අද (3) දින කොළඹ අපරාධ පරීක්ෂණ දෙපාර්තමේන්තු පරිශ්රයට ශ්රී ලංකා පොදුජන පෙරමුණේ දේශපාලන ආධාරකරුවන්ගේ සංවිධායකත්වයෙන් කොලොන්නාව හා ගල්කිස්සෙන් පිරිස් ගෙන්වා තිබුණ අතර ඔවුන් එසේ පැමිණි නමුත් නාමල් හෝ ශිරන්ති ප්රශ්න කිරීමට ලක්කරන්නේ මොනවා ගැනද යන්න නොදැන බව සිරස ටීවී සිදුකළ සමීක්ෂණයකින් අනාවරණය විය. නාමල් රාජපක්ෂ මහතා සහ ශිරන්ති රාජපක්ෂ මහත්මිය අදාළ ස්ථානයට පැමිණෙන බව දැනගත් ආධාරකරුවන් විශාල පිරිසක් "ජය වේවා" යනුවෙන් ඝෝෂා කරමින් එම ස්ථානයට රැස්ව සිටිනු දක්නට ලැබුණි.
එසේ පැමිණ සිටි බහුතරයක් දෙනාට එදින සිදුවන්නේ කුමක්ද හෝ රාජපක්ෂ පවුලේ සාමාජිකයන් කැඳවා ඇත්තේ කුමන කාරණයක් සම්බන්ධයෙන්ද යන්න පිළිබඳව නිශ්චිත අවබෝධයක් නොතිබූ බව ඔවුන්ගේ ප්රකාශවලින් තහවුරු විය. සංවිධායකයන් විසින් දැනුම් දීම මත බස් රථවලින් පැමිණි පිරිසක් මෙන්ම, රූපවාහිනී ප්රවෘත්ති ඔස්සේ නාමල් රාජපක්ෂ මහතා ප්රකාශයක් ලබා දීමට පැමිණෙන බව දැනගත් පිරිස් ද ඒ අතර වූහ.හිටපු ජනාධිපති මහින්ද රාජපක්ෂ මහතා රට වෙනුවෙන් විශාල සේවයක් කළ නායකයෙකු බවත්, ඔහු සහ ඔහුගේ පවුලේ සාමාජිකයන් ඉලක්ක කර ගනිමින් සිදුකරන මෙම ක්රියාවලිය අසාධාරණ බවත් රැස්ව සිටි ජනතාව දැඩිව කියා සිටියහ. නාමල් රාජපක්ෂ මහතා සහ ශිරන්ති රාජපක්ෂ මහත්මිය අපරාධ පරීක්ෂණ දෙපාර්තමේන්තුවට හෝ අදාළ ආයතනයට කැඳවා ඇත්තේ මන්දැයි හෝ එල්ල වී ඇති චෝදනා මොනවාදැයි තමන් නොදන්නා නමුත්, මෙය දේශපාලන අරමුණක් මත සිදුවන අපරාධයක් ලෙස තමන් දකින බව ඔවුහු පෙන්වා දුන්හ. ඔවුන්ගේ මූලික අරමුණ වී තිබුණේ නීතිමය කරුණු විමසීම නොව, තමන් ආදරය කරන දේශපාලන නායකයන් දැක බලා ගැනීම සහ ඔවුන්ට සහයෝගය පළ කිරීමයි.
කොළොන්නාව සහ ගල්කිස්ස වැනි ප්රදේශවල සිට පැමිණි මෙම පිරිස අතර වයස්ගත පුද්ගලයන් මෙන්ම ආබාධිත තත්ත්වයෙන් පසුවන පුද්ගලයන්ද දැකගත හැකි විය. විශේෂයෙන් කිහිලිකරු ආධාරයෙන් පැමිණි පුද්ගලයෙකු ප්රකාශ කළේ, පවතින චෝදනා පිළිබඳව තමන්ට දැනුමක් නොමැති වුවද මෙම ක්රියාවලිය තුළ සාධාරණයක් නොමැති බව තමන්ට හැඟෙන බැවින් අපහසුවෙන් වුවද මෙහි පැමිණි බවයි. කාන්තා පාර්ශවය නියෝජනය කරමින් පැමිණි අය ද සඳහන් කළේ ශිරන්ති රාජපක්ෂ මහත්මිය වෙනුවෙන් පෙනී සිටීමට තමන් පැමිණි බවත්, මෙම සමස්ත සිදුවීම තුළ යුක්තිය සහ සාධාරණත්වය ඉටු විය යුතු බවත්ය.
