බිරිය එක්ක රණ්ඩුවී වසර 4 ක් නවසීලන්ත ඝන කැලයක දරුවන් තිදෙනෙකු සමග සැගවී සිටි ටොම් පිලිප්ස්ගේ කතාව

 වසර හතරකට ආසන්න කාලයක් සිය දරුවන් තිදෙනා ලෝකයෙන් වසන් කරගෙන සිට, පසුගිය මාසයේ පොලිස් වෙඩි පහරකින් ජීවිතක්ෂයට පත් වූ ටොම් ෆිලිප්ස් නමැති නවසීලන්ත ජාතික පියා විසින් භාවිත කළ රහසිගත වනගත කඳවුරු දෙකක ඡායාරූප පොලිසිය විසින් නිකුත් කර තිබේ. රටේ බටහිර වෙරළ තීරයේ මරෝකෝපා ප්‍රදේශයට උතුරින් සහ නැගෙනහිරින් පිහිටි ඝන වනාන්තර කලාපවල, දැඩි ලෙස වෘක්ෂලතාවලින් ආවරණය වූ මෙම කඳවුරු එම පවුලේ ප්‍රධාන නවාතැන් වන්නට ඇති බවට විශ්වාස කෙරේ.

මරෝකෝපා හි ගොවි පවුලකින් පැවත එන ෆිලිප්ස්, 2021 දෙසැම්බර් මාසයේදී දරුණු පවුල් ආරවුලක් අතරතුර සිය දරුවන් ද සමඟ මෙම දුෂ්කර වනාන්තරයට ඇතුළුවී අන්තරාදායක ජීවිතයක් ගත කර තිබේ. බැංකු මංකොල්ලයක් ඇතුළු වරද කිහිපයක් නිසා පොලිසිය සොයමින් සිටි ඔහු දරුවන් සමග මහවනයේ ගත කරේ කිසිවෙකුට සොයාගන්නට බැරි ලෙසයි.වරින්වර සුපිරි වෙළෙදසල්වලට ඔහු පැමිණ තිබූ බවද හෙළි විය.

විමර්ශකයින් පෙන්වා දෙන්නේ, වයස අවුරුදු 9 ත් 12 ත් අතර වන දරුවන් සමඟ වෙරළ තීරය, ගොවිබිම් සහ වනාන්තරය අතර සැරිසැරීම සඳහා මෙම සැඟවුම් ස්ථාන ෆිලිප්ස්ට මනා පිටිවහලක් වන්නට ඇති බවයි. සිකුරාදා නිකුත් කරන ලද ඡායාරූප මගින් උතුරු දෙසින් පිහිටි ස්ථානයේ ලී කොටන් යොදා තැනූ පැල්පතක් හෙළිදරව් වන අතර, එහි තෙත් මඩ සහිත බිමක්, ප්ලාස්ටික් බාල්දියක් සහ ජෙරිකන් කිහිපයක් ද දක්නට ලැබිණි. නැගෙනහිර දෙසින් පිහිටි අනෙක් කඳවුර, විශාල ගස් වියනක් යට සඟවා තිබූ වඩාත් ශක්තිමත් ව්‍යුහයක් වූ අතර, එහි ලී මේසයක්, ටාපෝලින් ආවරණයක් සහ පවුලේ පිහිටීම සඟවා තැබීම සඳහා අතු රිකිලිවලින් තැනූ පහත් ආවරණයක් ද විය.

මෙම ස්ථාන අහම්බෙන් සොයා ගැනීම බොහෝ දුරට කළ නොහැක්කක් වන්නට ඇති බවත්, ගිනි අවි සන්තකයේ තබාගෙන සිටි ෆිලිප්ස් වෙත ළඟා වීම "අතිශයින්ම භයානක" වන්නට ඉඩ තිබූ බවත් රහස් පරීක්ෂක අධිකාරී රොස් මැකේ පැවසීය. පලා ගොස් සිටි කාලය තුළ ෆිලිප්ස්ට සහය වන්නට ඇතැයි සැක කෙරෙන පුද්ගලයින් හඳුනා ගැනීමේ විමර්ශන සඳහා, මෙම කඳවුරුවල තිබූ භාණ්ඩ රැසක් අධිකරණ වෛද්‍ය පරීක්ෂණ සඳහා ඉවත් කරගෙන ඇත. පසුගිය වසර හතර පුරා විවිධ අවස්ථා වලදී සුළු පිරිසකගේ සහාය ඔහුට ලැබී ඇති බවට පොලිසිය මේ වන විට විශ්වාසය පළ කර සිටී.

මේ අතර, මෙම නඩුවට අදාළ ප්‍රධාන තොරතුරු වාරණය කිරීම සම්බන්ධයෙන් පැවැත්වෙන නීතිමය ක්‍රියාමාර්ග සඳහා දරුවන්ගේ මව වන කැතරින් ක්‍රිස්ටි ද එක්වී තිබේ. ටොම් ෆිලිප්ස්ගේ මව වන ජූලියා ෆිලිප්ස් විසින් මුලින් ගොනු කරන ලද වාරණ නියෝග නඩුකරයට ඇය ද පාර්ශ්වකරුවෙකු ලෙස නම් කර ඇත. NZME ඇතුළු මාධ්‍ය ආයතන මෙම වාරණය ඉවත් කරන ලෙස දැඩි ලෙස ඉල්ලා සිටිය ද, වෙලින්ටන්හි පැවති නඩු විභාගයකින් පසුව ද මෙම නීතිමය ගැටලුවට කඩිනම් විසඳුමක් ලැබෙනු ඇතැයි අපේක්ෂා කළ නොහැකි බව වාර්තා වේ.

