උතුරු කොරියානු නායක කිම් ජොන්ග්-උන් සිය හුදකලා රාජධානියෙන් බැහැරව සිදුකරන දුර්ලභ විදෙස් සංචාරයක් සඳහා චීනය බලා පිටත්ව ගොස් තිබේ. චීන ජනාධිපති ෂී ජින්පිං සහ රුසියානු ජනාධිපති ව්ලැඩිමීර් පුටින් සමඟ බීජිං නුවරදී පැවැත්වෙන සමුළුවකට සහභාගී වීම සඳහා ඔහු පැය 20ක පමණ දීර්ඝ ගමනක යෙදුණේ සිය සුප්රසිද්ධ, දැඩි ලෙස සන්නද්ධ කරන ලද විශේෂ දුම්රියෙනි.
උතුරු කොරියානු නායක කිම් ජොන්ග්-උන් පිළිබඳව නිරන්තරයෙන් ලෝක මාධ්ය අවධානය යොමු වන අතර, ඔහුගේ සෑම ක්රියාවක්ම විවිධ අර්ථකථනවලට ලක්වේ. චීනයේ බීජිං නුවරදී රුසියානු ජනාධිපති ව්ලැඩිමීර් පුටින් සමඟ පැවති හමුවකින් අනතුරුව, කිම්ගේ ආරක්ෂක නිලධාරීන්ගේ අසාමාන්ය හැසිරීම නැවත වතාවක් දැඩි කතාබහට ලක්ව තිබේ.
සාකච්ඡාව අවසන් වූ විගස, කිම් ජොන්ග්-උන් වාඩි වී සිටි පුටුව සහ ඒ ආසන්නයේ තිබූ මේසය පිරිසිදු කිරීම සඳහා ඔහුගේ ආරක්ෂක කණ්ඩායමේ සාමාජිකයින් දෙදෙනෙකු ඉදිරිපත්වන ආකාරය දක්නට ලැබුණි.
ඔවුන් විසින් කිම්ගේ දහඩිය ඇතුළු ශරීර ස්රාවයන්ගේ කිසිදු සලකුණක් ඉතිරි නොවන සේ එම ස්ථාන ඉතා සූක්ෂම ලෙස පිසදමන ලදී. එමෙන්ම, හමුව අතරතුර කිම් ජලය පානය කළ වීදුරුව ද එක් කාන්තාවක් විසින් වහාම එම ස්ථානයෙන් ඉවත් කරනු ලැබීය. කිම්ගේ DNA සාම්පල කිසිවක් විදෙස් බුද්ධි අංශ අතට පත්වීම වැළැක්වීම මෙම ක්රියාවලියේ මූලික අරමුණ බව විශ්වාස කෙරේ.
උතුරු කොරියානු නායකයාගේ සෞඛ්ය තත්ත්වය එරට පාලනයේ ස්ථාවරත්වයට සෘජුවම බලපාන අතිශය රහසිගත කාරණයක් ලෙස සැලකේ. මේ හේතුවෙන් ඔහුගේ සෞඛ්ය තොරතුරු හෙළිවිය හැකි කෙස් ගසක් හෝ වෙනත් කිසිදු ජීව විද්යාත්මක සාක්ෂියක් ඉතිරි නොකිරීමට ඔහුගේ ආරක්ෂක අංශ දැඩිව වගබලා ගනී. මෙය කිම් ජොන්ග්-උන් අනුගමනය කරන සාමාන්ය ආරක්ෂක විධිවිධානයක් බවත්, මීට පෙරද ඔහු සිය විදෙස් සංචාර සඳහා තමාගේම අතේ ගෙන යා හැකි වැසිකිළියක් රැගෙන යන බවට වාර්තා පළ වී තිබුණි.
මෙම චීන සංචාරයේදී අවධානයට ලක්වූ අනෙක් සුවිශේෂී සිදුවීම වූයේ, කිම් ජොන්ග්-උන් සමඟ ඔහුගේ දහතුන් හැවිරිදි දියණිය වන කිම් ජු-ඒ ද එක්ව සිටීමයි. මෙය ඇය සිය පියා සමඟ සහභාගී වූ පළමු නිල විදෙස් සංචාරය වීම හේතුවෙන්, ඇයව කිම්ගේ අනුප්රාප්තිකයා ලෙස සූදානම් කරමින් සිටින බවට පළවන මත තවදුරටත් තහවුරු විය.
මීට පෙර ඇය උතුරු කොරියාවේ මිසයිල දියත් කිරීමේ අවස්ථා සහ හමුදා උත්සව සඳහා කිහිප වතාවක්ම සහභාගී වී තිබුණි.
උතුරු කොරියානු නායකයා චීනයට ගිය ගමනට යොදාගත් දුම්රිය ගැනද කතා පළවේ.
"සංචලන බලකොටුව" යන අන්වර්ථ නාමයෙන්ද හැඳින්වෙන මෙම කොළ පැහැති දුම්රිය, මැදිරි 21කින් සමන්විත වන අතර එහි සියලුම මැදිරි වෙඩි නොවදින ලෙස නිමවා ඇත. මේ හේතුවෙන් දුම්රිය අධික බරකින් යුක්ත වන අතර, එහි සාමාන්ය වේගය පැයට කිලෝමීටර 60ක් පමණ මට්ටමක පවතී. දුම්රියේ ගමන් ගන්නා පුද්ගලයින් පිටතට නොපෙනෙන සේ එහි සියලු ජනේල අඳුරු පැහැ ගන්වා තිබීම තවත් විශේෂත්වයකි. මෙම දුම්රිය තුළ ඉහළ මට්ටමේ සම්මන්ත්රණ ශාලා, පෞද්ගලික නිදන කාමර සහ ප්රංශ වයින් මෙන්ම පොකිරිස්සන් වැනි ඉහළම ගණයේ ආහාරපාන සැපයෙන අවන්හලක්ද පවතින බව විදෙස් මාධ්ය වාර්තා කරයි.
මෙම දුම්රිය ගමන් වාරයන්හිදී කිම් ජොන්ග්-උන් සමඟ ඔහුගේ "සතුටු සේනාංකය" ලෙස හඳුන්වනු ලබන තරුණියන් කණ්ඩායමක්ද ගමන් කරන බවට තොරතුරු පළවේ. උසැති, රූමත් තරුණියන්ගෙන් සමන්විත මෙම කණ්ඩායමට බඳවා ගැනීමට පෙර ඔවුන් කන්යාවන් දැයි තහවුරු කරගැනීම සඳහා වෛද්ය පරීක්ෂණයකට ලක්කරන බවද පැවසේ.
කිම් ජොන්ග්-උන්ගේ පියා සහ සීයා ද සිය විදෙස් සංචාර සඳහා ගුවන් ගමන්වලට වඩා දුම්රිය ගමන් සඳහා වැඩි කැමැත්තක් දැක්වූ අතර, ගුවන් ගමන් පිළිබඳව දැඩි බියකින් පසුවූ ඔහුගේ පියා වන කිම් ජොන්ග්-ඉල් සියලු විදෙස් ගමන් සඳහා යොදාගත්තේ මෙම සුවිශේෂී දුම්රියයි.
Comments
Post a Comment
Your comment will be visible after approval