ඩබල් ගේම් ගැසූ ලෝයර් අධිකරණයේදී වරද පිළිගනී

වෘත්තීය විෂමාචාරයකට අදාළ චෝදනාවකට ශ්‍රේෂ්ඨාධිකරණය හමුවේ වරද පිළිගැනීමෙන් අනතුරුව, නීතිඥවරයෙකු දැඩි අවවාදයක් මත මුදා හැරීමට ශ්‍රේෂ්ඨාධිකරණය ඊයේ (19) නියෝග කළේය. නීති වෘත්තියේ අඛණ්ඩතාව සහ යුක්තිය පසිඳලීමේ ක්‍රියාවලිය අවතක්සේරු කෙරෙන ආකාරයේ හැසිරීම්වලින් වැළකී අනාගතයේදී වඩාත් සැලකිලිමත්ව කටයුතු කරන ලෙස අධිකරණය මෙහිදී අදාළ නීතිඥවරයාට තරයේ අවවාද කරන ලදී.

මෙම චෝදනාව එල්ල වී තිබුණේ කඩුවෙල දිසා අධිකරණයේ විභාග වූ නඩුවකට අදාළව වන අතර, එහිදී පැමිණිලිකරු විසින් අභියෝගයට ලක්කර තිබූ ඉඩම් පවරා දීමේ ඔප්පුවක් අත්සන් තැබූ නීතිඥවරයාම, එම නඩුවේ පළමු සහ දෙවන විත්තිකරුවන් වෙනුවෙන් නීතිඥවරයා ලෙස පෙනී සිටීම මෙම ගැටලුවට මුල් වී ඇත. තමන්ට සාක්ෂිකරුවෙකු ලෙස පෙනී සිටීමට සිදුවිය හැකි බවට විශ්වාස කිරීමට හේතු ඇති නඩුවකදී, නීතිඥවරයෙකු වශයෙන් වෘත්තීය කටයුතු භාරගැනීම ශ්‍රේෂ්ඨාධිකරණ රීති අංක 12 මගින් පැහැදිලිව තහනම් කර ඇති බව මෙහිදී අනාවරණය විය.

වගඋත්තරකාර නීතිඥවරයා නීතිඥයෙකු සහ විභව සාක්ෂිකරුවෙකු ලෙස ද්විත්ව භූමිකාවක කටයුතු කර ඇති බවට චෝදනා එල්ල වී තිබූ අතර, නඩුව කැඳවූ අවස්ථාවේදී ඔහු වෙනුවෙන් පෙනී සිටි නීතිඥ මණ්ඩලය අධිකරණයට දන්වා සිටියේ තම සේවාදායකයා මීට පෙර ප්‍රකාශ කළ නිවැරදිකරු යන ස්ථාවරය ඉවත් කර ගනිමින් වරද පිළිගැනීමට අපේක්ෂා කරන බවයි. ඉදිරිපත් වූ කරුණු සලකා බැලූ ෂිරාන් ගුණරත්න, කේ. ප්‍රියන්ත ප්‍රනාන්දු සහ සම්පත් විජේරත්න යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල තීරණය කළේ, සිද්ධියේ ස්වභාවය අනුව නීතිඥවරයාගේ සේවය අත්හිටුවීමට හෝ නීතිඥ නාම ලේඛනයෙන් ඉවත් කිරීමට තරම් බරපතල තත්ත්වයක් නොමැති බවයි.

අදාළ නීතිඥවරයා සිය වරද අවංකව පිළිගෙන අධිකරණයෙන් කොන්දේසි විරහිතව සමාව අයැද සිටීම තුළින් ඔහු තුළ ඇති පසුතැවිල්ල සහ වගකීම භාරගැනීමේ කැමැත්ත පෙන්නුම් කරන බව නිරීක්ෂණ ඉදිරිපත් කරමින් විනිසුරු ෂිරාන් ගුණරත්න මහතා සඳහන් කළේය.

ඒ අනුව, වෘත්තීය ආචාර ධර්ම හෝ යුක්තිය පසිඳලීමේ ක්‍රියාවලියට හානියක් නොවන පරිදි අනාගතයේදී ඉතා වගකීමෙන් කටයුතු කරන ලෙස උපදෙස් දෙමින් අධිකරණය ඔහුව මුදා හැරීමට කටයුතු කළේය.

මෙම සිද්ධිය වගඋත්තරකරුට පමණක් නොව සමස්ත නීති වෘත්තිකයන්ටම ආචාර ධර්ම දැඩිව පිළිපැදීමේ වැදගත්කම සිහිගන්වන්නක් බැවින්, ශ්‍රේෂ්ඨාධිකරණ රෙජිස්ට්‍රාර්වරයාට නීතිඥ නාම ලේඛනයේ ඊට අදාළ සටහන් තබන ලෙසද අධිකරණය නියෝග කළේය. කඩුවෙල දිසා අධිකරණ නඩුවේ පැමිණිලිකරු අගවිනිසුරුවරයා වෙත ඉදිරිපත් කළ පැමිණිල්ලකට අනුව ආරම්භ වූ මෙම ක්‍රියාවලියේදී, 1978 අංක 2 දරන අධිකරණ සංවිධාන පනතේ 42(2) වගන්තිය යටතේ නීතිඥවරයාට එරෙහිව රීතියක් නිකුත් කර තිබුණි.

වගඋත්තරකාර නීතිඥවරයා වෙනුවෙන් ජනාධිපති නීතිඥ කුවෙර ද සොයිසා සහ නීතිඥ සංජන ද සොයිසා පෙනී සිටි අතර, නීතිපතිවරයා වෙනුවෙන් අතිරේක සොලිසිටර් ජෙනරාල් විවේකා සිරිවර්ධන සහ ජ්‍යෙෂ්ඨ රජයේ නීතිඥ සබ්රිනා අහමඩ් පෙනී සිටියහ. ශ්‍රී ලංකා නීතිඥ සංගමය වෙනුවෙන් නීතිඥ හරිත් ද මැල් පෙනී සිටියේය.