ඇමරිකා එක්සත් ජනපදය විසින් එල්ල කළ හැකි හමුදාමය ආක්රමණයක් සඳහා කියුබාව මේ වන විටත් සූදානම් වෙමින් පවතින බව එරට ඉහළ පෙළේ රාජ්ය තාන්ත්රිකයෙකු අනතුරු අඟවා ඇත. කියුබාවට එරෙහිව පනවා ඇති තෙල් සම්බාධක හේතුවෙන් දශක කිහිපයකින් පසු එම දූපත් රාජ්යය දැවැන්තම බලශක්ති අර්බුදයකට මුහුණ දී සිටින අතර, ඒ සම්බන්ධයෙන් දෙරට අතර සති කිහිපයක සිට සාකච්ඡා ද පැවැත්වෙමින් තිබේ.
එහෙත් මෑත දිනවලදී ඩොනල්ඩ් ට්රම්ප් මෙන්ම ඇමරිකානු රාජ්ය ලේකම් මාකෝ රුබියෝ ඇතුළු ඉහළ පෙළේ පරිපාලන නිලධාරීන් කියුබාවේ පාලන තන්ත්රය වෙනස් කිරීමේ අපේක්ෂාවන් පිළිබඳව සිය අදහස් දැඩිව ප්රකාශ කර ඇත. කියුබාවේ පාලනය සඳහා නව පිරිසක් අවශ්ය බව රුබියෝ පසුගියදා අවධාරණය කළේය.මාධ්ය වෙත අදහස් දක්වමින් ජනාධිපති ට්රම්ප් ප්රකාශ කර තිබුණේ කියුබාව අත්පත් කර ගැනීමේ ගෞරවය තමාට හිමිවනු ඇතැයි තමා විශ්වාස කරන බවයි. රට නිදහස් කිරීම හෝ අත්පත් කර ගැනීම කුමක් වුවත්, කියුබාව සම්බන්ධයෙන් තමන්ට අවශ්ය ඕනෑම දෙයක් කළ හැකි යැයි සිතන බව ඔහු එහිදී වැඩිදුරටත් කියා සිටියේය. මෙම තත්ත්වය හමුවේ ඇමරිකාව සමඟ ගැටුමක් ඇතිවීමේ සම්භාවිතාව නොසලකා හැරීම කියුබානු නායකයින්ගේ පැත්තෙන් බොළඳ ක්රියාවක් වනු ඇතැයි කියුබානු නියෝජ්ය විදේශ කටයුතු අමාත්ය කාලෝස් ෆර්නැන්ඩස් ඩි කොසියෝ රූපවාහිනී සම්මුඛ සාකච්ඡාවකදී සඳහන් කළේය. තම හමුදාව සෑම විටම සූදානමින් සිටින බවත්, විශේෂයෙන්ම සිදුවිය හැකි හමුදා ආක්රමණයක් සඳහා ඔවුන් පෙර සූදානමකින් පසුවන බවත් ඔහු පැහැදිලි කළේය. කෙසේ වෙතත්, කියුබාවට ඇමරිකාව සමඟ කිසිදු ආරවුලක් නොමැති බවත්, තම රට ආරක්ෂා කර ගැනීමේ අයිතිය රඳවා ගනිමින් සාකච්ඡා සඳහා තවදුරටත් විවෘතව සිටින බවත් අමාත්යවරයා වැඩිදුරටත් පැවසීය.
