යාපනය විශ්වවිද්යාලයේ 54 හැවිරිදි කථිකාචාර්යවරියක වූ තයාරාණි තීපන් මහත්මිය පැහැරගෙන ගොස් ගෙල සිරකර ඝාතනය කිරීමේ කෲර සිදුවීමක් මේ දිනවල යාපනය ප්රදේශය පුරා දැඩි කම්පනයක් නිර්මාණය කර තිබේ. මෙම අපරාධය ඇගේ බෑණා විසින් සිදු කර ඇති අතර, එම ඛේදනීය අවස්ථාවේදී මියගිය කථිකාචාර්යවරියගේ දියණිය ද අපරාධ ස්ථානයේ රැඳී සිටීම සමාජය දැඩි ලෙස විමතියට පත් කර ඇත.
සිය සැමියාගෙන් වෙන්ව යාපනය පාණ්ඩියන් තාල්වු ප්රදේශයේ දියණිය සමඟ ජීවත් වූ මෙම කථිකාචාර්යවරිය මෙලෙස ඝාතනය වී තිබුණි. ඇගේ පුත්රයා කොළඹ ප්රදේශයේ රැකියාවක නිරතව සිටී.මෙම ඝාතනයට මුල් වී ඇත්තේ පවුල් ආරවුලක් බව පොලිස් විමර්ශන මගින් මේ වන විට තහවුරු කරගෙන තිබේ. මියගිය කථිකාචාර්යවරියගේ 19 හැවිරිදි දියණිය සහ 21 හැවිරිදි සැකකාර තරුණයා අතර පැවති ප්රේම සම්බන්ධතාවක ප්රතිඵලයක් ලෙස ඔවුන් ලියාපදිංචි විවාහයක් සිදු කරගෙන ඇතත්, බෑණාගේ හැසිරීම් රටාව පිළිබඳව මව තුළ දැඩි අප්රසාදයක් හටගෙන තිබේ. ඒ අනුව මවගේ උපදෙස් මත දියණිය විසින් අධිකරණයේ දික්කසාද නඩුවක් ගොනු කර ඇති අතර, මෙම ඝාතනය සිදුවන අවස්ථාව වන විටත් එම නඩුව අධිකරණයේ විභාග වෙමින් පැවතුණි. මීට පෙරද එක් අවස්ථාවක මෙම සැකකරු අදාළ නිවසට පැමිණ කලබල ඇති කිරීම හේතුවෙන්, ඔහුට එම නිවසට ඇතුළුවීම තහනම් කරමින් මහේස්ත්රාත්වරයා විසින් නියෝගයක් ද නිකුත් කර තිබී ඇත.
පසුගියදා කථිකාචාර්යවරිය සහ ඇගේ දියණිය අතුරුදන් වී ඇති බවට කොළඹ රැකියාව කරන පුත්රයා විසින් යාපනය පොලිසියට පැමිණිල්ලක් ඉදිරිපත් කිරීමත් සමඟ මෙම සිදුවීමේ විමර්ශන ආරම්භ විය. ඒ අනුව පොලිසිය පාණ්ඩියන් තාල්වු හි පිහිටි නිවස පරීක්ෂා කිරීමේදී, වහලේ උළු ගලවා කඹයක් ආධාරයෙන් කිසිවෙකු නිවසට ඇතුළු වී ඇති බවටත්, කපා දැමූ කෙස් රොදවල් කිහිපයක් එහි ඇති බවටත් සාක්ෂි සොයාගැනීමට සමත් විය. මෙම තත්ත්වය හමුවේ ක්රියාත්මක වූ පුත්රයා, තම නැගණියගේ ජංගම දුරකථනය භාවිත කළ ස්ථාන සහ ස්වයංක්රීය ටෙලර් යන්ත්ර මගින් මුදල් ලබාගත් ස්ථාන පිළිබඳ තොරතුරු කඩිනමින් සොයාගෙන පොලිසියට ලබා දීමට කටයුතු කළේය.
