ශ්රී ලංකාව පුරා බලපා ඇති අයහපත් කාලගුණික තත්ත්වය සහ ඒ හරහා නිර්මාණය වූ මහා ගංවතුර උවදුර බොහෝ දෙනෙකුගේ ජීවිත උඩු යටිකුරු කිරීමට සමත් විය. මෙම විනාශය නිසා පවුල් සාමාජිකයින් අහිමිවූ, වටිනා දේපළ අහිමිවූ අය අතිමහත්ය. මේ ගැන කථා දහස් ගණනකි.
ඒ අතරින් එක් කතාවක් ගැනයි මේ සටහන.
මහියංගණය ප්රදේශයේ තාවකාලිකව පදිංචිව සිටි ඔන්ලයින් ඉංග්රීසි ගුරුවරියක් වන උදේශා ජයසේකර මහත්මිය ද මෙම ස්වාභාවික විපතේ අමිහිරි අත්දැකීමට මුහුණ දුන් තවත් එක් අසරණ වූ චරිතයකි. පසුගිය පෙබරවාරි මස සිට දෙසැම්බර් දක්වා කාලය ගත කිරීමේ අරමුණින් ඇය මහියංගණය රිදී කොටළිය ප්රදේශයේ නිවසක උඩු මහලේ රැඳී සිටි අතර, අනපේක්ෂිත ලෙස පැමිණි ජල රකුසා ඇයගේ වෘත්තීය ජීවිතය හා බැඳුණු භෞතික සම්පත් සියල්ල ඇගෙන් උදුරා ගත්තේය.
පසුගිය 26 වැනිදා රාත්රියේ සිට ඇද හැලුණු ධාරානිපාත වර්ෂාවත් සමඟ නිවස වටා ජලය එක් රැස් වුවද, නිවෙස් හිමියන් පවා විශ්වාස කර ඇත්තේ ජලය අඩි තුනකට වඩා ඉහළ නොනගිනු ඇති බවයි. කෙසේ වෙතත් සොබාදහම අනාවැකි අභිබවා යමින් ඉතා කෙටි කාලයක් තුළ ජල මට්ටම සීඝ්රයෙන් ඉහළ දැමූ අතර, අවසානයේදී අඩි විස්සක් පමණ උසට ගංවතුර ගැලීමක් සිදු විය. ජලය වේගයෙන් ගලා එන විට තමන් සතුව තිබූ ජංගම දුරකථනය, Power bank, ඇස් කණ්ණාඩි කුට්ටම සහ දරුවාට ඇඳුමක් පමණක් අතැතිව පපුව මට්ටමට තිබූ ජලය මැදින් දිවි බේරා ගනිමින් පලා යාමට ඇයට සිදුවිය.
සිය දරුවා සහ තවත් පවුල් හයක පිරිසක් සමඟ ආරක්ෂිත ස්ථානයක් වෙත ගියද, ඇය සතු සියලු දේපළ ජලයට බිලි වී අවසන්ය. ඇයගේ ගමන් බලපත්රය වූ යතුරුපැදිය ගංවතුරට ගසාගෙන ගොස් ඇති අතර දහස් ගණනක් දරුවන්ට අධ්යාපනය ලබා දීමට භාවිතා කළ පරිගණකය, ලැප්ටොප් යන්ත්රය, කැමරාව, ආලෝකකරණ පද්ධති සහ පන්ති කාමරයේ පසුබිම් සැකසුම් (Classroom setup) සියල්ල විනාශ වී තිබේ. කෙසේ වෙතත් ජීවිතය බේරා ගැනීමට හැකි වීම ගැන පමණක් සිතා ඇය සැනසෙන අතර, තාවකාලිකව නවාතැන් ගෙන සිටින ස්ථානයේ විදුලිය හෝ පිරිසිදු ජලය නොමැතිව දැඩි දුෂ්කරතා මධ්යයේ ඇය මේ වන විට කල් ගෙවන්නීය.
භෞතිකව සියල්ල අහිමි වුවද ඇයගේ අධිෂ්ඨානය සහ ගුරු වෘත්තියට ඇති ඇල්ම ගංවතුරට ගසාගෙන ගොස් නැත. ඇය ඉල්ලා සිටින්නේ තමන්ට නැවතත් ස්වාධීනව නැගී සිටීමට සහ තම සිසු දරුවන් හමුවට යාමට අවශ්ය වෘත්තීය උපකරණ සපයා ගැනීමට හැකි නම් සහාය වන ලෙසයි. අන් අයගේ අනුකම්පාවට වඩා තමන්ගේ දෙපයින් නැගී සිටීමට වෙර දරන ඇය, මේ මොහොතේ අඳුරු කාමරයක සිටියද හෙට දිනයේ ආලෝකය දකින බවට දැඩි විශ්වාසයකින් පසුවන්නීය.
ඇයගේ මෙම සංවේදී කතාව සමාජ මාධ්ය ඔස්සේ පැතිර යාමත් සමඟ බොහෝ දෙනෙකුගේ අවධානය ඒ වෙත යොමු වී තිබේ. ටෙහාන් පින්සර, සමන් බණ්ඩාර වැනි අය ඇයගේ විනාශ වූ ඉලෙක්ට්රොනික උපකරණ නොමිලේ අලුත්වැඩියා කර දීමට හෝ විකල්ප ලබා දීමට ඉදිරිපත් වී ඇති අතර, තවත් ඉංග්රීසි ගුරුවරයෙකු වන දිල්හාර මහතා ඇයට නැවත පන්ති ආරම්භ කරන තෙක් තම පහසුකම් භාවිතා කිරීමට ආරාධනා කර තිබේ. ස්වභාවික විපතකින් සියල්ල අහිමි වුවද, මානුෂීය බැඳීම් සහ නොසැලෙන ධෛර්යය මත යළි ජීවිතය ගොඩනගා ගැනීමට වෙර දරන උදේශා ජයසේකර ගුරුවරිය බොහෝ දෙනෙකුට ආදර්ශයකි.
Comments
Post a Comment
Your comment will be visible after approval