ලංකා විදුලිබල මණ්ඩලයේ වෘත්තීය සමිති රජයට දැඩි අනතුරු ඇඟවීමක් කරමින් ප්රකාශ කර සිටින්නේ, තම ඉල්ලීම් අට සඳහා නිසි විසඳුම් නොලැබෙන්නේ නම් සහ විදුලිබල මණ්ඩලය ඈවර කිරීමේ ගැසට් නිවේදනය නිකුත් කළහොත්, අපොස සාමාන්ය පෙළ විභාගය අවසන් වූ වහාම දැඩි වෘත්තීය සමිති ක්රියාමාර්ගයකට අවතීර්ණ වන බවයි.
තම ඉල්ලීම්වලට සවන් නොදෙමින් නීතිවිරෝධී ලෙස ප්රතිව්යූහගත කිරීම සඳහා රජය විසින් වැරදි තීරණයක් ගනු ලැබුවහොත්, අකමැත්තෙන් වුවද ඉදිරි පැය 48 ඇතුළත මෙම තීරණය ක්රියාත්මක කිරීමට තමන්ට සිදුවන බව ඔවුහු පෙන්වා දෙති.
සේවක ගැටලු සහ බලශක්ති අර්බුදයන් නොසලකා හරිමින්, නිසි බලශක්ති ප්රතිපත්තියක් ස්ථාපිත කිරීමකින් තොරව අත්තනෝමතික ලෙස අදාළ ගැසට් නිවේදනය නිකුත් කරන්නේ නම් කිසිදු පූර්ව දැනුම් දීමකින් තොරව මෙම පියවර ගන්නා බව සමිති නියෝජිතයෝ අවධාරණය කරති. මෙම බරපතල තීරණය හේතුවෙන් රටට සහ ජනතාවට දැඩි බලපෑමක් එල්ල විය හැකි අතර, එහි සම්පූර්ණ වගකීම රජය විසින් භාරගත යුතු බවද ඔවුහු වැඩිදුරටත් කියා සිටිති.
කෙසේ වෙතත්, පාසල් දරුවන් අපොස සාමාන්ය පෙළ විභාගයට පෙනී සිටින මෙම කාලසීමාව තුළ එවැනි වර්ජන ක්රියාමාර්ගයක් ගැනීමට තමන් සූදානම් නොමැති බවත්, වර්තමානයේ තමන් දක්වන සංයමයට එකම හේතුව සාමාන්ය පෙළ විභාගය පැවැත්වීම බවත් විදුලිබල මණ්ඩල වෘත්තීය සමිති පැහැදිලි කරයි.
මේ බව අනාවරණය කෙරුණේ ඊයේ (පෙබරවාරි 23) කොළඹදී පැවති මාධ්ය හමුවකදීය. ලංකා විදුලිබල මණ්ඩලයේ ඉංජිනේරු සංගමයේ විධායක කමිටු සාමාජික ඉංජිනේරු සඳරුවන් මංචනායක, තාක්ෂණික ඉංජිනේරු සහ නිලධාරී සංගමයේ නියෝජ්ය සභාපති නන්දන උදය කුමාර, විදුලි කාර්මික ශිල්පීන්ගේ සංගමයේ සභාපති කෝසල අබේසිංහ සහ ස්වාධීන සේවක සංගමයේ ප්රධාන ලේකම් ප්රභාත් ප්රියන්ත යන මහත්වරුන් ඇතුළු නියෝජිතයෝ මෙම අවස්ථාවට සහභාගී වූහ.
මෙම අනතුරු ඇඟවීම නිකුත් කර ඇත්තේ, විදුලිබල මණ්ඩලයේ ස්වේච්ඡා විශ්රාම යෝජනා ක්රමය (VRS) සඳහා අයදුම් කර ඇති සේවකයින් විසින් මෑතකදී කළ ප්රකාශයකින් අනතුරුවය. පෙබරවාරි 28 වැනිදා මණ්ඩලය විසුරුවා හැරීමේ ගැසට් නිවේදනය නිකුත් කරන බවට ලංකා විදුලිබල මණ්ඩලයේ සභාපතිවරයා තහවුරු කළ බව එම සේවකයෝ ප්රකාශ කළහ. තවද, ස්වේච්ඡාවෙන් විශ්රාම ගැනීමට තීරණය කරන සේවකයින් සඳහා වන වන්දි මුදල් කිසිදු ගැටලුවකින් තොරව ලබාදීමට රජය කටයුතු කරනු ඇති බවටද ඔවුනට දැනුම් දී ඇත.
