීලංකන් ගුවන් සේවා කාර්යාලය හෝ ප්රවේශපත්රය මිලදී ගත් සංචාරක නියෝජිතයා හරහා ද මගීන්ට අවශ්ය සහාය ලබා ගැනීමට පහසුකම් සලසා ඇත.
