අග්රාමාත්ය ආචාර්ය හරිනි අමරසූරිය මෙනවිය ඉලක්ක කරගනිමින් දියත් වී ඇති සංවිධානාත්මක මඩ ව්යාපාරය සහ පුද්ගලික අපහාස කිරීම් දැඩි පිළිකුලෙන් යුතුව හෙළා දකින බව විද්වතුන්, වෘත්තිකයන් සහ සිවිල් සමාජ ක්රියාකාරීන් පිරිසක් ඒකාබද්ධ නිවේදනයක් නිකුත් කරමින් කියා සිටී. අග්රාමාත්යවරියට එරෙහිව එල්ල වන මෙම ප්රහාරයන් ප්රජාතන්ත්රවාදී සමාජයක තිබිය යුතු ශිෂ්ටසම්පන්න බවේ සීමාවන් ඉක්මවා ගොස් ඇති බව පෙන්වා දෙන එම පිරිස, ජාතික හා ජාත්යන්තර මට්ටමෙන් පිළිගැනීමට ලක්වූ කාන්තා නායිකාවක් වන ඇය කෙරෙහි පවතින ස්ත්රී විරෝධී ඊර්ෂ්යාව සහ වෛරය මීට මූලික වී ඇති බව අවධාරණය කරති.
අධ්යාපන අමාත්යාංශය යටතේ නිකුත් වූ පාසල් පෙළපොතක සිදු වූ බරපතල දෝෂයක් මුල් කරගෙන මෙම විවේචන ආරම්භ වූ බව පිළිගන්නා එම පිරිස, එය පදනම් කරගෙන අගමැතිනියගේ පෞරුෂයට හානි වන අයුරින් සිදු කරන සංවිධානාත්මක ප්රහාරය විරෝධය පළ කිරීමේ සදාචාරාත්මක සීමාවන් උල්ලංඝනය කිරීමක් බවත්, එය කිසිසේත් අනුමත කළ නොහැකි බවත් පෙන්වා දෙයි. පටු දේශපාලනික සහ දෘෂ්ටිවාදාත්මක අරමුණු ඉටු කර ගැනීම සඳහා මෙම වෛරී ව්යාපාරය මෙහෙයවනු ලබන බවත්, කණගාටුවට කරුණක් ලෙස ඇතැම් පූජකවරුන් ද ඊට දායක වී ඇති බවත් අදාළ නිවේදනයේ වැඩිදුරටත් සඳහන් වේ.
ලොව ප්රථම අගමැතිනිය සහ ශ්රී ලංකාවේ ප්රථම ජනාධිපතිනිය වැනි මෙරට බිහි වූ කාන්තා දේශපාලන නායිකාවන් ද අතීතයේදී මෙවැනිම ස්ත්රී පුරුෂ භාවය මත පදනම් වූ නින්දා අපහාසවලට මුහුණ දුන් බව මෙම විද්වත් පිරිස සිහිපත් කර සිටිති. ප්රතිපත්තිමය අඩුපාඩු විවේචනය කිරීමටත්, නිලධාරීන් වගවීම සඳහා යොමු කිරීමටත් ජනතාවට ඇති ප්රජාතන්ත්රවාදී අයිතිය පිළිගන්නා අතරම, අගමැතිනියගේ ස්ත්රීභාවය ඉලක්ක කර ගනිමින් එල්ල වන පුද්ගලික සහ අපයෝජන මට්ටමේ ප්රහාර කිසිසේත් අනුමත කළ නොහැකි බව අත්සන් තැබූ පිරිස අවධාරණය කරති.
