වත්මන් රජය රටේ දැනට ඉතිරිව පවතින රාජ්ය සේවයේ ගුණාත්මකභාවය විනාශ කරමින් සුදුසුකම් සහ පළපුරුද්දක් නොමැති දේශපාලන හිතවතුන් සහ පක්ෂ සාමාජිකයින් එම තනතුරු සඳහා ආදේශ කරමින් සිටින බවට හිටපු ජනාධිපතිනි චන්ද්රිකා බණ්ඩාරනායක කුමාරතුංග මහත්මිය දැඩි ලෙස චෝදනා කරයි. සිය නිල ෆේස්බුක් ගිණුමෙහි විශේෂ සටහනක් තබමින් ඇය පෙන්වා දෙන්නේ වෘත්තීය මට්ටමේ රාජ්ය සේවයක සහාය නොමැතිව රජයක් පවත්වාගෙන යාම අසීරු කරුණක් බවයි.
දශක දෙකක් තිස්සේ පැවති අයහපත් පාලනය හේතුවෙන් රට දැඩි අර්බුදයකට ලක්ව ඇති බවත්, පවතින පාලන රටාව වෙනස් නොකළහොත් රට සම්පූර්ණ අරාජිකත්වයක් කරා ගමන් කරනු ඇති බවත් ඇය අනතුරු අඟවා සිටී.හිටපු ජනාධිපති රනිල් වික්රමසිංහ මහතාගේ විදෙස් සංචාරයක් සඳහා මුදල් අනුමත කිරීමේ සිද්ධියකට අදාළව මේ වන විට රක්ෂිත බන්ධනාගාරගත කර සිටින හිටපු ජනාධිපති ලේකම් සමන් ඒකනායක මහතා පිළිබඳව ද ඇය සිය සටහන මගින් විශේෂ අවධානයක් යොමු කර ඇත. තමා සමඟ ද සමීපව කටයුතු කර ඇති සමන් ඒකනායක මහතා අතිශය අවංක මෙන්ම ඉහළ වෘත්තීය නිපුණත්වයක් සහිත රාජ්ය නිලධාරියෙකු බව ඇය සහතික වෙයි. දේශපාලන නායකයින්ට දීර්ඝ කාලීන පළපුරුද්දක් අත්යවශ්ය නොවූවත් ඔවුන්ට නොසැලෙන අඛණ්ඩතාවක් තිබිය යුතු බවත්, ක්රියාකාරී ප්රජාතන්ත්රවාදයක් තුළ රට පාලනය කිරීම සඳහා දේශපාලන නායකයින් වෘත්තීය රාජ්ය සේවයක් මත යැපෙන බවත් හිටපු ජනාධිපතිනිය පෙන්වා දෙයි.
යුක්තිය පසිඳලීම තෝරාගත් පිරිසකට පමණක් සීමා වීම ශ්රී ලංකා රාජ්යයේ අත්තිවාරමටම බලපාන බරපතළ ගැටලුවක් බව "Vox Civis" විසින් රචිත ලිපියක් උපුටා දක්වමින් ඇය සඳහන් කරයි. පසුගිය සමයේ රට තුළ නිර්මාණය වූ "අරගලය" වැනි මහජන නැගිටීම් පවා සිදු වූයේ රටේ පාලනය පත්ව ඇති ඛේදජනක තත්ත්වය ජනතාව විසින් නිවැරදිව වටහා ගත් නිසා බව ඇය සිහිපත් කරයි. ශ්රී ලාංකික පුරවැසියන්ගේ දේශපාලන සාක්ෂරතාව ඉහළ මට්ටමක පවතින බව පවසන ඇය, පවතින තත්ත්වයෙන් රට මුදා ගැනීම සඳහා ජනතාව ප්රශ්න කළ යුතු බවත්, ප්රජාතන්ත්රවාදීව තීරණ ගනිමින් ජාතිය ගොඩනැගීමට දායක විය යුතු බවත් අවධාරණය කර සිටී.
