පුස්සැල්ලවත්ත, කළුවිල, රඳාවාන ප්රදේශයේ නිවසකදී පෙරේදා (25) රාත්රියේදී හතළිස් හැවිරිදි විවාහක පුද්ගලයකු පොරවකින් කොටා ඝාතනය කර ඇතැයි මල්වතු සහ හිරිපිටිය පොලිසිය ප්රකාශ කරයි. අළුත්ගම ගම්මාන ප්රදේශයේ පදිංචි නිලන්ත විජේසූරිය (40) නමැති විවාහක පුද්ගලයකු මෙලෙස මරණයට පත්ව ඇති අතර, බරපතළ තුවාල ලබා ගම්පහ මූලික රෝහලට ඇතුළත් කිරීමෙන් අනතුරුව ඔහු මියගොස් තිබේ.
මියගිය පුද්ගලයා සැකකරුගේ බිරිය සමඟ අනියම් ඇසුරක් පවත්වා ඇති අතර, එම ඇසුර අතටම හසුවීමෙන් පසු සැකකරු විසින් සියුම් ලෙස මත්පැන් පොවා රවටා මෙම ඝාතනය සිදුකර ඇති බවට පොලිසිය තොරතුරු අනාවරණය කරයි. මෙම සිද්ධියට අදාළව, ඝාතනයට ලක්වූ පුද්ගලයා සමඟ මිත්රත්වයක් පැවැත්වූ කාන්තාවගේ සැමියා වන හතළිස් පස් හැවිරිදි පුද්ගලයකු පොලිස් අත්අඩංගුවට ගෙන තිබේ.
පොලිස් පරීක්ෂණ සහ මරණ පරීක්ෂණවලදී අනාවරණය වී ඇත්තේ, පිට ප්රදේශයක රැකියාවට ගොස් සිටි සැකකාර සැමියා සිද්ධිය වූ දින නිවසට පැමිණි අවස්ථාවේදී මියගිය පුද්ගලයාද එම නිවසේ සිට ඇති බවයි. අනතුරුව දෙදෙනා එක්ව මත්පැන් පානය කර ඇති අතර, පසුව නින්දට ගොස් සිටියදී පොරවෙන් කොටා ඝාතනය සිදුකර තිබේ.
මියගිය අයගේ පශ්චාත් මරණ පරීක්ෂණය ඊයේ (26) ගම්පහ රෝහලේදී පැවැත්වීමට නියමිතව තිබිණි.