සෞඛ්ය හා ජනමාධ්ය අමාත්ය වෛද්ය නලින්ද ජයතිස්ස මහතා, ආන්දෝලනාත්මක ඖෂධයක් මෙරටට ගෙන්වීම සම්බන්ධයෙන් තම කීර්තිනාමයට හානි වන අයුරින් අසත්ය තොරතුරු ප්රචාරය කළ බවට චෝදනා කරමින්, යූ ටියුබ් නාලිකා ක්රියාකරු ධර්මශ්රී කාරියවසම් මහතා වෙත රුපියල් බිලියනයක වන්දි මුදලක් ඉල්ලා නීතිඥ එන්තරවාසියක් යොමු කර තිබේ.
මෙම නීතිමය ක්රියාමාර්ගය, අමාත්යවරයාගේ නීතිඥ සම්පත් යාලෙවත්ත මහතා මාර්ගයෙන් පසුගිය දෙසැම්බර් 27 වැනිදා යොමු කෙරුණේ, අසත්ය හා අපහාසාත්මක කරුණු සමාජගත කරමින් මහජනතාව තුළ අනවශ්ය කැළඹීමක් ඇති කිරීමට කටයුතු කිරීම සම්බන්ධයෙනි.
ධර්මශ්රී කාරියවසම් මහතා විසින් සිය යූ ටියුබ් නාලිකාව ඔස්සේ, “ජීවිත බිලිගත් ඉන්දියානු ඖෂධයේ සැඟවුණු කතාව, නගරාධිපති බල්තසාර්ගේ ඥාතියා සහ අමාත්ය නලින්දගේ ආවරණය” යන මාතෘකාව යටතේ ප්රචාරය කර ඇති වීඩියෝවක් මගින් අමාත්යවරයාට මෙම චෝදනා එල්ල වී ඇති බව වාර්තා වේ. මාන් ෆාමසියුටිකල් ලිමිටඩ් (Maan Pharmaceutical Ltd) ආයතනය විසින් ඉන්දියාවේ නිෂ්පාදනය කරන ලද ඔන්ඩන්සෙට්රොන් (Ondansetron) එන්නත ඇතුළු ඖෂධ දහයක් පිළිබඳව මේ වන විටත් විධිමත් පරීක්ෂණයක් ක්රියාත්මක වන බවත්, එම ඖෂධය භාවිතයෙන් සංකූලතා වාර්තා වීම හේතුවෙන් ජාතික ඖෂධ නියාමන අධිකාරිය (NMRA) විසින් එය අත්හිටුවීමට පියවර ගෙන ඇති බවත් අමාත්යවරයාගේ නීතිඥවරයා විසින් පෙන්වා දී තිබේ.
එන්තරවාසියෙන් වැඩිදුරටත් චෝදනා කරන්නේ, ඉහත සඳහන් කරුණු කිසිවක් නොසලකා හරිමින්, අදාළ ඖෂධය ආනයනය කිරීම, එහි සැපයුම්කරු සමඟ කුමන්ත්රණය කිරීම සහ ඊට අදාළ ගැටලු වසන් කිරීම සම්බන්ධයෙන් අමාත්යවරයා සෘජුවම වගකිව යුතු බවට අසත්ය මතයක් එම වීඩියෝව හරහා නිර්මාණය කිරීමට උත්සාහ කර ඇති බවයි. එපමණක් නොව, කොළඹ නගරාධිපති ව්රායි කැලි බල්තසාර්ගේ පවුලේ සාමාජිකයන් සහ පීටීසී මෙඩිකල් අධ්යක්ෂවරුන් අතර සබඳතා ඇති බවට චෝදනා නගමින්, මෙම සිදුවීම පසුපස දේශපාලන අනුග්රහයක් පවතින බවට හැඟවීමටද එම යූ ටියුබ් නාලිකාව කටයුතු කර ඇතැයි අමාත්යවරයාගේ පාර්ශ්වය ප්රකාශ කරයි.
අමාත්ය නලින්ද ජයතිස්ස මහතා සිය නීතිඥවරුන් මාර්ගයෙන් අවධාරණය කරන්නේ, මෙවැනි අසත්ය හා අපහාසාත්මක අන්තර්ගතයන් ප්රචාරය කිරීම වහාම නතර කළ යුතු බවයි. මෙම ඉල්ලීම නොසලකා හරිමින් අසත්ය ප්රචාර දිගින් දිගටම සිදු කළහොත්, කිසිදු පූර්ව දැනුම් දීමකින් තොරව රුපියල් බිලියනයක වන්දි මුදල අය කර ගැනීම සඳහා නීතිමය ක්රියාමාර්ග ගන්නා බවද එම එන්තරවාසියේ පැහැදිලිව සඳහන් කර තිබේ.