බංග්ලාදේශයේ පැවති මහ මැතිවරණයෙන් බංග්ලාදේශ ජාතිකවාදී පක්ෂය (BNP) විශිෂ්ට ජයග්රහණයක් ලබා ගනිමින් වසර 20කට පමණ පසු යළිත් බලයට පත්වීමට සූදානම් වේ. ආසන 299කින් සමන්විත පාර්ලිමේන්තුවේ බහුතරය සඳහා ආසන 150ක් අවශ්ය වන අතර, මේ වන විට ප්රකාශිත ප්රතිඵල අනුව BNP ප්රමුඛ සන්ධානය ආසන 212ක් දිනාගෙන ඇත.
ජමාත්-ඉ-ඉස්ලාමි සංවිධානය ප්රමුඛ පක්ෂ 11ක සන්ධානයට ලබාගත හැකිව ඇත්තේ ආසන 77ක් පමණි. BNP පක්ෂයේ නායක තාරික් රහ්මාන් ඔහු තරග කළ ආසන දෙකම ජයග්රහණය කර ඇති අතර, ඔහු බංග්ලාදේශයේ මීළඟ අග්රාමාත්යවරයා බවට පත්වීම මේ වන විට තහවුරු වී තිබේ.මෙම මැතිවරණ ප්රතිඵලයත් සමඟ බංග්ලාදේශ දේශපාලනයේ දශක හතරකට ආසන්න කාලයක් පැවති කාන්තා ආධිපත්යය නිමාවට පත්වේ. 1988 වසරේදී කාසි සාෆර් අහමඩ්ගෙන් පසුව එරට අග්රාමාත්ය ධූරයට පත්වන ප්රථම පිරිමියා බවට තාරික් රහ්මාන් පත්වනු ඇත. 1991 සිට 2024 දක්වා කාලය තුළ ෂීක් හසීනා සහ ඛලීඩා සියා යන නායිකාවන් දෙදෙනා පමණක් රට පාලනය කළහ. මෙවර මැතිවරණයේදී විශේෂයෙන්ම හින්දු ජාතිකයන් ඇතුළු අවාමි ලීගයේ සාම්ප්රදායික ඡන්දදායකයින්ගේ සහාය BNP පක්ෂය වෙත හැරී ඇති බව දේශපාලන විචාරකයෝ පෙන්වා දෙති. 1971 විමුක්ති සංග්රාමයට එරෙහිවීමේ අතීතය හේතුවෙන් ජමාත්-ඉ-ඉස්ලාමි පක්ෂය ජනතාව විසින් ප්රතික්ෂේප කර ඇති අතර, ෂීක් හසීනාගේ රජය පෙරළා දැමීමට මූලික වූ ශිෂ්යයන්ගේ ජාතික පුරවැසි පක්ෂයද (NCP) දරුණු පරාජයකට ලක්ව තිබේ. එහි නායක නාහිඩ් ඉස්ලාම් ඩකා-15 ආසනය ජයගනු ලැබුවේ වැඩි ඡන්ද 2,039ක ඉතා සුළු පරතරයකිනි.
හිටපු අග්රාමාත්ය ෂීක් හසීනාගේ ප්රබල බලකොටුවක් ලෙස සැලකෙන ගෝපාල්ගන්ජ් දිස්ත්රික්කයේ ආසන තුනම ජයග්රහණය කිරීමට BNP පක්ෂය සමත්වීම කැපී පෙනෙන සිදුවීමකි. ඊට අමතරව කුල්නා, සිල්හෙට්, චිතගොං සහ තාකුර්ගන්ජ් යන ප්රදේශවලද ඔවුන් සිය බලය තහවුරු කරගෙන ඇත. ජයග්රහණයෙන් පසු අදහස් දක්වමින් BNP නායකයින් ප්රකාශ කර ඇත්තේ ෂීක් හසීනා ඉන්දියාවේ සිට නැවත බංග්ලාදේශයට ගෙන්වාගෙන ඇයට එරෙහිව නීතිය ක්රියාත්මක කළ යුතු බවයි. කෙසේ වෙතත්, ෂීක් හසීනා මෙම මැතිවරණය මුළුමනින්ම ව්යාජ සහ කලින් සැලසුම් කළ එකක් බවට චෝදනා කරමින් පවසා ඇත්තේ, අවාමි ලීගයේ සහභාගීත්වයෙන් තොරව පැවැත්වූ මෙය ජනතාව රැවටීමක් බවයි.
