බ්රිතාන්යයේ ඔක්ස්ෆර්ඩ් සහ කේම්බ්රිජ් යන ලෝක ප්රකට විශ්වවිද්යාල සංගම් (Unions) විසින් ශ්රී ලංකා පොදුජන පෙරමුණේ පාර්ලිමේන්තු මන්ත්රී නාමල් රාජපක්ෂ මහතාගේ ප්රධානත්වයෙන් පැවැත්වීමට නියමිතව තිබූ දේශන සහ සාකච්ඡා සම්පූර්ණයෙන්ම අවලංගු කිරීමට පියවර ගෙන තිබේ. බ්රිතාන්යය පුරා විසිරී සිටින දෙමළ ශිෂ්ය සහ තරුණ සංවිධාන 22ක් විසින් එල්ල කරන ලද දැඩි විරෝධතා සහ සංවිධානය කර තිබූ දැවැන්ත උද්ඝෝෂණ මෙම තීරණයට ප්රධාන හේතුව වී ඇත.
කේම්බ්රිජ් විශ්වවිද්යාල සංගමයේ දේශනය පෙබරවාරි 27 වැනිදාටත්, ඔක්ස්ෆර්ඩ් සංගමයේ දේශනය පෙබරවාරි 23 සහ 25 යන දින ආශ්රිතවත් පැවැත්වීමට මුලින් සැලසුම් කර තිබිණි.නාමල් සිය බිරිය ඇතුළු පක්ෂ හිතවතුන් 25 දෙනෙකුගේ පිරිසක් සමග විශාල වියදමක් දරමින් මෙම බ්රිතාන්ය ගමන ගොස් තිබූ නමුත් ඔහුගේ දේශපාලන ප්රතිරූප ගොඩනැංවීමේ ප්රයත්නය මෙවර අසාර්ථකවී ඇති බවත් දේශන වෙනුවට බෞද්ධ විහාර කිහිපයකට ගොස් සිය පක්ෂපාතීන් හමුවී ඇති බවත් දේශපාලන විචාරකයින්ගේ අදහසවී තිබේ.ඔක්ස්ෆර්ඩ් සංගමයේ සභාපතිනි කැතරින් යැං (Katherine Yang) ඔවුන්ගේ ස්වාධීන ශිෂ්ය පුවත්පත වන 'Cherwell' වෙත ප්රකාශ කර තිබුණේ, මෙම මාතෘකාවට වඩාත්ම සම්බන්ධ ශිෂ්යයින්ට විවෘතව ප්රශ්න ඇසීමට තරම් ආරක්ෂිත පරිසරයක් නොමැති බව ඔවුන් දැන්වූ බැවින් මෙම තීරණය ගත් බවයි. ඍජු සහ විවෘත ප්රශ්න කිරීම් වලට ඉඩ සැලසීම සිය සංගමයේ මූලික අරමුණක් වුවද, ප්රධාන පාර්ශ්වකරුවන්ට සමාන මට්ටමකින් ඊට සහභාගී වීමට නොහැකි නම් අපේක්ෂිත ශක්තිමත් විවාදයක් ගොඩනැගිය නොහැකි බව ඇය පෙන්වා දුන්නාය. මීට දින කිහිපයකට පෙර කේම්බ්රිජ් සංගමය ද සිය දේශනය අවලංගු කරමින් ප්රකාශ කළේ, වත්මන් තත්ත්වය යටතේ මෙම මාතෘකාව පිළිබඳව තුලිත සහ විවෘත සාකච්ඡාවක් පැවැත්විය නොහැකි බවයි.
