දුම්රිය රියදුරන් විසින් ඊයේ මධ්යම රාත්රියේ සිට ක්රියාත්මක කිරීමට සැලසුම් කර තිබූ වැඩවර්ජනය අත්හිටුවීමට තීරණය කර ඇති බැවින්, අද දිනයේදී දුම්රිය ධාවන කටයුතු කිසිදු බාධාවකින් තොරව සාමාන්ය පරිදි සිදුවන බව දුම්රිය රියදුරු වෘත්තීය සමිති නිවේදනය කරයි.
මෙම වෘත්තීය සමිති ක්රියාමාර්ගය කැඳවා තිබුණේ ලොකොමොටිව් ඔපරේටින් ඉන්ජිනියර්ස් සහ ලොකොමොටිව් ඔෆිසර්ස් ඇසෝසියේෂන් යන සංගම් විසිනි. තරග විභාගයක් මගින් රියදුරු පුහුණුව සඳහා තෝරාගත් සිවිල් පිරිසට අමතරව යුධ හමුදා සාමාජිකයින් විසි දෙනෙකුට ද දුම්රිය රියදුරු පුහුණුව ලබා දීමට රජය ගත් තීරණයට විරෝධය පළ කරමින් ඔවුහු මෙම වර්ජනයට සූදානම් වූහ.
කෙසේ වෙතත්, ඊයේ රාත්රියේ විශේෂ ප්රවෘත්ති සාකච්ඡාවක් පවත්වමින් ප්රවාහන හා මහාමාර්ග නියෝජ්ය අමාත්ය වෛද්ය ප්රසන්න ගුණසේන මහතා සඳහන් කළේ යුධ හමුදා නිලධාරීන්ට අදාළ පුහුණුව ලබාදීමේ තීරණය තාවකාලිකව නතර කිරීමට පියවර ගත් බවයි. මෙවර අ.පො.ස. සාමාන්ය පෙළ විභාගයට මුහුණ දෙන ලක්ෂ හතරහමාරකට ආසන්න සිසුන් කිසිදු ප්රවාහන අපහසුතාවයකට පත් නොවිය යුතු බැවින්, වර්ජනයක් ඇතිවීම වළක්වා ගැනීමේ අරමුණින් මෙම තීරණය ගත් බව අමාත්යවරයා එහිදී අවධාරණය කළේය.
දුම්රිය රියදුරන්ගේ මෙම විරෝධය දැඩි සේ හෙළා දකින බව ප්රකාශ කළ නියෝජ්ය අමාත්යවරයා, මෑතකදී බලපෑ 'දිට්වා' සුළි කුණාටු තත්ත්වය හමුවේ දුම්රිය දෙපාර්තමේන්තුව යථා තත්ත්වයට පත් කිරීම සඳහා යුධ හමුදාව දැක්වූ සුවිශේෂී දායකත්වය එහිදී සිහිපත් කළේය. බේලි පාලම් ඉදිකිරීම, දුම්රිය මාර්ග පිළිසකර කිරීම මෙන්ම රත්මලාන වැඩපොළේ දුම්රිය එන්ජින් අලුත්වැඩියා කිරීම සඳහා ද මාස දෙකක පමණ කාලයක සිට යුධ හමුදා ඉංජිනේරුවන් ලබාදෙන සහයෝගය අගය කළ ඒ මහතා, හදිසි අවස්ථාවකදී ප්රයෝජනයට ගැනීම සඳහා හමුදා සාමාජිකයින් කණ්ඩායමකට මෙම වෘත්තීය පුහුණුව ලබාදීමට මුලින් තීරණය කළ බව වැඩිදුරටත් ප්රකාශ කළේය.