සැකකරුවන් අත්අඩංගුවට ගැනීමේදී අපරාධ පරීක්ෂණ දෙපාර්තමේන්තුව (CID) අනුගමනය කරන ක්රියා පිළිවෙත සම්බන්ධයෙන් කොළඹ ප්රධාන මහෙස්ත්රාත් අසංග බෝදරගම මහතා සිය දැඩි අප්රසාදය පළ කළේය. සැප්තැම්බර් 16 වන දින අධිකරණයේදී මූල්ය වංචාවක් සම්බන්ධ නඩුවක් විභාගයට ගත් අවස්ථාවේදී මහෙස්ත්රාත්වරයා මෙම විවේචනය සිදු කළේය.
විත්තිකරුවන් කිහිප දෙනෙකු සම්බන්ධ නඩුවක, සැකකරුවන්ගෙන් කොටසක් පමණක් වරින් වර අත්අඩංගුවට ගෙන අධිකරණයට ඉදිරිපත් කිරීමේ ක්රමවේදය මහෙස්ත්රාත්වරයාගේ දෝෂ දර්ශනයට ලක් විය.
මෙම ක්රියාකලාපය නිසා අධිකරණයේ කාර්යභාරය අනවශ්ය ලෙස ඉහළ යන බවත්, එකම නඩුවේ සැකකරුවන්ට වෙනස් ආකාරයට සැලකීමට හේතුව කුමක්දැයි ඔහු ප්රශ්න කළේය. විමර්ශන කටයුතුවලදී පසුගාමී නොවී කටයුතු කරන ලෙසද මහෙස්ත්රාත්වරයා මෙහිදී අවධාරණය කළේය.
මහජනතාව අධිකරණය වෙත පැමිණෙන්නේ යුක්තිය පිළිබඳ විශ්වාසයෙන් බව සිහිපත් කළ ප්රධාන මහෙස්ත්රාත්වරයා, එම විශ්වාසය ආරක්ෂා වන පරිදි විමර්ශන නිසි ලෙස සිදු කරන ලෙස අපරාධ පරීක්ෂණ දෙපාර්තමේන්තුවට තරයේ නියෝග කළේය. යම් සැකකරුවෙකුට එරෙහිව කරුණු අනාවරණය වන්නේ නම් වහාම ඔහුව අත්අඩංගුවට ගෙන අධිකරණයට ඉදිරිපත් කළ යුතු බවත්, නඩුවට අදාළ නොවේ නම් ඔහුව නිදහස් කිරීමට පියවර ගත යුතු බවත් ඒ මහතා වැඩිදුරටත් කියා සිටියේය.
තැන්පත්කරුවන් දහසකට අධික පිරිසකගෙන් තැන්පත් ලෙස රුපියල් කෝටි 900කට අධික මුදලක් ලබා ගෙන වංචා කළ බවට රක්ෂිත බන්ධනාගාරගත කර සිටි සිංහ ෆිනෑන්ස් සහ නේෂන් ලංකා ආයතන දෙකෙහි අධ්යක්ෂවරුන් ලෙස කටයුතු කළ දෙදෙනෙකු වන මහේෂ් ප්රියන්ත අගලගමගේ සහ චන්දික යසනාත් බණ්ඩාර වීරකෝන් නමැති අයවළුන් තවදුරටත් ලබන 29 තෙක් රක්ෂිත බන්ධනාගාරගත කරන ලෙස කොළඹ ප්රධාන මහේස්ත්රාත් අසංග එස්. බෝදරගම මහතා ඊයේ (16) නියෝග කළේය.
ඔවුන් දෙදෙනා සම්බන්ධයෙන් ජනාධිපති නීතිඥවරුන් ප්රමුඛ නීතිඥ මඬුල්ල සිදු කළ ඇප ඉල්ලීම ප්රතික්ෂේප කළ ප්රධාන මහේස්ත්රාත්වරයා, ඇප දීම සම්බන්ධයෙන් පෙර දින නීතිපති දෙපාර්තමේන්තුව විරෝධය පළ නොකළ 10 වැනි සැකකරු වන එම්. උදය පුෂ්පකුමාර යන අධ්යක්ෂවරයා රුපියල් ලක්ෂ තුනක මුදල් ඇපයක්, රුපියල් ලක්ෂ 25 ශරීර ඇප තුනක් මත මුදා හරින ලෙස නියෝග කළේය.
එම ඇපකරුවන්ගෙන් එක් අයෙක් පවුලේ ඥාතියකු විය යුතු බවටත් නියෝග කරමින් ඔවුන්ගේ දිවුරුම් ප්රකාශ අධිකරණයට ඉදිරිපත් කරන ලෙසද මහේස්ත්රාත්වරයා නියෝග කළේය.
එමෙන්ම සැකකරුගේ විදේශ ගමන් තහනම් කළ මහේස්ත්රාත්වරයා විදේශ ගමන් බලපත්රය අධිකරණයට භාර දෙන ලෙසත් විදේශ ගමන් බලපත්රයක් නොමැති නම් ඒ බවට දිවුරුම් ප්රකාශයක් මඟින් කරුණු දක්වන ලෙසත් නියෝග කළේය.
ඊයේ දිනයේ 10 වන සැකකරු බන්ධනාගාරය විසින් විවෘත අධිකරණයට ඉදිරිපත් කර තිබූ අතර 1 සහ 11 සැකකරුවන් තවත් මෙවැනිම නඩුවක් සඳහා පොලොන්නරුව අධිකරණයට ඉදිරිපත් කර ඇති බව බන්ධනාගාර දෙපාර්තමේන්තුව වාර්තාවක් ඉදිරිපත් කරමින් අධිකරණයට දැන්වීය.
අගතියට පත් පාර්ශ්වය වෙනුවෙන් කරුණු දක්වමින් ජනාධිපති නෙවිල් අබේරත්න, ජ්යෙෂ්ඨ නීතිඥ ධර්මතිලක ගමගේ, නීතිඥ ප්රදීප් විජේසිංහ මහත්වරුන් ඇතුළු නීතිඥ මඬුල්ල කරුණු දැක්වූහ.
මේ නඩු සම්බන්ධයෙන් පැමිණිලි 600ක් පමණ බන්ධනාගාරයට ඉදිරිපත් කර තිබුණ ද රට වටේ අගතියට පත් පිරිස 1000ක් 1200ක් වගේ සිටිනවා. මේ සියලු දෙනාගේ ප්රකාශ සටහන් කරගැනීමට අපරාධ පරීක්ෂණ දෙපාර්තමේන්තුව කටයුතු කර නැහැ. සැකකරුවන් 11ක් සිටියත් මෙහි මහ මොළකරු වන නේෂන් ලංකා සමාගමේ සභාපති වික්ටර් රමනන් මේ වනවිටත් අත්අඩංගුවට ගෙන නැහැ. ඔවුන් පොලීසිය මග හරිමින් සිටිනවා. දිවුරුම් ප්රකාශ හෝ ලබාදී අගතියට පත් පාර්ශ්වයට මැදිහත් වීමට අවසර ලබා දෙන්න යැයි ඔවුහු කීහ.
Comments
Post a Comment
Your comment will be visible after approval