එම තොරතුරුවලට අනුව ත්රිකුණාමලය ප්රදේශයේ ඉන්ධන පිරවුම්හලකින් QR කේතය භාවිත කර වාහනයකට ඉන්ධන ලබාගෙන ඇති බවට තහවුරු වූ අතර, යාපනය දිස්ත්රික් අපරාධ නිවාරණ පොලිසිය විසින් එම ස්ථානයේ සවිකර තිබූ CCTV දර්ශන ඔස්සේ පරීක්ෂණ පුළුල් කරන ලදී. එහි ප්රතිඵලයක් ලෙස සැකකාර බෑණා සහ ඔහුගේ බිරිඳ වන කථිකාචාර්යවරියගේ දියණිය ත්රිකුණාමලය ප්රදේශයේදී පොලිස් අත්අඩංගුවට පත් විය. යාපනයට රැගෙන එන අතරතුර ඔවුන්ගෙන් දැඩි ලෙස ප්රශ්න කළද මව සිටින ස්ථානයක් පිළිබඳව ඔවුන් කිසිදු තොරතුරක් හෙළි කර නැත. කෙසේ වෙතත්, යාපනයට රැගෙන ඒමෙන් පසු සිදු කළ අඛණ්ඩ ප්රශ්න කිරීම් හමුවේ, තම මව පැහැරගෙන ගිය වහාම සැමියා විසින් ගෙල සිරකර ඝාතනය කළ බව දියණිය විසින් පොලිසියට පාපොච්චාරණය කර තිබේ.
ඝාතනයෙන් පසු මියගිය කාන්තාවට අයත් රන් ආභරණ දෙකක් ත්රිකුණාමලයේ උකස් කර ඇති බවද විමර්ශනවලදී අනාවරණය විය. දියණියගේ ප්රකාශයෙන් පසුව පමණක් මෙය ඝාතනයක් බව තහවුරු කරගත් පොලිසියට, මළ සිරුර නාවත්කුලි සහ අරක්කුවලි ප්රදේශයේ පඳුරකට විසි කළ බව ඇය විසින් වැඩිදුරටත් අනාවරණය කරන ලදී. ඒ අනුව පොලිසිය සැකකරුවන් ද සමඟ එම ප්රදේශයේ සෝදිසි මෙහෙයුම් දියත් කළද, රාත්රී කාලයේදී සිරුර බැහැර කර තිබූ බැවින් එය වහාම සොයාගැනීම දුෂ්කර විය. කෙසේ වෙතත් අඛණ්ඩව කළ සෝදිසි කිරීම් අවසානයේ දැඩි ලෙස නරක් වී තිබූ කථිකාචාර්යවරියගේ මළ සිරුර සොයා ගැනීමට හැකි විය.
අනතුරුව අපරාධ ස්ථාන පරීක්ෂණ නිලධාරීන්, යාපනය අපරාධ නිවාරණ අංශයේ නිලධාරීන් සහ අධිකරණ වෛද්ය නිලධාරී ප්රණවන් චෙල්ලයියා මහතා විසින් ස්ථානීය පරීක්ෂණ සිදු කිරීමෙන් පසු, සිරුර පශ්චාත් මරණ පරීක්ෂණය සඳහා යාපනය ශික්ෂණ රෝහල වෙත යොමු කරන ලදී. තම මව බේරාගැනීම වෙනුවෙන් පුත්රයා විසින් ගත් දැඩි උත්සාහය නොවන්නට මෙම ඝාතනය සහ මළ සිරුර සොයාගැනීම බෙහෙවින් ප්රමාද වීමට ඉඩ තිබුණි. මත්ද්රව්යවලට ඇබ්බැහි වූවන්ගෙන් සිදුවන අපරාධ රැල්ලක් හේතුවෙන් යාපනය ප්රදේශයේ ජනතාව දැනටමත් දැඩි බියකින් පසුවන අතර, උගත් කථිකාචාර්යවරියකට මුහුණ දීමට සිදුවූ මෙම කෲර ඉරණම සමස්ත ප්රදේශයම තවදුරටත් දැඩි කම්පනයකට පත් කර තිබේ.
