නීතීඥ බුද්ධික මල්ලවආරච්චි මහතා සහ ඔහුගේ බිරිඳ ඝාතනය කිරීම තරයේ හෙළා දකිමින් එක්සත් ජාතික පක්ෂය විසින් විශේෂ නිවේදනයක් නිකුත් කර ඇති අතර, මෙම අපරාධය ශ්රී ලංකාවේ නීතියේ ආධිපත්යයට සහ නීති පද්ධතියේ අඛණ්ඩතාවයට බරපතල තර්ජනයක් එල්ල කරන බවට ඔවුහු අනතුරු අඟවති.
පෙබරවාරි 13 වන දින මහ දවාලේ සිදු වූ මෙම වෙඩි තැබීම හේතුවෙන් නීතිය හා සාමය කෙරෙහි සැලකිය යුතු අහිතකර බලපෑමක් ඇති වන බව එම පක්ෂය පෙන්වා දෙන අතර, මෑත කාලීනව සිදු වූ ඝාතන මාලාවක් හේතුවෙන් මේ වන විටත් රටේ නීතිය හා සාමය දැඩි ලෙස දුර්වල වී ඇති බව අවධාරණය කරයි.
නීති වෘත්තිකයන්ට එල්ල වන ප්රහාර සහ තර්ජන හරහා යුක්තිය පසිඳලීමේ ක්රියාවලියට බාධා එල්ල වූ ලොව වෙනත් රටවල සිදුවීම් සමග මෙම ඝාතනය සමපාත වන බව ද එම නිවේදනයේ වැඩිදුරටත් සඳහන් වේ.
මෙම ඝාතනය සම්බන්ධයෙන් සිදු කෙරෙන විමර්ශන කටයුතු පිළිබඳව ද එක්සත් ජාතික පක්ෂය සිය දැඩි කනස්සල්ල පළ කර ඇති අතර, පොලිස් දෙපාර්තමේන්තුව තුළ දේශපාලනීකරණයක් සිදුව ඇති බවට චෝදනා කරමින් අපක්ෂපාතී පරීක්ෂණයක් පැවැත්වීමට බලධාරීන්ට ඇති හැකියාව පිළිබඳව ද ප්රශ්න කර තිබේ.
මෙම තත්ත්වය හමුවේ වහාම ක්රියාත්මක වන ලෙස ඉල්ලා සිටින එම පක්ෂය, මහජන ආරක්ෂක සහ පාර්ලිමේන්තු කටයුතු අමාත්යවරයා වහාම සිය තනතුරෙන් ඉල්ලා අස්විය යුතු බවට බල කර සිටියි.
ඊට අමතරව, ශ්රී ලංකා නීතීඥ සංගමයේ උපදේශනය සහිතව සුදුසු විමර්ශන කණ්ඩායමක් පත් කිරීම මෙන්ම, නීතිඥ වෘත්තිය ආරක්ෂා කිරීම සඳහා වන යුරෝපා කවුන්සිල සම්මුතියේ (Council of Europe Convention for the Protection of the Profession of Lawyer) දක්වා ඇති ආරක්ෂණ විධිවිධාන ක්රියාත්මක කිරීම උදෙසා අවශ්ය පරිපාලන හෝ ව්යවස්ථාදායක පියවර ගන්නා ලෙස ද ඔවුහු රජයෙන් ඉල්ලා සිටිති.
ශ්රී ලංකාව තුළ නීතීඥවරුන් සඳහා ප්රමාණවත් ආරක්ෂාවක් තහවුරු කිරීමට ගන්නා ඕනෑම උත්සාහයකට සිය පූර්ණ සහයෝගය ලබා දෙන බව එක්සත් ජාතික පක්ෂය සිය නිවේදනය මගින් ප්රකාශ කර ඇත.
