බිරිය මරා හංගා සොයා දෙන ලෙස රඟපෑවේ 'ධර්ම යුද්ධය' ෆිල්ම් එක නිසාලු - සැමියකු කියයි

 තම බිරිඳ අතුරුදන් වූ බවට පොලිසියට පැමිණිලි කර, ඇය සොයා දෙන ලෙස ඉල්ලමින් සිටි සැමියෙකුම, එම බිරිඳ ඝාතනය කිරීමේ චෝදනාව මත අත්අඩංගුවට ගැනීමේ පුවතක් ඉන්දියාවේ පූනේ නගරයේ වර්ජේ ප්‍රදේශයෙන් වාර්තා වේ. අතුරුදන් වූ බිරිඳ ගැන සොයා බලමින් සිටි පොලිසියට සහ අසල්වාසීන්ට මෙම හෙළිදරව්ව මහත් කම්පනයක් වූ අතර, ඝාතනය සිදුකළ ආකාරය හෙළිවීමත් සමඟ ඔවුන් දැඩි විමතියට පත්ව ඇත.

ෂිව්නේ පදිංචි 42 හැවිරිදි සමීර් පන්ජාබ්රාඕ ජාදව්, පසුගිය ඔක්තෝබර් 28 වන දින වර්ජේ පොලිස් ස්ථානයට පැමිණ තම බිරිඳ වන අංජලී සමීර් ජාදව් අතුරුදන් වී ඇති බවට පැමිණිල්ලක් ගොනු කළේය. ඒ අනුව, පොලිස් උප පරීක්ෂක නිතින් ගයික්වාඩ් මහතාගේ ප්‍රධානත්වයෙන් පොලිස් කණ්ඩායමක් වහාම අංජලී සොයා විමර්ශන ආරම්භ කරන ලදී.

අංජලී අවසන් වරට ගොගල්වාඩි ෆාටා ප්‍රදේශයේ ශ්‍රීරාම් මිසල් හවුස් අසල ගැවසී ඇති බවට තොරතුරු ලැබී තිබූ අතර, නඩුව රාජ්ගාඩ් පොලිසියට මාරු කිරීමටද නියමිතව තිබිණි. මේ අතර, සැකකාර සමීර් නිරන්තරයෙන් වර්ජේ පොලිස් ස්ථානයට පැමිණ "මගේ බිරිඳ හමු වූවාද?" යැයි විමසීම පොලිසියේ සැකයට හේතු විය. ප්‍රදේශයේ සීසීටීවී දර්ශන පරීක්ෂා කළද අංජලී පිළිබඳ කිසිදු හෝඩුවාවක් නොලැබුණු පසුබිමක, පොලිසිය සමීර්ගෙන් ප්‍රශ්න කිරීම ආරම්භ කළේය.

පොලිස් ප්‍රශ්න කිරීම් හමුවේ සැකකරු පරස්පර විරෝධී ප්‍රකාශ ලබා දීමට පටන් ගත් අතර, ඒ සමඟ පොලිසියේ සැකය තවත් තීව්‍ර විය.

අවසානයේදී දැඩි ලෙස ප්‍රශ්න කිරීමේදී, සමීර් සියලු වරද පාපොච්චාරණය කළේය. බිරිඳ ඝාතනය කර සාක්ෂි වසන් කිරීම සඳහා තමා සුප්‍රකට "දෘෂ්‍යම්" (Drishyam- ධර්ම යුද්ධය) චිත්‍රපටයෙන් ආභාෂය ලැබූ බවත්, ඒ සඳහා එම චිත්‍රපටය කිහිප වතාවක්ම සියුම්ව නැරඹූ බවත් ඔහු හෙළි කළේය.

මෙම අපරාධය සැලසුම් කිරීම සඳහා ඔහු ගොගල්වාඩි ප්‍රදේශයෙන් රුපියල් 18,000 ක මාසික කුලියකට ගබඩාවක් ලබාගෙන ඇත. එම ගබඩාව තුළ විශාල යකඩ පෙට්ටියක් තබා, ඝාතනය සඳහා අවශ්‍ය පෙට්‍රල් සහ දර ද ඔහු විසින් කල්තියා එකතු කර තිබිණි.

ඔක්තෝබර් 26 වන දින, සැකකරු "ඩ්‍රයිව් එකක් යමු" යැයි පවසමින් අංජලීව රැගෙන ගොස් ඇත. ඔවුන් දෙදෙනා ඛේඩ්ෂිවාපූර් හි මරිආයි ගාට් දක්වා ගොස්, ආපසු එන අතරමගදී බ්‍රවුන්ස්ටෝන් හෝටලයේ නතර වී කෙටි ආහාරයක්ද ලබාගෙන ඇත. ඉන් අනතුරුව ඔවුන් කෙලින්ම අදාළ ගබඩාව වෙත ගොස් තිබේ.

ගබඩාවට පැමිණි විගස සැකකාර සමීර්, අංජලීගේ ගෙල දෙඅතින් සිර කර විනාඩි දහයක් පමණ රඳවාගෙන සිට ඇති අතර, ඉන් ඇය මියගොස් ඇත. මියගිය පසු, මළ සිරුර යකඩ පෙට්ටියට දමා, පෙට්‍රල් සහ දර යොදා සම්පූර්ණයෙන්ම දවා අළු කර තිබේ. එම අළු ගංගාවකට විසිකර දැමූ ඔහු, අපරාධය සඳහා යොදාගත් යකඩ පෙට්ටිය පරණ යකඩ කඩයකට විකුණා දමා ඇත.

තම බිරිඳට වෙනත් තරුණයෙකු සමඟ අනියම් සබඳතාවක් ඇතැයි සැක කිරීම මෙම ඝාතනයට හේතු වී තිබේ. මේ පිළිබඳව ඔවුන් දෙදෙනා අතර නිතර ආරවුල් ඇතිවී ඇත. මීට දින කිහිපයකට පෙර, සතේජ් පාටිල් නැමැති පුද්ගලයෙකු සමඟ තම බිරිඳ ජංගම දුරකථනයෙන් පණිවිඩ හුවමාරු කරගනු දැකීමෙන් ඔහු දැඩි ලෙස කෝපයට පත්වී ඇති අතර, ඇතිවූ ආරවුලෙන් පසු මෙම ඝාතනය සැලසුම් කර තිබේ.