කූට ලේඛන සකස් කර ජාතික ඉතිරිකිරීමේ බැංකුවේ දත්ත පද්ධතියට පිවිස රුපියල් කෝටි 18ක මුදලක් වංචා කළ බව කියන සිද්ධියේ බැංකු නිලධාරියා ඇතුළු සැකකරුවන් පස් දෙනා ලබන මස 13 වැනිදා තෙක් තවදුරටක් රක්ෂිත බන්ධනාගාරගත කරන ලෙස කොටුව මහේස්ත්‍රාත් නිලුපුලී ලංකාපුර මෙණෙවිය නියෝග කළාය.
මාස දෙකකට අධික කාලයක් ඇතැම් සැකකරුවන් රක්ෂිත බන්ධනාගාරගත කර ඇති බැවින්, ඔවුන් ඇප මත මුදාහරින ලෙස සැකකරුවන් වෙනුවෙන් පෙනී සිටි නීතිඥ මඬුල්ල සිදු කළ ඇප ඉල්ලීම ප්‍රතික්ෂේප කළ මහේස්ත්‍රාත්වරිය සෑම සැකකරුවකුට අදාළවම සාක්ෂි සම්පිණ්ඩන වාර්තාවක් අධිකරණයට ඉදිරිපත් කරන ලෙසත් මහේස්ත්‍රාත්වරිය අපරාධ පරීක්ෂණ දෙපාර්තමේන්තුවට නියෝග කළාය. සැකකරුවන් දෙදෙනෙක් වෙනුවෙන් ලිඛිත ඇප ඉල්ලීම් සිදු කළ අතර අ‍නෙක් සැකකරුවන් තිදෙනා වෙනුවෙන් වාචිකව නීතිඥවරුන් ඇප ඉල්ලා සිටි අතර ඔවුන් සම්බන්ධයෙන් ලිඛිත ඇප ඉල්ලීම් සිදු කරන්නේ නම් ඉදිරි දින සිදු කරන ලෙස නියෝග කළ මහේස්ත්‍රාත්වරිය එම කරුණු සලකා ඇප සම්බන්ධයෙන් නියෝගයක් නිකුත් කරන බවත් දන්වා සිටියාය.
එම සිද්ධියට අදාළව එම බැංකුවේ ඉහළ කළමනාකාරීත්වය සම්බන්ධයෙන් විමර්ශනයක් කරන ලෙස සැකකරුවන් වෙනුවෙන් පෙනී සිටි නීතිඥ මඬුල්ල අධිකරණයෙන් ඉල්ලා සිටියහ. මේ වංචාවට අදාළව ණය ගනුදෙනු 43ක් පමණ සිදු කර ඇති බව කියා සිටි නීතිඥ මඬුල්ල සෑම ගනුදෙනුවකින්ම රුපියල් ලක්ෂ දෙකක් හතරක් වැනි මුදලක් ණය අයදුම්කරුවන්ගෙන් කළමනාකරුවන් කොමිස් වශයෙන් ලබා ගෙන ඇති බව අධිකරණයට දන්වා සිටියේය.
මේ අතර, ජාතික ඉතිරි කිරීමේ බැංකුවේ ණය ලබාදීමක් සම්බන්ධයෙන් සිදුවූ බව කියන වංචාව පිළිබඳ නඩුව පසුගියදා කොටුව අධිකරණයේදී කැඳවීමත් සමග, එම බැංකුව නිවේදනයක් නිකුත් කරමින් සිය ස්ථාවරය පැහැදිලි කර තිබිණි. එම වංචාවට අදාළ සැකකරුවන් හඳුනාගෙන අධිකරණයට ඉදිරිපත් කර ඇති බවත්, නීතිය ක්‍රියාත්මක කිරීම සඳහා නීතිපති දෙපාර්තමේන්තුව සමග එක්ව කටයුතු කරන බවත් එහි දැක්විණි.
එම නිවේදනය මගින් බැංකුව තරයේ කියා සිටියේ, අදාළ වංචනික ක්‍රියාවන්ට තම ඉහළ කළමනාකාරීත්වයේ කිසිදු සාමාජිකයෙකුගේ සම්බන්ධයක් නොමැති බවයි. එමෙන්ම, ගනුදෙනුකරුවන්ගේ සුරක්ෂිතභාවය තහවුරු කරමින්, වංචා දූෂණයෙන් තොර සේවාවක් සැපයීමට සියලු කාර්ය මණ්ඩලය කැපවී සිටින බවටද ජාතික ඉතිරි කිරීමේ බැංකුව එහිදී සහතික විය.
Comments
Post a Comment
Your comment will be visible after approval