ප්‍රසිද්ධ ඝාතන නඩු 11ක් කෙළින්ම මහාධිකරණයට ගෙනියන්න නීතිපති තීරණය කරයි

 ප්‍රසිද්ධ ඝාතන නඩු 11ක් සඳහා මහේස්ත්‍රාත් අධිකරණයේ ලඝු නොවන නඩු පැවරීමකින් තොරව සෘජුවම මහාධිකරණයේ අධිචෝදනා ගොනු කිරීමට නීතිපතිවරයා තීරණය කර තිබේ.

අපරාධ පරීක්ෂණ දෙපාර්තමේන්තුව (CID) කළ ඉල්ලීමකට අනුව මෙම තීරණය ගෙන ඇති අතර, ඝාතනවලට සම්බන්ධ පොලිස් නිලධාරීන් සහ පාතාල කණ්ඩායම්වල සාමාජිකයන් ද අත්අඩංගුවට ගත් සැකකරුවන් අතර වේ. ඝාතන පිළිබඳ විමර්ශන අවසන් වී ඇති බැවින්, ලඝු නොවන නඩු පැවරීමෙන් කල් ගතවීම වැළැක්වීම මෙහි අරමුණයි.



මෙහිදී දීර්ඝ කාලයක් ගත වුවහොත්, සාක්ෂිකරුවන්ට තර්ජන එල්ල විය හැකි බවට අපරාධ පරීක්ෂණ දෙපාර්තමේන්තුව නීතිපතිවරයාට පෙන්වා දී තිබේ.

නීතිපති දෙපාර්තමේන්තුවේ ජ්‍යෙෂ්ඨ නිලධාරීන් සහ අතිරේක සොලිසිටර් ජනරාල් දිලීප පීරිස්ගේ නායකත්වයෙන් යුත් කණ්ඩායමක් මෙන්ම ජ්‍යෙෂ්ඨ පොලිස් අධිකාරී ශානි අබේසේකරගේ නායකත්වයෙන් යුත් අපරාධ පරීක්ෂණ දෙපාර්තමේන්තු නිලධාරීන් කණ්ඩායමක් අතර පැවැති සාකච්ඡාවකින් අනතුරුව මෙම තීරණය ගෙන ඇත.



මෙම නඩු අතර, කළුතරදී බන්ධනාගාර බස් රථයකට එල්ල වූ ප්‍රහාරයෙන් හත් දෙනකු මිය යෑම, කරන්දෙණියේදී වෛද්‍යවරයකු ඝාතනය කිරීම, පොලිස් මත්ද්‍රව්‍ය නාශක කාර්යාංශයේ රඳවා සිටියදී ඉංජිනේරුවකු ඝාතනය කිරීම, ‘කොහුවල බබී’ ඝාතනය, පොලිස් නිලධාරීන් සැකකරුවන් වන ඇල්පිටිය ද්විත්ව ඝාතනය, නියෝමාල් රංගජීවට වෙඩි තැබීමේදී දරුවකුට මරු කැඳවීම, රත්ගමදී සිදු වූ ඝාතන කිහිපයක් සහ අලුත්කඩේ අධිකරණය ඉදිරිපිටදී 'ගනේමුල්ල සංජීව'ට වෙඩි තැබීම වැනි සිද්ධි ඇතුළත් වේ.

මෙම ඝාතනවලට අදාළ සෑම විමර්ශන ගොනුවක්ම සලකා බැලීම සඳහා විශේෂ නිලධාරීන් කණ්ඩායමක් පත් කිරීමට ද නීතිපති දෙපාර්තමේන්තුව තීරණය කර ඇත.