ඉරානයේ දිනෙන් දින ඉහළ යන ජීවන වියදමට සහ ආර්ථික පීඩනයට එරෙහිව හටගෙන ඇති දැවැන්ත ජනතා විරෝධතා මේ වන විට එරට නගර 100කට අධික සංඛ්යාවක් පුරා ව්යාප්ත වී තිබේ. දෙසැම්බර් 28 වැනිදා ආරම්භ වූ මෙම විරෝධතා මාලාව දින 13ක් පුරා අඛණ්ඩව ක්රියාත්මක වන අතර, බ්රහස්පතින්දා දිනයේදී තත්ත්වය වඩාත් උත්සන්න වී ඇති බව විදෙස් මාධ්ය වාර්තා කරයි.
ආරක්ෂක අංශ සහ විරෝධතාකරුවන් අතර ඇති වූ ගැටුම් හේතුවෙන් මේ වන විට කුඩා දරුවන් 8 දෙනෙකු ඇතුළුව පුද්ගලයින් 45 දෙනෙකු මියගොස් ඇති බව ඇමරිකානු මානව හිමිකම් ආයතන තහවුරු කරයි.විරෝධතා මැඩපැවැත්වීම සඳහා ඉරාන රජය විසින් දැඩි පියවර ගනිමින් සිටින අතර, රට පුරා අන්තර්ජාල සහ දුරකථන සේවා මුළුමනින්ම පාහේ අත්හිටුවා තිබේ. තෙහෙරාන් ගුවන්තොටුපළ වසා දමා ඇති අතර හමුදාව ද දැඩි සීරුවෙන් තබා ඇති බව වාර්තා වේ. උද්ඝෝෂණ අතරතුර එක් පොලිස් නිලධාරියෙකු පිහියෙන් ඇන ඝාතනය කර ඇති අතර, තවත් පොලිස් නිලධාරියෙකුට වෙඩි තබා ඇත. මේ වන විට පුද්ගලයින් 2,270කට අධික පිරිසක් ආරක්ෂක අංශ භාරයට ගෙන ඇති බව සඳහන් වේ.
රට පුරා වීදි බැස සිටින ජනතාව මාර්ග අවහිර කරමින් සහ ගිනි තබමින් දැඩි විරෝධයක් පළ කරන අතර, "ඛමේනිට මරණය" සහ "ඉස්ලාමීය ජනරජය අවසන්" වැනි සටන් පාඨ කියමින් රජයට අභියෝග කරති. විශේෂයෙන්ම පිටුවහල්ව සිටින ඉරානයේ ඔටුන්න හිමි කුමරු වන රේසා පහලවි හට සහාය පළ කරන විරෝධතාකරුවන්, ෂා පාලනය නැවත පැමිණිය යුතු බව පවසමින් හඬ නගන අයුරු දැකගත හැකිය. රේසා පහලවි විසින් ජනතාවට වීදි බසින ලෙස කළ ඉල්ලීමත් සමඟ විරෝධතා වඩාත් තීව්ර වී ඇති අතර, ඇමරිකානු ජනාධිපති ඩොනල්ඩ් ට්රම්ප් ද ප්රකාශ කර ඇත්තේ විරෝධතාකරුවන් ඝාතනය කළහොත් ඉරානයට එරෙහිව ප්රහාර එල්ල කරන බවයි.
මෙම ජනතා නැගිටීමට මූලික හේතුව වී ඇත්තේ ඉරානය මුහුණ දී සිටින දරුණු ආර්ථික අර්බුදයයි. ඉරාන මුදල් ඒකකය වන රියාල් හි අගය ඩොලරයට සාපේක්ෂව මිලියන 1.45ක් දක්වා ඓතිහාසික ලෙස පහත වැටී ඇති අතර, ආහාර ද්රව්ය මිල 72%කින් සහ ඖෂධ මිල 50%කින් ඉහළ ගොස් ඇත. මීට අමතරව 2026 අයවැයෙන් බදු 62%කින් ඉහළ දැමීමට රජය යෝජනා කිරීම ජනතාවගේ දැඩි කෝපයට හේතු වී තිබේ.
වසර 47ක ආගමික පාලනයෙන් හෙම්බත් වී සිටින තරුණ පරම්පරාව සහ සාමාන්ය ජනතාව වත්මන් පාලන තන්ත්රය වෙනස් විය යුතු බව දැඩිව විශ්වාස කරති. අන්තර්ජාල සේවා අත්හිටුවා තිබුණ ද, ඊලොන් මස්ක්ගේ ස්ටාර්ලින්ක් (Starlink) චන්ද්රිකා අන්තර්ජාල සේවාව හරහා ඇතැම් පිරිස් විරෝධතා දර්ශන ලෝකයට මුදා හරිමින් සිටිති. ස්වීඩනය සහ බෙල්ජියම වැනි රටවල නායකයින් ද ඉරාන ජනතාවගේ මෙම අරගලයට සහාය පළ කරමින් ප්රකාශ නිකුත් කර ඇත.