දෙරට අතර සාකච්ඡා පැවැත්වීම කියුබානු බලධාරීන්ට කිසිදු අස්වැසිල්ලක් නොවන බව විචාරකයෝ පෙන්වා දෙති. මීට පෙර ඉරානයට සහ වෙනිසියුලාවට එරෙහිව හමුදා මැදිහත්වීම් සිදු කිරීමට පෙරද ඇමරිකානු රජය එම රටවල් සමඟ ද සාකච්ඡා පවත්වමින් සිටියේය. පසුගිය ජනවාරි මාසයේදී වෙනිසියුලානු හිටපු ජනාධිපති නිකොලස් මදුරෝ කැරකස් අගනුවරදී අත්අඩංගුවට ගත් අතර, ඔහු සහ ඔහුගේ බිරිඳ මේ වන විට ඇමරිකාව තුළ මත්ද්රව්ය ජාවාරම් කිරීමේ චෝදනාවලට මුහුණ දෙමින් සිටිති. කැරකස් නුවර සිදු කළ එම මෙහෙයුම හවානා අගනුවර සඳහා වූ පෙරහුරුවක් ලෙස සලකමින් ට්රම්ප් පරිපාලනය විසින් කියුබාව තුළද එවැනිම උත්සාහයක් ක්රියාත්මක කළ හැකි බව 'ද ඇට්ලැන්ටික්' සඟරාව වාර්තා කර තිබුණි.
සිය ආර්ථිකය පවත්වාගෙන යාමට අවශ්ය ඉන්ධන වලින් සියයට හතළිහක් පමණක් නිපදවන කියුබාව, මින් පෙර දැඩි ලෙස රඳා පැවතුණේ වෙනිසියුලාවෙන් ලැබෙන ඉන්ධන සැපයුම් මතය. මදුරෝගේ අත්අඩංගුවට ගැනීමෙන් පසුව ට්රම්ප් විසින් කියුබාවට දැඩි සම්බාධක පනවා ඇති අතර, දිවයිනට තෙල් විකුණන ඕනෑම රටකට තීරුබදු පනවන බවට ද තර්ජනය කර තිබේ. මේ වසරේ මේ දක්වා කියුබාවට කිසිදු තෙල් නැව්ගත කිරීමක් ලැබී නොමැති අතර, එහි ප්රතිඵලයක් ලෙස දශක ගණනාවකින් දක්නට ලැබුණු දරුණුතම බලශක්ති අර්බුදයට ඔවුන් මේ වන විට මුහුණ දී සිටී. පසුගිය සෙනසුරාදා දින ජාතික විදුලි පද්ධතියේ සම්පූර්ණ බිඳවැටීමක් කියුබානු බලශක්ති අමාත්යාංශය විසින් වාර්තා කරන ලදී. ඉරිදා වන විට හවානා නුවර ඇතැම් ප්රදේශවලට විදුලිය යථා තත්ත්වයට පත් කිරීමට බලධාරීන් කටයුතු කර තිබුණද, මිලියන 10ක් වූ එරට ජනගහනයෙන් බහුතරයක් තවමත් අඳුරේ පසුවෙති.
මෙය සතියකටත් අඩු කාලයක් තුළ කියුබාවට බලපෑ දෙවන දැවැන්තම විදුලි බිඳවැටීමයි. කියුබාව තුළ මහජන විරෝධතා සාමාන්යයෙන් කලාතුරකින් දක්නට ලැබුණද, මෙම නිරන්තර විදුලිය විසන්ධි වීම් හේතුවෙන් පාසල් වැසී ගොස් පාරවල් පුරා කසළ ගොඩගැසී ඇති බැවින් සිවිල් නොසන්සුන්තාවයන් හටගෙන තිබේ. හවානා නුවර වැසියන් මුට්ටි සහ භාජන වලට තට්ටු කරමින් සිය විරෝධය පළ කරන අතර සමහර අවස්ථාවලදී ප්රධාන මාර්ග අවහිර කිරීම සඳහා ගිනි දැල්වීම් ද සිදු කර ඇත. කෙසේ හෝ කියුබාවට අවශ්ය ඉන්ධන ලැබෙනු ඇතැයි අපේක්ෂා කරන බවත්, ඇමරිකා එක්සත් ජනපදය විසින් පනවා ඇති මෙම වර්ජනය සදහටම පවත්වාගෙන යා නොහැකි බවත් නියෝජ්ය විදේශ කටයුතු අමාත්ය ෆර්නැන්ඩස් ඩි කොසියෝ අවධාරණය කර තිබේ.