කෙසේ වෙතත්, රජය විසින් අදාළ පෙළපොත් දෝෂය පිළිගැනීම සහ ඒ පිළිබඳ පොලිස් පරීක්ෂණයක් පැවැත්වීමට තීරණය කිරීම ධනාත්මක පියවරක් ලෙස ඔවුහු අගය කරති. විරුද්ධවාදීන්ට ගරු කිරීම, බුද්ධිමත් දායකත්වය සහ විනීතභාවය තුළින් අගමැති හරිනි අමරසූරිය පාර්ලිමේන්තුව තුළ ආදර්ශවත් චරිතයක් ලෙස කටයුතු කර ඇති බව ද මෙහිදී පැසසුමට ලක් කර ඇත. මෙවැනි ස්ත්රී පුරුෂ භාවය මත පදනම් වූ සහ සමලිංගිකත්වයට එරෙහි ප්රහාර ප්රජාතන්ත්රවාදී සහ මානවවාදී වටිනාකම්වලට හානි කරන බැවින් ඒවා වහාම නතර කරන ලෙස ඉල්ලා සිටින අතර, මෙවැනි ප්රතිගාමී බලවේගවල ප්රචාරවලට නොරැවටෙන ලෙස මහජනතාවගෙන් ඉල්ලීමක් කෙරේ.
මෙම ඒකාබද්ධ ප්රකාශය සඳහා මහාචාර්ය ජයදේව උයන්ගොඩ, මහාචාර්ය ජගත් වීරසිංහ, ආචාර්ය ගාමිණී විජේසූරිය, ආචාර්ය රාධිකා කුමාරස්වාමි, ජනාධිපති නීතිඥ එම්.ඒ. සුමන්තිරන්, මහාචාර්ය උත්පලා ඒ. ජයවර්ධන, මහාචාර්ය අන්බහාන් ආරියදුරෙයි, මහාචාර්ය නීරා වික්රමසිංහ, මහාචාර්ය ෆර්සානා හනිෆා, මහාචාර්ය ප්රින්ස් ජෙයදේවන්, මහාචාර්ය විව්මාරි වැන්ඩර්පූටන්, මහාචාර්ය රොහාන් ප්රනාන්දු, මහාචාර්ය වසන්ත සෙනෙවිරත්න, මහාචාර්ය කාංචන එන්. රුවන්පුර යන අය මෙන්ම චරිත් ගුණවර්ධන, විදුර මුණසිංහ, සඳුන් තුඩුගල, ප්රියන්ති ප්රනාන්දු, භවානි ෆොන්සේකා, ජනහා සෙල්වරස්, ආචාර්ය මහේන්ද්රන් තිරුඅරංගන්, වෛද්ය අමාලි වෙදගෙදර, ආචාර්ය ත්යාගරාජා වරදාස්, ආචාර්ය අතුලසිරි සමරකෝන්, ආචාර්ය එස්. ජීවසුතන්, වෛද්ය කෞෂල්යා කුමාරසිංහ, ආචාර්ය දිලීප විතාරණ, ආචාර්ය සිතුමිණි රත්නමලලා, ආචාර්ය එස්. අරිවල්සාහන්, ආචාර්ය මරියදාස් ඇල්ෆ්රඩ්, ආචාර්ය එන්. වරතන්, ආචාර්ය කෞෂල්යා පෙරේරා, ආචාර්ය ක්රිස්ටල් බේන්ස්, නීතිඥ අර්මිසා ටෙගල්, වංගීස සුමනසේකර, ශ්රීන් අබ්දුල් සරූර්, සරලා එමානුවෙල්, හිරන්යද දේවසිරි, විමල් සාමිනාදන්, ඉංජිනේරු එම්. සූරියසේගරම්, ශිරානි මිල්ස්, වෛද්ය චූලනි කොඩිකාර, රොබට් කෲස්, රුකී ප්රනාන්දු, ආචාර්ය ප්රදීප් පීරිස්, මහාචාර්ය නෙලූෆර් ද මෙල්, මහාචාර්ය නිර්මාල් රංජිත් දේවසිරි, වෛද්ය රමේෂ් රාමසාමි, වෛද්ය සුසන්ත බස්නායක, වෛද්ය ශාමල කුමාර්, මහාචාර්ය පවිත්රා කෛලාසපති, ආචාර්ය මධුභාෂිනී රත්නායක, ආචාර්ය මොහොමඩ් ෆාසිල්, ආචාර්ය කේ.ඩී දුෂාන්ති ද සිල්වා, ඩීන් උයන්ගොඩ, නෙහාමා ජයවර්ධන, වී. කමලසිරි සහ මහාචාර්ය එම්.ඒ.එෆ්. ඉබ්රාහිම් යන පුද්ගලයින් 58 දෙනෙකු අත්සන් තබා ඇත.
