ඉන්දියාවේ රාජධානි එක්ස්ප්‍රස් දුම්රියේ ගැටී එකවර අලි 8 ක් මරුට

ඉන්දියාවේ අස්සාම් ප්‍රාන්තයේ හෝජායි ප්‍රදේශයේදී සෙනසුරාදා අලුයම සිදු වූ බිහිසුණු දුම්රිය අනතුරකින් වන අලි අට දෙනෙකු ජීවිතක්ෂයට පත්ව ඇති අතර, කුඩා අලි පැටවෙකු තුවාල ලබා තිබේ. මෙම ඛේදවාචකය හේතුවෙන් දුම්රිය සේවාවලට දැඩි බාධා එල්ල විය.

සාරාන්ග් සිට නවදිල්ලිය බලා ධාවනය වූ රාජධානි එක්ස්ප්‍රස් දුම්රිය අලි රංචුවක ගැටීමෙන් එන්ජිම සහ මැදිරි පහක් පීලි පැනීමට ලක්ව ඇතත්, වාසනාවකට මෙන් කිසිදු මගියෙකුට අනතුරක් සිදු වී නොමැති බව බලධාරීහු තහවුරු කළහ. වනජීවී නිලධාරීන් පැවසුවේ අනතුර සිදුවූ ස්ථානයේම අලි අට දෙනෙකු මිය ගොස් ඇති අතර තුවාල ලැබූ එක් අලි පැටවෙකු බේරා ගැනීමට හැකි වූ බවයි.

මිසෝරාම්හි සාරාන්ග් සිට දිල්ලියේ ආනන්ද් විහාර් පර්යන්තය දක්වා ගමන් ගන්නා මෙම දුම්රිය, ගුවහාටි නගරයට කිලෝමීටර් 126 ක් පමණ දුරින් පිහිටි අනතුරුදායක ස්ථානයක් පසුකරමින් සිටියදී අලුයම 2:17 ට පමණ මෙම ඛේදවාචකයට මුහුණ දී ඇත. අනතුර සිදුවූ වහාම සහන දුම්රිය සහ දුම්රිය නිලධාරීන් කඩිනමින් එම ස්ථානයට ළඟා වී මුදා ගැනීමේ මෙහෙයුම් ආරම්භ කළහ. දුම්රිය පීලි පැනීම සහ මියගිය සතුන්ගේ සිරුරු දුම්රිය මාර්ගය පුරා විසිරී තිබීම හේතුවෙන් ඉහළ අස්සාමය සහ ඊසානදිග ප්‍රදේශවල දුම්රිය ගමනාගමනයට බරපතළ ලෙස බාධා එල්ල වූ බව වාර්තා වේ.

දුම්රිය බලධාරීන් අනතුරට ලක් වූ මැදිරිවල සිටි මගීන් වහාම දුම්රියේ අනෙකුත් මැදිරිවල හිස් ආසන වෙත යොමු කළ අතර, දුම්රිය ගුවහාටි වෙත ළඟා වූ පසු සියලුම මගීන්ට පහසුකම් සැලසීම සඳහා අමතර මැදිරි එක් කිරීමට ද පියවර ගෙන තිබේ. බලධාරීන්ගේ ප්‍රකාශයන්ට අනුව, මෙම ප්‍රදේශය සාමාන්‍යයෙන් අලි ඇතුන් ගමන් කරන මාර්ගයක් ලෙස හඳුනාගෙන නොතිබුණි. දුම්රිය මාර්ගයේ අලි රංචුව දුටු වහාම රියදුරු හදිසි තිරිංග ක්‍රියාත්මක කළද, අලින් දුම්රිය දෙසට දිව ඒම නිසා මෙම ගැටීම වළක්වා ගැනීමට නොහැකි වී ඇත. මීට පෙර, පසුගිය නොවැම්බර් 30 වන දින ද බටහිර බෙංගාලයේ ජල්පායිගුරි දිස්ත්‍රික්කයේදී දුම්රියක ගැටීමෙන් තවත් අලියෙකු මිය ගොස් පැටවෙකු තුවාල ලැබූ සිදුවීමක් වාර්තා විය.

පසුගිය වසර පහක කාලය තුළ ඉන්දියාව පුරා දුම්රියවල ගැටීමෙන් අලි ඇතුන් 79 දෙනෙකු මිය ගොස් ඇති බව පරිසර අමාත්‍යාංශය පසුගිය අගෝස්තු මාසයේදී පාර්ලිමේන්තුවට අනාවරණය කළේය. පරිසර රාජ්‍ය අමාත්‍ය කීර්ති වර්ධන් සිං මහතා ලෝක් සභාවේදී සඳහන් කළේ මෙම දත්ත 2020 සිට 2025 දක්වා කාලය තුළ ප්‍රාන්ත රජයන්ගෙන් ලබාගත් වාර්තා මත පදනම් වූ බවයි. පසුගිය වසරේ ජූලි 18 වන දින බටහිර බෙංගාලයේදී මවක් සහ පැටවෙකු ඇතුළු අලි තිදෙනෙකු දුම්රියක ගැටීමෙන් මිය ගිය බව ද ඔහු තහවුරු කළේය. කෙසේ වෙතත්, දුම්රිය මාර්ගවල සිදුවන අනෙකුත් වන සතුන්ගේ මරණ පිළිබඳ ඒකාබද්ධ දත්ත අමාත්‍යාංශය සතුව නොමැති බව ද අමාත්‍යවරයා වැඩිදුරටත් පැවසීය.