කෙසේ වෙතත්, තම සංවිධානය කිසිදු කථිකයෙකුගේ ක්රියාකලාපයන් හෝ විශ්වාසයන් අනුමත කිරීමක් මින් අදහස් නොවන බවද ඔවුන් අවධාරණය කර ඇත. මීට අමතරව කේම්බ්රිජ් සංගමය පසුගියදා ප්රංශ අගමැති ගේබ්රියෙල් අටාල්ගේ සාකච්ඡාවක්ද කල්දැමූ අතර, අන්ත දක්ෂිණාංශික මාධ්යවේදිනී කේටී හොප්කින්ස්ගේ ප්රකාශද දැඩිව හෙළා දැක තිබුණි.
ඔක්ස්ෆර්ඩ් සහ කේම්බ්රිජ් දෙමළ සංගම් මෙන්ම බ්රිතාන්යයේ දෙමළ තරුණ සංවිධානය (TYOUK), Phoenix TNG සහ Tamil Solidarity ඇතුළු සංවිධාන විසින් ඒකාබද්ධ නිවේදනයක් නිකුත් කරමින් සඳහන් කර ඇත්තේ, දෙමළ ජනතාවට එරෙහිව සිදුවූ බව කියන ජන සංහාරයකට ඍජුවම සම්බන්ධ දේශපාලන පවුලක සාමාජිකයෙකුට මෙලෙස වේදිකාවක් ලබාදීම දෙමළ ජනතාවට කරන බරපතල අපහාසයක් බවයි. මෙම සංවිධාන ඉදිරිපත් කරන සංඛ්යාලේඛනවලට අනුව, 1956 සහ 2009 අතර කාලය තුළ ශ්රී ලංකා ආරක්ෂක අංශ විසින් දෙමළ සිවිල් වැසියන් ඉලක්ක කර ගනිමින් සමූලඝාතන 100 කට වඩා සිදු කර ඇති අතර, එහිදී අවම වශයෙන් පුද්ගලයින් 150,000 ක් මියගොස් තවත් දස දහස් ගණනක් බලහත්කාරයෙන් අතුරුදන් කර ඇත. විශේෂයෙන්ම 2009 යුද්ධයේ අවසන් සමයේ මුල්ලිවායික්කාල් හි 'යුද මුක්ත කලාප' සහ රෝහල් ඉලක්ක කරමින් ෂෙල් වෙඩි ප්රහාර එල්ල කිරීම, සංවිධානාත්මක ලිංගික හිංසනය සහ දෙමළ සංස්කෘතික උරුමයන් මකා දැමීම ඔවුන් දැඩිව විවේචනය කර තිබේ. එම අවධියේ ආරක්ෂක ලේකම්වරයාව සිටි ඔහුගේ මාමා විසින්, එම ප්රදේශවල සිටි සියලුම සිවිල් වැසියන් එල්.ටී.ටී.ඊ සංවිධානයේ හිතවතුන් බවත්, රෝහල් නීත්යානුකූල ඉලක්ක බවත් පවසමින් එම ක්රියාවන් සාධාරණීකරණය කළ බවද මෙම නිවේදනයේ වැඩිදුරටත් දැක්වේ.
