පවතින අයහපත් කාලගුණ තත්ත්වය හේතුවෙන් දිවයිනේ දිස්ත්රික්ක රැසකින් නායයෑම් සහ ගංවතුර ආපදා වාර්තා වන අතර, ආපදා කළමනාකරණ මධ්යස්ථානය නිකුත් කළ නවතම දත්තවලට අනුව සිදුව ඇති මුළු මරණ සංඛ්යාව 366ක් දක්වා ඉහළ ගොස් තිබේ.
හඟුරන්කෙත, අගෝනාව ප්රදේශයේ පස් කන්දක් කඩා වැටීමෙන් අතුරුදන්ව සිටි පුද්ගලයින් සොයා අද දින සිදුකළ මෙහෙයුම්වලදී තවත් මළ සිරුරු 11ක් සොයාගෙන ඇති අතර, ඒ අනුව එම ස්ථානයෙන් හමුවූ මුළු සිරුරු ගණන 13ක් ලෙස සටහන් විය. මෙම සිරුරු මිහිදන් කිරීමට රැගෙන යන අවස්ථාවේදී සහ ආපදා සහන කටයුතු අතරතුර ප්රදේශයේ මහජන නියෝජිතයෙකු සහ නිලධාරීන් අතර යම් නොසන්සුන්කාරී තත්ත්වයක් ද හටගෙන තිබුණි.
මහනුවර, උඩුදුම්බර ගංගොඩ ප්රදේශයේ සිදුවූ නායයෑමකින් අතුරුදන් වූ එකම නිවසක පදිංචිව සිටි හත් දෙනෙකුගේ මළ සිරුරු සොයාගෙන ඇති අතර,
තවත් 23 දෙනෙකු පමණ අතුරුදන්ව ඇති බව වාර්තා වේ. එසේම කුරුණෑගල ඉඳුල්ගොඩ කන්ද නායයෑමෙන් අතුරුදන් වූවන් සොයා තවදුරටත් මෙහෙයුම් ක්රියාත්මක වන අතර, ඉන් පුද්ගලයින් 09 දෙනෙකුගේ සිරුරු ගොඩගෙන ඇති බවත් ඉන් තිදෙනෙකු එකම පවුලේ සාමාජිකයින් බවත් තහවුරු වී ඇත.
කුරුණෑගල දිස්ත්රික්කයේ පන්නල, මාකඳුර ප්රදේශයේ පිහිටි වැඩිහිටි නිවාසයක් මා ඔය පිටාර ගැලීම හේතුවෙන් ජලයෙන් යටවී ඇති අතර, එම හදිසි ආපදාවෙන් එහි සිටි වැඩිහිටියන් 12 දෙනෙකු ජීවිතක්ෂයට පත්ව තිබේ. ප්රදේශවාසීන් විසින් තවත් පිරිසක් බේරා ගැනීමට කටයුතු කර තිබූ අතර, වසර 51කට පමණ පසු මෙම ප්රදේශයට මෙවැනි දරුණු ගංවතුර තත්ත්වයක් ඇති වූ බව ප්රදේශවාසීහු පවසති.
ආපදා කළමනාකරණ මධ්යස්ථානයේ දත්තවලට අනුව වැඩිම මරණ සංඛ්යාව වන මරණ 88ක් මහනුවර දිස්ත්රික්කයෙන් වාර්තා වන අතර, නුවරඑළිය දිස්ත්රික්කයෙන් මරණ 75ක් සහ බදුල්ල දිස්ත්රික්කයෙන් මරණ 71ක් වාර්තා වී තිබේ. දිවයින පුරා පවුල් 316,366කට අයත් පුද්ගලයින් ලක්ෂ 11කට අධික පිරිසක් පීඩාවට පත්ව ඇති අතර, ආරක්ෂිත ස්ථාන 1,564ක පුද්ගලයින් 218,526 දෙනෙකු රඳවා සිටින බව බලධාරීහු සඳහන් කරති.
ජාතික ගොඩනැගිලි පර්යේෂණ සංවිධානය විසින් දිස්ත්රික්ක 07ක ප්රාදේශීය ලේකම් කොට්ඨාස 70ක් සඳහා නිකුත් කර තිබූ නායයෑම් රතු නිවේදන තවදුරටත් දීර්ඝ කර තිබේ. අධික වර්ෂාව හේතුවෙන් පස ජලයෙන් සංතෘප්ත වී ඇති බැවින් වර්ෂාව නතර වුවද නායයෑම්,
ගල් පෙරළීම් සහ කඳු කඩා වැටීම් සිදුවිය හැකි බවත්, බලධාරීන් විසින් ආරක්ෂිත යැයි තහවුරු කරන තුරු නැවත නිවෙස් වෙත නොයන ලෙසත් එම සංවිධානය ජනතාවගෙන් ඉල්ලා සිටී.
නායයෑම් සහ පස් කඳු කඩා වැටීම් හේතුවෙන් ප්රධාන මාර්ග රැසක ගමනාගමනයට බාධා එල්ල වී ඇති අතර මහනුවර - මහියංගනය රජමාවත ස්ථාන 04කින් මුළුමනින්ම අවහිර වී තිබේ. හැටන් - කොළඹ ප්රධාන මාර්ගයේ හැටන්, ශැනන්, වටවල, දියගල සහ කළුගල යන ස්ථානවලට පස් කඳු කඩා වැටීමෙන් මාර්ග අවහිර වී ඇති අතර, යටියන්තොට, සීපොත් සහ බෙරන්නාව ඇතුළු ප්රදේශ රැසක මාර්ග අවහිර වීමෙන් ජනතාව දැඩි දුෂ්කරතාවට පත්ව සිටිති.
ආපදා තත්ත්වය මධ්යයේ කොත්මලේ වේල්ල කැඩී යන බවට සමාජ මාධ්ය ඔස්සේ අසත්ය ප්රචාර පැතිරවීම හේතුවෙන් ජනතාව දැඩි ලෙස නොසන්සුන් වූ බවත්, මෙවැනි අසත්ය ප්රවෘත්ති නිර්මාණය කරන්නන්ට එරෙහිව දැඩි නීතිමය ක්රියාමාර්ග ගන්නා බවත් පොලිසිය අවධාරණය කරයි. මේ සම්බන්ධයෙන් අපරාධ පරීක්ෂණ දෙපාර්තමේන්තුව විසින් විමර්ශන ආරම්භ කර ඇත.
රජය විසින් ආපදාවට ලක්වූ නිවාස පිරිසිදු කරගැනීම සඳහා හිමිකාරීත්වය නොසලකා රුපියල් 10,000ක අත්තිකාරම් දීමනාවක් ලබා දීමට තීරණය කර ඇති අතර ඊට අදාළ චක්රලේඛ නිකුත් කර තිබේ. මේ අතර කොළඹ වරායේ පවතින තත්ත්වය මත ගෑස් මෙට්රික් ටොන් 3955ක් රැගත් නෞකාවක් හම්බන්තොට වරාය වෙත යොමු කර ගෑස් ගොඩබෑමේ කටයුතු සිදු කිරීමට බලධාරීන් පියවර ගෙන ඇත.
Comments
Post a Comment
Your comment will be visible after approval