2026 ජනවාරි මස 03 වැනි දින, වෙනිසියුලාවේ අගනුවර වන කරාකස් නුවර ඉලක්ක කර ගනිමින්, ඇමෙරිකානු හමුදාව විසින් මහා පරිමාණ ගුවන් හා හමුදා මෙහෙයුමක් දියත් කරනු ලැබීය. ඇමෙරිකාව සහ වෙනිසියුලාව අතර පැවති දීර්ඝකාලීන රාජ්යතාන්ත්රික අර්බුදය නව හා තීරණාත්මක මාවතකට රැගෙන ඒමක් ලෙස මෙම ක්රියාන්විතය සනිටුහන් විය.
මෙම මෙහෙයුමේ ප්රධානතම ප්රතිඵලය වූයේ වෙනිසියුලානු ජනාධිපති නිකොලස් මදුරෝ සහ ඔහුගේ බිරිඳ ඇමෙරිකානු හමුදා භාරයට පත්වීමයි. ඔවුන් වහාම ඇමෙරිකාවට ගෙන යන ලද අතර, දැනට නිව්යෝක් අධිකරණයක් හමුවේ මත්ද්රව්ය ජාවාරම් සහ නාර්කෝ-ත්රස්තවාදී (Narco-terrorism) චෝදනා යටතේ නඩු විභාගයකට මුහුණ දෙමින් සිටිති. මෙම සිදුවීමෙන් අනතුරුව ඇමෙරිකානු ජනාධිපති ඩොනල්ඩ් ට්රම්ප් දැඩි ප්රකාශයක් කරමින් කියා සිටියේ, විධිමත් බල හුවමාරුවක් සිදුවන තෙක් වෙනිසියුලාවේ පාලනය ඇමෙරිකාව විසින් මෙහෙයවනු ලබන බවයි. එරට බලධාරීන් ඇමෙරිකානු නියෝගවලට අවනත නොවන්නේ නම්, තවදුරටත් හමුදා ක්රියාමාර්ග ගැනීමට පසුබට නොවන බවද ඔහු අවධාරණය කළේය.මෙම හදිසි හමුදා මෙහෙයුම හේතුවෙන් සිදුවූ ජීවිත හානි සංඛ්යාව ඉහළ මට්ටමක පවතින බව විවිධ මූලාශ්ර වාර්තා කරයි. ඒ අනුව, පුද්ගලයන් 80 දෙනෙකු පමණ මෙහිදී ජීවිතක්ෂයට පත්ව ඇතැයි විශ්වාස කෙරේ. මියගිය අය අතර වෙනිසියුලානු හමුදා නිලධාරීන්, සිවිල් වැසියන් සහ ආරක්ෂක අංශ සාමාජිකයන් මෙන්ම, ජනාධිපති මදුරෝගේ ආරක්ෂාවට සහාය දුන් කියුබානු නිලධාරීන් 32 දෙනෙකුද සිටි බව තහවුරු වී තිබේ. මෙම ප්රහාරවලින් ඇමෙරිකානු හමුදා සාමාජිකයන් කිසිවෙකු මියගොස් නොමැති වුවද, ඇතැම් සෙබළුන් තුවාල ලබා ඇති බව වාර්තා වේ. ප්රහාරවල සම්පූර්ණ බලපෑම තක්සේරු කරන විට මරණ සංඛ්යාව තවදුරටත් ඉහළ යා හැකි බවටද විශ්වාස කෙරේ.
ට්රම්ප් පාලනාධිකාරිය මෙම හමුදා මැදිහත්වීම සාධාරණීකරණය කරන්නේ, එය මත්ද්රව්ය ජාවාරම මැඩලීමට සහ ඇමෙරිකානු ජාතික ආරක්ෂාව තහවුරු කිරීමට අත්යවශ්ය පියවරක් වූ බව පවසමිනි. කෙසේවෙතත්, වෙනිසියුලාවේ තෙල් සම්පත්වල පාලනය හා ප්රවේශය තහවුරු කර ගැනීමද මෙම මෙහෙයුමේ තවත් මූලික අරමුණක් වූ බව රහසක් නොවේ. මේ සම්බන්ධයෙන් අදහස් දක්වා ඇති ඇමෙරිකානු රාජ්ය ලේකම් මාර්කෝ රුබියෝ සඳහන් කර ඇත්තේ, වෙනිසියුලානු නායකත්වය තමන්ට අවනත කර ගැනීම සඳහා තෙල් සම්බාධක දිගටම පවත්වාගෙන යන බවයි. මෙම ක්රියාව විචාරකයින්ගේ දෝෂ දර්ශනයට ලක්ව ඇත්තේ "නව යටත් විජිතවාදයක්" ලෙසත්, සම්පත් සූරාකෑමේ අරමුණින් සිදුකළ ක්රියාවක් ලෙසත්ය.
මෙම ආක්රමණශීලී ක්රියාමාර්ගය ජාත්යන්තර ප්රජාවගේ දැඩි විවේචනයට සහ ආන්දෝලනයට තුඩු දී ඇත. ජාත්යන්තර නිරීක්ෂකයෝ පෙන්වා දෙන්නේ, මෙය ජාත්යන්තර නීතිය හා රාජ්යයන්ගේ ස්වෛරීභාවය බරපතල ලෙස උල්ලංඝනය කිරීමක් බවයි. විශේෂයෙන් රුසියාව සහ ඉරානය වැනි වෙනිසියුලාවේ මිත්ර රටවල් මෙය නීති විරෝධී ක්රියාවක් ලෙස හෙළා දැක තිබේ. එමෙන්ම, මෙම මැදිහත්වීම හරහා අනාගතයේදී වෙනත් රටවලටද මෙවැනිම අත්තනෝමතික බලපෑම් එල්ල වීමේ අවදානමක් පවතින බවට ඔවුන් අනතුරු අඟවයි. වෙනිසියුලාව මෙම සිදුවීම එක්සත් ජාතීන්ගේ ආරක්ෂක මණ්ඩලය හමුවට ගෙන ඒමට සූදානම් වන අතර, මෙම ක්රියාවලිය හේතුවෙන් කලාපීය අස්ථාවරත්වය, දිගුකාලීන සිවිල් ගැටුම් සහ මානුෂීය අර්බුද නිර්මාණය වීමේ දැඩි අවදානමක් මතුව තිබේ.