හිටපු ජනාධිපති මහින්ද රාජපක්ෂගේ පුත්රයා සහ හිටපු ජනාධිපති ගෝඨාභය රාජපක්ෂගේ ඥාති පුත්රයා වන නාමල් රාජපක්ෂ මහතා, තම පවුලේ ක්රියාකලාපයන් සහ එහි මුක්තිය දැඩිව ආරක්ෂා කරන්නෙකු බව විරෝධතාකරුවන්ගේ චෝදනාවයි. මීට අමතරව නාමල් රාජපක්ෂ මහතාට එරෙහිව දූෂණ සහ මුදල් විශුද්ධිකරණය සම්බන්ධයෙන් 2016 වසරේදී අත්අඩංගුවට පත්වීම (ඔහු තවමත් ඇප මත මුදා හැර ඇත), ශ්රී ලංකා රග්බි ක්රීඩක වසීම් තාජුඩීන්ගේ මරණය සම්බන්ධයෙන් වන පරීක්ෂණවලට පැටලී සිටීම සහ ඔහුගේ නීති විභාගයන්හිදී අයුතු සහන ලබාගත් බවට වන චෝදනා ද එල්ල වී ඇති අතර ඔහු ඒවා තරයේ ප්රතික්ෂේප කරයි. ඔහුගේ පියා වන මහින්ද රාජපක්ෂ මහතාට ද මුදල් විශුද්ධිකරණය, මාධ්යවේදියෙකු පැහැරගෙන ගොස් පහරදීම, මාධ්ය නිදහස සීමා කිරීම වැනි චෝදනා එල්ල වී තිබේ. මෙම උත්සව අවලංගු කරන ලෙසත්, බ්රිතාන්යයේ දෙමළ ප්රජාවගෙන් සමාව ගන්නා ලෙසත්, යුද අපරාධ සහ මානව හිමිකම් උල්ලංඝනය කිරීම් සම්බන්ධයෙන් චෝදනා ලැබූවන්ට වේදිකාවක් ලබා නොදීමේ ප්රතිපත්තියක් අනුගමනය කරන ලෙසත් අදාළ ශිෂ්ය සංවිධාන මෙම විශ්වවිද්යාල සංගම්වලින් ඉල්ලා ඇත.
මෙම විරෝධතා මධ්යයේ වුවද, නාමල් රාජපක්ෂ මහතා මේ වන විටත් ඔහුගේ සමීපතමයින් 25 කට වැඩි පිරිසක් සමග එක්සත් රාජධානියට පැමිණ ඇති අතර, ලන්ඩන් නුවරදී සිංහල බෞද්ධ සංවිධාන සහ භික්ෂූන් වහන්සේලා කණ්ඩායම් දෙකක් මුණගැසී ඇති බව සමාජ මාධ්ය හරහා වාර්තා වේ. ඔහුට එල්ල වන විරෝධතා සම්බන්ධයෙන් අදහස් දක්වමින් ශ්රී ලංකා පොදුජන පෙරමුණේ දේශපාලන මණ්ඩල සභික සහ යාපනය දිස්ත්රික් ප්රධාන සංවිධායක ගීතනාත් කැසිලිංගම් ප්රකාශ කර ඇත්තේ, විශ්වවිද්යාල යනු විවෘත සංවාදයන් සඳහා වන ස්ථානයක් මිස අදහස් ප්රකාශ කිරීමේ නිදහස අවහිර කරන තැනක් නොවන බවයි. නාමල් රාජපක්ෂ මහතා එහි පැමිණියේ සෘජුවම ප්රශ්නවලට අවංකව පිළිතුරු දීමට සහ අනාගත පරපුරට බෙදීම්වලින් ඔබ්බට ගොස් සංවාදය තුළින් ශක්තිමත් ශ්රී ලංකාවක් ගොඩනැගීමට බව ඔහු වැඩිදුරටත් පෙන්වා දුන්නේය.
2010 වසරේදීද ඔක්ස්ෆර්ඩ් සංගමය විසින් එවකට ජනාධිපති මහින්ද රාජපක්ෂ මහතාට කළ ආරාධනාවක් මෙලෙසම දැවැන්ත විරෝධතා සහ ආරක්ෂක හේතූන් මත අවසන් මොහොතේ අවලංගු කෙරුණු අතර, 2008 වසරේදීද ඔහුගේ පැමිණීමක් සම්බන්ධයෙන් මෙවැනිම ආන්දෝලනාත්මක තත්ත්වයක් හටගෙන තිබුණි. ඔක්ස්ෆර්ඩ් හි පලස්තීනය සඳහා වන ක්රියාකාරී කමිටුවේද (OA4P) සහාය ඇතිව තවදුරටත් මෙම විරෝධතා ව්යාපාර ක්රියාත්මක වෙමින් පවතී.
විරෝධතාකරුවන් ලියා තිබූ ලිපිය පහතින්