මැතිවරණ දිනයේදී ඇතැම් ප්රදේශවල ප්රචණ්ඩ ක්රියා වාර්තා වූ අතර, කුල්නා ප්රදේශයේදී ජමාත්-ඉ-ඉස්ලාමි ආධාරකරුවන් සමඟ ඇතිවූ ගැටුමකින් BNP නායකයෙකු ජීවිතක්ෂයට පත්විය. මීට අමතරව ගෝපාල්ගන්ජ් සහ මුන්ෂිගන්ජ් ප්රදේශවල බෝම්බ ප්රහාර කිහිපයක්ද එල්ල වී තිබේ. කෙසේ වෙතත්, මෙවර මැතිවරණයේදී 59.44%ක ඡන්ද ප්රතිශතයක් වාර්තා වී ඇති අතර එය පසුගිය මැතිවරණයට වඩා 17%ක කැපී පෙනෙන වර්ධනයකි. මැතිවරණයට සමගාමීව පැවැත්වූ ව්යවස්ථා සංශෝධන ජනමත විචාරණයේදී 68.06%ක බහුතරයක් ඊට පක්ෂව ඡන්දය ප්රකාශ කර ඇත. මේ හරහා අග්රාමාත්යවරයෙකුට බලයේ සිටිය හැකි උපරිම කාලය වසර 10කට සීමා කිරීම, අග්රාමාත්යවරයා පක්ෂ නායකත්වයෙන් ඉවත් කිරීම සහ පාර්ලිමේන්තුව මණ්ඩල දෙකකින් යුක්තව ස්ථාපිත කිරීම ඇතුළු ප්රතිසංස්කරණ රැසක් ක්රියාත්මක වනු ඇත.
තාරික් රහ්මාන්ගේ ජයග්රහණය වෙනුවෙන් ජාත්යන්තර ප්රජාවෙන් මේ වන විටත් උණුසුම් සුබපැතුම් ගලා එමින් පවතී. ඉන්දීය අග්රාමාත්ය නරේන්ද්ර මෝදි දුරකථනයෙන් කතා කරමින් සිය සුබපැතුම් එක් කළ අතර, බටහිර බෙංගාල මහඇමතිනී මමතා බෙනර්ජි ඔහුව "තම සහෝදරයා" ලෙස හඳුන්වමින් සුබපැතා ඇත. මීට අමතරව චීනය, අමෙරිකා එක්සත් ජනපදය සහ පකිස්ථානය යන රටවල්ද නව රජයට සිය සුබපැතුම් සහ සහයෝගය පළ කර තිබේ. විශේෂයෙන්ම චීනය සහ පකිස්ථානය බංග්ලාදේශය සමඟ වෙළෙඳ, ආරක්ෂක සහ සංස්කෘතික සබඳතා තවදුරටත් ශක්තිමත් කර ගැනීමට බලාපොරොත්තු වන බව ප්රකාශ කර ඇත.
මේ අතර, ණය වංචා සම්බන්ධයෙන් ශ්රේෂ්ඨාධිකරණයේ පවතින නඩු කටයුතු හේතුවෙන් චිතගොං-2 සහ චිතගොං-4 යන ආසන දෙකෙහි නිල ප්රතිඵල නිකුත් කිරීම මැතිවරණ කොමිසම විසින් තාවකාලිකව අත්හිටුවා තිබේ. ජාතික පුරවැසි පක්ෂය (NCP) මැතිවරණ ප්රතිඵල සම්බන්ධයෙන් චෝදනා කරමින් පවසන්නේ ඡන්ද ගණනය කිරීමේදී BNP අපේක්ෂකයින්ට වාසි වන අයුරින් අක්රමිකතා සිදුව ඇති බවයි. කෙසේ වෙතත්, ලබාගත් විශිෂ්ට ජයග්රහණය සම්බන්ධයෙන් කිසිදු අයුරකින් සැමරුම් පෙළපාලි හෝ උත්සව නොපවත්වන ලෙසත්, සන්සුන්ව කටයුතු කරන ලෙසත් අනාගත අග්රාමාත්ය තාරික් රහ්මාන් සියලුම පාක්ෂිකයින්ට දැඩි ලෙස උපදෙස් දී තිබේ.