පසුගිය සැප්තැම්බරයේ දරුවන් බේරාගෙන පැය කිහිපයක් ඇතුළත, ටොම් ෆිලිප්ස්ගේ මවගේ ඉල්ලීම මත මෙම තොරතුරු වාරණය පනවනු ලැබීය.

එමගින් මෙම කාරණය සම්බන්ධයෙන් ඇතැම් තොරතුරු බෙදා හැරීමෙන් පොලිසිය, ඔරන්ගා ටමරිකී (OT) ආයතනය සහ ප්‍රධාන මාධ්‍ය සංවිධාන වළක්වාලන ලදී. දරුවන් මුදා ගැනීමෙන් පසු ඔරන්ගා ටමරිකී භාරයේ පසුවිය.

මරෝකෝපා හි ගොවි පවුලකින් පැවත එන ෆිලිප්ස්, 2021 දෙසැම්බර් මාසයේදී දරුණු පවුල් ආරවුලක් අතරතුර සිය දරුවන් ද සමඟ මෙම දුෂ්කර වනාන්තරයට අතුරුදහන් විය. ඊට මාස කිහිපයකට පෙර, 2021 සැප්තැම්බර් මාසයේදී ද ඔවුන් සති තුනක් අතුරුදහන් වී සිටි අතර, පුළුල් සෝදිසි මෙහෙයුමකින් පසු නැවත පැමිණි ඔහු පොලිස් සම්පත් නාස්ති කිරීමේ චෝදනාවට ලක්විය. 2022 ජනවාරි 12 දිනට නියමිතව තිබූ එම නඩුවට පෙනී නොසිට, ඔහු 2021 දෙසැම්බර් මස නැවත දරුවන් සමඟ අතුරුදහන් වීමත් සමඟ ඔහුව අත්අඩංගුවට ගැනීමට වරෙන්තු නිකුත් කෙරිණි.

2022 පෙබරවාරි මාසයේදී සැපයුම් රැගෙන යාම සඳහා තනිවම නිවසට පැමිණීමෙන් පසු වසරකට වැඩි කාලයක් ඔහු පිළිබඳ කිසිදු තොරතුරක් වාර්තා නොවීය. පසුව, 2023 මැයි මාසයේදී ටෙ කූයිටි ප්‍රදේශයේ බැංකු මංකොල්ලයකට සහ සුපිරි වෙළඳසැල් සේවකයෙකුට වෙඩි තැබීමකට ඔහු සම්බන්ධ බවට චෝදනා එල්ල විය. එම වසරේ අගෝස්තු සහ නොවැම්බර් මාසවලදී ඔහුව ස්ථාන කිහිපයකදී දුටු බවට වාර්තා වූ අතර, ඔහු දරුවෙකු සමඟ පියෝපියෝ හි සුපිරි වෙළඳසැලක් බිඳින අයුරු ද CCTV දර්ශනවල සටහන්ව තිබුණි.

වසරකට ආසන්න කාලයක් කිසිදු තොරතුරක් නොමැතිව සිට, 2024 ඔක්තෝම්බර් සහ 2025 අගෝස්තු මාසවලදී ඔහු පිළිබඳව නැවත වාර්තා විය. අනතුරුව සැප්තැම්බර් 8 වන දා අලුයම, ගොවිපල සැපයුම් වෙළඳසැලක් බිඳීමෙන් පසු ක්වාඩ් බයිසිකලයකින් ගමන් කරමින් සිටියදී ඔහු පොලිසියට මුහුණ දුන්නේය. එහිදී ෆිලිප්ස් විසින් එල්ල කළ වෙඩි ප්‍රහාරයකින් පොලිස් නිලධාරියෙකු බරපතල තුවාල ලැබූ අතර, පොලිසිය ද ප්‍රතිප්‍රහාර එල්ල කිරීමත් සමඟ ඔහු එම ස්ථානයේදීම මිය ගියේය.

පොලිස් වෙඩි පහරින් ෆිලිප්ස් මිය යන විට වැඩිමහල් දරුවා ඔහු සමඟ සිට ඇත. අනෙක් දරුවන් දෙදෙනා පැය කිහිපයකට පසුව වෙඩි තැබීම සිදු වූ ස්ථානයේ සිට කිලෝමීටර් 2 ක් පමණ දුරින් පිහිටි කැලෑබද කඳවුරු බිමක තනිවම සිටියදී සොයා ගන්නා ලදී. මෙම වෙඩි තැබීම, දරුවන් සොයා ගැනීම සහ ෆිලිප්ස්ට ගිනි අවි සහ ප්‍රවාහන ක්‍රම ලබා ගැනීමට සහාය දුන් පුද්ගලයින් පිළිබඳව මේ වන විට පරීක්ෂණ කිහිපයක් ක්‍රියාත්මක වේ.