2025 අගෝස්තු 31 වන දින පකිස්ථාන දේශසීමාව ආසන්නයේ නැගෙනහිර ඇෆ්ගනිස්ථාන කලාපයේ රික්ටර් මාපකයේ 6.0 ක ප්රබල භූ කම්පනයක් සිදුවීමෙන් දරුණු විනාශයක් වාර්තා වේ. ජලාලාබාද් නගරයට සැතපුම් 17ක් පමණ නැගෙනහිරින් අපිකේන්ද්රය පිහිටා තිබූ මෙම භූ කම්පනයෙන් නන්ගර්හාර් සහ කුනාර් පළාත්වලට දැඩි බලපෑම් එල්ල වී තිබේ.
මෙම ස්වභාවික විපත හේතුවෙන් මේ වන විට පුද්ගලයින් 622 දෙනෙකුට සිය ජීවිත අහිමි වී ඇති අතර, තවත් 1,500කට අධික පිරිසක් තුවාල ලබා ඇති බවට තහවුරු වී ඇත. කුනාර් පළාතේ ගම්මාන රැසක් සම්පූර්ණයෙන්ම විනාශයට පත්ව ඇති අතර, බලපෑමට ලක්වූ අනෙකුත් ප්රදේශවලට ද සැලකිය යුතු හානියක් සිදුවී ඇති බව විදෙස් මාධ්ය වාර්තා කරයි.
කිලෝමීටර් 8ත් 10ත් අතර නොගැඹුරු මට්ටමක මෙම භූ කම්පනය සිදුවී තිබීම හේතුවෙන් එහි බලපෑම ඉතා තීව්ර වී ඇති අතර, සිද්ධියෙන් පසුවද අඛණ්ඩව පසු කම්පන වාර්තා වෙමින් පවතී. බලපෑමට ලක්වූ කලාපය දුෂ්කර කඳුකර ප්රදේශයක් වන අතර, එහි ඇති නිසි ප්රමිතියකින් තොරව ඉදිකරන ලද ගොඩනැගිලි භූ කම්පනවලට ඔරොත්තු දීමේ හැකියාවෙන් තොරවීම මෙම විනාශයේ තරම වැඩි වීමට හේතු වී තිබේ.
සහන සේවා සහ මුදාගැනීමේ මෙහෙයුම් සඳහා හෙලිකොප්ටර් යානා සහ විශේෂ කණ්ඩායම් යොමු කර ඇතත්, කලාපයේ පවතින දුෂ්කර භූ විෂමතාව හේතුවෙන් එම කටයුතු සඳහා බාධා එල්ල වී ඇත. ඇෆ්ගන් තලේබාන් රජය විපතට පත් ජනතාවට සහන සැලසීම සඳහා හදිසි ප්රතිචාර කණ්ඩායම් බලමුලු ගන්වා ඇති අතර, ජාත්යන්තර ප්රජාවගෙන් ආධාර ඉල්ලා සිටී.
මෙම භූ කම්පනයේ කම්පන තරංග ඇෆ්ගනිස්ථානයේ අගනුවර වන කාබුල් නුවරට සහ පකිස්ථානයේ ඉස්ලාමාබාද් නගරයට ද දැනී තිබේ. සක්රීය භූ තැටි මායිම් මත පිහිටා ඇති ඇෆ්ගනිස්ථාන කලාපයේ අභියෝග තවදුරටත් උග්ර කරමින්, මෙම සිදුවීම මෑත ඉතිහාසයේ එරටට බලපෑ දරුණුතම ස්වභාවික විපත් අතරට එක්වෙයි.
Comments
Post a Comment
Your comment will be visible after approval