ඉරානයේ පවතින දැඩි රාජ්ය විරෝධි ක්රියා හා එම මර්දනය හමුවේ එරටට එරෙහිව භාවිතා කළ හැකි රහසිගත සහ යුධමය ක්රියාමාර්ග රැසක් පිළිබඳව ඇමෙරිකානු ආරක්ෂක දෙපාර්තමේන්තුවේ ඉහළ නිලධාරීන් විසින් ජනාධිපති ඩොනල්ඩ් ට්රම්ප් දැනුවත් කර තිබේ. මෙම හමුදාමය විකල්ප අතර දිගු දුර මිසයිල ප්රහාර එල්ල කිරීම ප්රධාන තැනක් ගන්නා අතර, සයිබර් මෙහෙයුම් සහ මනෝවිද්යාත්මක ක්රියාන්විත දියත් කිරීමේ හැකියාව පෙන්ටගන නිලධාරීන් විසින් පෙන්වා දී ඇති බව සී.බී.එස් ප්රවෘත්ති සේවය වෙත අදහස් දැක්වූ ආරක්ෂක අංශ ආරංචි මාර්ග තහවුරු කර ඇත.
සති තුනක් පුරා ඇදී යන රාජ්ය විරෝධී උද්ඝෝෂණවලදී පුද්ගලයන් 600කට අධික සංඛ්යාවක් ජීවිතක්ෂයට පත්ව ඇති බව මානව හිමිකම් කණ්ඩායම් පවසන පසුබිමක, ඉරානය සමඟ වාණිජ සබඳතා පවත්වන රටවල භාණ්ඩ සඳහා 25%ක තීරු බද්දක් පැනවීමට ද ට්රම්ප් පියවර ගෙන ඇත.ඉරාන විදේශ අමාත්යවරයා ටෙහෙරානය වොෂින්ටනය සමඟ සාකච්ඡා කිරීමට විවෘත බව ප්රකාශ කර තිබුණ ද, ඕනෑම යුධමය තත්ත්වයකට මුහුණ දීමට තමන් සූදානම් බව ඔහු අවධාරණය කර තිබේ. කෙසේ වෙතත්, ධවල මන්දිර මාධ්ය ලේකම් කැරොලයින් ලෙවිට් සඳහන් කර ඇත්තේ ඉරාන නිලධාරියෙකු ට්රම්ප්ගේ විශේෂ නියෝජිත ස්ටීව් විට්කොෆ් අමතා ඇති බවත්, ටෙහෙරානයේ ප්රසිද්ධ ස්ථාවරය සහ පෞද්ගලිකව ලබා දෙන පණිවිඩ අතර දැඩි වෙනසක් පවතින බවත් ය. අවශ්ය යැයි හැඟී ගියහොත් යුධමය ක්රියාමාර්ග ගැනීමට ජනාධිපතිවරයා පසුබට නොවන බව ඇය අනතුරු අඟවා ඇති අතර, යම් හෙයකින් අමෙරිකානු හමුදා ප්රතිචාරයක් සිදුවුවහොත් එය බොහෝ විට ගුවන් බලය යොදා ගැනීමක් විය හැකි බවත්, ඉරාන අණ දෙන ව්යුහයන් සහ සන්නිවේදන පද්ධති අඩාල කිරීම ඊට ඇතුළත් විය හැකි බවත් නිර්නාමිකව අදහස් දැක්වූ නිලධාරීන් පවසා ඇත.
මේ අතර, ඉරානයේ උත්තරීතර නායක අයතුල්ලා අලි කමේනි ඇමෙරිකාවට චෝදනා කරමින් සහ ඉරාන ජාතියේ ශක්තිය වර්ණනා කරමින් රාජ්ය අනුග්රහය ලත් රැලි පැවැත්වීමට කටයුතු කර ඇති අතර, විරෝධතාකරුවන් මර්දනය කිරීම දිගින් දිගටම සිදු කෙරේ. නොර්වේ පදනම් කරගත් ඉරාන මානව හිමිකම් කණ්ඩායම (IHRNGO) පෙන්වා දෙන්නේ මියගිය විරෝධතාකරුවන් සංඛ්යාව අවම වශයෙන් 648ක් පමණ වන බවත්, ඊට වයස අවුරුදු 18ට අඩු දරුවන් නව දෙනෙකු ද ඇතුළත් බවත් ය. බ්රහස්පතින්දා සවස සිට ක්රියාත්මක අන්තර්ජාල අවහිර කිරීම් හේතුවෙන් රට අභ්යන්තරයේ තොරතුරු තහවුරු කර ගැනීම සහ මාධ්ය වාර්තාකරණය අසීරු වී ඇති නමුත්, මරණ සංඛ්යාව මීට වඩා ඉහළ විය හැකි බවට අභ්යන්තර ආරංචි මාර්ග අනතුරු අඟවයි.
දරුණු ආර්ථික කඩාවැටීමක් සහ උද්ධමනයක් හමුවේ ආහාර මිල ගණන් 70%කින් පමණ ඉහළ ගොස් ඇති ඉරානයට, ට්රම්ප්ගේ නව තීරු බදු තීරණය තවදුරටත් දැඩි බලපෑමක් එල්ල කරනු ඇතැයි අපේක්ෂා කෙරේ. චීනය, ඉරාකය, එක්සත් අරාබි එමීර් රාජ්යය, තුර්කිය සහ ඉන්දියාව ඉරානයේ ප්රධාන වෙළෙඳ හවුල්කරුවන් වන අතර, මෙම නව සීමා කිරීම් හරහා භාණ්ඩ හිඟය සහ මිල ගණන් තවදුරටත් ඉහළ යා හැකි බව විශ්ලේෂකයෝ පෙන්වා දෙති. ඇමෙරිකාවේ පිටුවහල්ව වෙසෙන ඉරානයේ අවසන් ෂා රජුගේ පුත් රේසා පහලවි ද මෙම තත්ත්වය හමුවේ අදහස් දක්වමින් පවසා ඇත්තේ වත්මන් ඉරාන රජය නැවතත් සාකච්ඡා කිරීමට සූදානම් බව පවසමින් ලෝකය මුලා කිරීමට උත්සාහ කරන බවත්, විරෝධතාකරුවන්ගේ ජීවිත ආරක්ෂා කර ගැනීම සඳහා ට්රම්ප් පාලනය කඩිනමින් මැදිහත් විය යුතු බවත් ය.