ආපදා කළමනාකරණ මධ්යස්ථානය අද (29) පෙරවරු 09.00ට නිකුත් කළ නවතම වාර්තාවට අනුව, දිවයින පුරා පවතින ආපදා තත්ත්වය හේතුවෙන් මියගිය පුද්ගලයින් සංඛ්යාව 123ක් දක්වා ඉහළ ගොස් ඇති අතර පුද්ගලයින් 130 දෙනෙකු අතුරුදහන්ව ඇති බව තහවුරු කර තිබේ. මෙම අයහපත් කාලගුණ තත්ත්වය හේතුවෙන් දිස්ත්රික්ක 25ක් පුරා පවුල් 102,877කට අයත් පුද්ගලයින් 373,428 දෙනෙකු පීඩාවට පත්ව ඇති බව එම දත්ත වාර්තා පෙන්වා දෙයි.
දිස්ත්රික්ක මට්ටමින් සිදුව ඇති ජීවිත හානි සලකා බැලීමේදී වැඩිම බලපෑමක් එල්ල වී ඇත්තේ මහනුවර දිස්ත්රික්කයට වන අතර, එහින් මරණ 51ක් සහ අතුරුදහන්වීම් 67ක් වාර්තා වී ඇත. මීට අමතරව බදුල්ල දිස්ත්රික්කයෙන් මරණ 35ක් සහ අතුරුදහන්වීම් 27ක් ද, කෑගල්ල දිස්ත්රික්කයෙන් මරණ 09ක් සහ අතුරුදහන්වීම් 24ක් ද වාර්තා වී තිබේ. මාතලේ, නුවරඑළිය සහ අම්පාර යන දිස්ත්රික්කවලින් ද මරණ වාර්තා වී ඇති අතර කුරුණෑගල, මොනරාගල, යාපනය, හම්බන්තොට සහ ගාල්ල යන දිස්ත්රික්කවලින් ද මරණ වාර්තා වී ඇත.
ආපදාවට ලක්වූ ජනගහනය අතින් වැඩිම පිරිසක් වාර්තා වන්නේ ගම්පහ දිස්ත්රික්කයෙන් වන අතර, එම සංඛ්යාව පවුල් 23,634කට අයත් පුද්ගලයින් 87,977කි. පුත්තලම දිස්ත්රික්කයේ පුද්ගලයින් 83,217ක් සහ කොළඹ දිස්ත්රික්කයේ පුද්ගලයින් 82,266ක් ද ආපදාවට ලක්වූ පිරිස අතරට අයත් වෙති. මඩකලපුව, පොළොන්නරුව සහ ත්රිකුණාමලය වැනි දිස්ත්රික්කවල ද සැලකිය යුතු ජනතාවක් පීඩාවට පත්ව සිටිති.
ආපදා තත්ත්වය හමුවේ අවතැන් වූ ජනතාව වෙනුවෙන් ආරක්ෂිත මධ්යස්ථාන 488ක් ස්ථාපිත කර ඇති අතර, මේ වන විට පවුල් 13,690කට අයත් පුද්ගලයින් 43,925 දෙනෙකු එම මධ්යස්ථානවල රඳවා සිටින බව ආපදා කළමනාකරණ මධ්යස්ථානය වැඩිදුරටත් සඳහන් කරයි. බදුල්ල දිස්ත්රික්කයේ පමණක් ආරක්ෂිත මධ්යස්ථාන 97ක් ක්රියාත්මක වන අතර මහනුවර දිස්ත්රික්කයේ මධ්යස්ථාන 76ක් ස්ථාපිත කර තිබේ.
විශාලනය කළ වගුව බලන්න මෙතැනින් click here
Comments
Post a Comment
Your comment will be visible after approval