අමු පළතුරු පමණක් ආහාරයට ගැනීමේ දැඩි ආහාර පාලන ක්රමයක් අනුගමනය කළ විසිහත් හැවිරිදි තරුණියක් බාලි දූපතේ හෝටල් කාමරයක් තුළ මියගොස් සිටියදී සොයාගෙන තිබේ. පෝලන්ත ජාතික, කැරොලිනා ක්රිසැක් නම් වූ මෙම තරුණිය ලීඩ්ස් විශ්වවිද්යාලයේ හිටපු ශිෂ්යාවකි. ඇය නව යොවුන් වියේදී ශරීරයේ පෙනුම සහ "පිරිසිදු ආහාර" සංකල්පය පිළිබඳ දැඩිව උනන්දු වීමත් සමඟ වයස අවුරුදු දහනවයේදී මෙම අන්තගාමී ආහාර රටාවට යොමු වී ඇත.
2024 වසරේදී ඇය බාලි දූපතට ගොස් ඇති අතර, ඒ වන විට ඇගේ සෞඛ්ය තත්ත්වය කොතරම් දරුණු ලෙස පිරිහී තිබුණේද යත්, ඇඳේ පෙරළීමට හෝ සමබරතාවය රඳවා ගැනීමට පවා ඇයට නොහැකි වී තිබේ. 2024 දෙසැම්බර් මාසයේදී ඇය බාලි හි පිහිටි හෝටලයක නවාතැන් ගත් අවස්ථාවේදී, කාර්ය මණ්ඩලය ඇයව විස්තර කර ඇත්තේ ගිලුණු දෑස් සහ සිරුරෙන් කැපී පෙනෙන ලෙස නෙරා ආ අකු ඇට සහිත, අතිශයින් කෙට්ටු වූ තැනැත්තියක් ලෙසය. ඇයට තනිවම ශරීරයේ බර දරා ගැනීමට නොහැකි වූ නිසා, හෝටලයේ රාත්රී ලිපිකරු විසින් ඇයව කාමරයට කැඳවාගෙන යාමට සහාය වී ඇත.
වෛද්යවරයකු ඇමතීමට අවශ්ය දැයි කාර්ය මණ්ඩලය විමසූ විට කැරොලිනා එය තරයේ ප්රතික්ෂේප කර ඇති අතර, තමාට පළතුරු පමණක් ලබා දෙන ලෙසත්, එම ආහාර තම කාමරයටම ගෙනැවිත් දෙන ලෙසත් ඇය උපදෙස් දී තිබිණි.
බාලි දූපත සෞඛ්ය සම්පන්න ජීවන රටාවක් සඳහා ප්රසිද්ධියක් උසුලන බැවින් මෙවැනි ඉල්ලීම් සාමාන්ය දෙයක් වූ නිසා හෝටල් කළමනාකරුට එය පුදුමයට කරුණක් නොවීය. ඉදිරි දින කිහිපය තුළ ඇය කාමරයෙන් පිටතට පැමිණ ඇත්තේ ඉතා කලාතුරකින් වන අතර, බොහෝ විට ඇයට පළතුරු පාර්සල් ලබා දීමට පැමිණි හෝටල් සේවකයින් සමඟ පමණක් ඇය කතාබහ කර ඇත.
ඇය නවාතැන් ගෙන දින තුනකට පසු, මීට පෙර සංචාරය කරන අතරතුර හමුවී තිබූ කැරොලිනාගෙන් කිසිදු තොරතුරක් නොලැබීම හේතුවෙන්, උබුද් ප්රදේශයේ අමු නිර්මාංශ ආපන ශාලාවක් පවත්වාගෙන ගිය ප්රදේශවාසියෙක් හෝටලය හා සම්බන්ධ වී ඇත. ඒ අනුව කාර්ය මණ්ඩලය ඇය පිළිබඳව සොයා බැලීමට ගිය අවස්ථාවේදී ඇගේ කාමරයේ තිබී නිසල දේහය හමුවී තිබේ. ඇගේ අන්තර්ජාල මිතුරියක් හෙළි කර තිබුණේ මිය යන විට කැරොලිනා ඔස්ටියෝපොරෝසිස් රෝගයෙන් සහ ඇල්බියුමින් ඌනතාවයෙන් පෙළුණු බවත්, එම ඌනතාවය නිසා පාද ඉදිමී තිබූ බවත්ය.
වෝර්සෝ නුවර ඉපිද හැදී වැඩුණු ඇය, වයස අවුරුදු දහඅටේදී එක්සත් රාජධානියේ ලීඩ්ස් විශ්වවිද්යාලයට ඇතුළත් වූ අතර, එහිදී යෝගා සහ නිර්මාංශ ජීවන රටාව කෙරෙහි ඇයගේ උනන්දුව වර්ධනය වී තිබේ. ඉන්ස්ටග්රෑම් සමාජ මාධ්ය ජාලය හරහා ඇය සිය ආහාර රටාව පිළිබඳව අදහස් දක්වා ඇති අතර, ඇයගේ අනුගාමිකයන් ඇගේ "ලස්සන ගෙල සහ කරපටි අස්ථි" අගය කරමින් ප්රතිචාර දක්වා තිබිණි. ඇයගේ බර ශීඝ්රයෙන් අඩුවීම දුටු දෙමාපියන්,
ආහාර ගැනීමේ අක්රමිකතාව සඳහා ප්රතිකාර ලබා ගැනීමට නිවසට පැමිණෙන ලෙස බල කර ඇතත්, 2018 වසරේ වසන්තයේ දී නේවාසික සායනයක ප්රතිකාර ලැබීමෙන් පසු ඇය නැවතත් සිය අමු නිර්මාංශ ආහාර රටාව ආරම්භ කර තිබේ.
තම පවුලේ අය විශ්වාස කරන්නේ නිර්මාංශිකයින් සහ සමාජ මාධ්ය විසින් තමාව "මොළ සේදීමකට" ලක් කර ඇති බව ඇය වරක් මිතුරියකට රහසින් පවසා ඇත. මන්දපෝෂණය හේතුවෙන් ඇගේ දත් දිරාපත් වී නියපොතු කහ පැහැ ගැන්වී තිබූ අතර, සමාජ මාධ්යයේ පළ කළ ඡායාරූපවලින් ඇගේ අසාමාන්ය ලෙස සිහින් වූ සිරුර පැහැදිලිව දිස් විය. ඇයගේ මිතුරියක ප්රකාශ කළේ, "ඇයට වෛද්ය සහ මනෝවිද්යාත්මක උපකාර අවශ්යව තිබුණත්, ප්රජාව බොහෝ විට ඇගේ හැසිරීම් අනුමත කළා" යනුවෙනි. ප්රතිකාර සඳහා සෞඛ්ය පුහුණුකරුවන් වෙත යොමු වුවද, ඕනෑම ආකාරයක ප්රතිකාරයක් අමු නිර්මාංශ ආහාර වේලක් සමඟ ඒකාබද්ධ කළ යුතු බවට ඇය දැඩිව කියා සිටියාය.
(ද මිරර් යූකේ ඇසුරිනි)
Comments
Post a Comment
Your comment will be visible after approval