නඩු ගොනුවක පිටු ඉරූ නීතිඥයාගේ කබාය ගලවයි

 අභියාචනාධිකරණ නඩු ගොනුවක පිටු ඉරා ඉවත් කිරීමෙන් නීතිඥ ආචාර ධර්ම කඩ කිරීමේ චෝදනාවට වරදකරු කෙරුණු ඩබ්ලිව්. ඞී. ධර්මසිරි කරුණාරත්න නමැති නීතිඥවරයකුගේ නීතිඥ භාවය අහෝසි කිරීමට

ශ්‍රේෂ්ඨාධිකරණය තීන්දු කළේය. අභියාචනාධිකරණයේ ලේඛකාධිකාරි මෙම නීතිඥවරයාට එරෙහිව කළ පැමිණිල්ලක් විභාග කිරීමෙන් පසුව අගවිනිසුරු ප්‍රීති පද්මන් සූරසේන, ශ්‍රේෂ්ඨාධිකරණ විනිසුරුවරුන් වන කුමුදුනී වික්‍රමසිංහ, අචල වොගප්පුලි යන විනිසුරුවරුන්ගෙන් සමන්විත ශ්‍රේෂ්ඨාධිකරණ විනිසුරු මඩුල්ලක් විසින් මෙම තීන්දුව ප්‍රකාශයට පත් කෙරිණි. අනෙකුත් විනිසුරුවරුන්ගේ එකගත්වය ඇතිව අගවිනිසුරු ප්‍රීති පද්මන් සූරසේන මහතා ප්‍රකාශයට පත් කළ තීන්දුවේ මෙසේ සඳහන්ය.




මෙම නීතිඥවරයාට එරෙහිව ගොනු කෙරුණු චෝදනාවල සඳහන් වෙන්නේ අභියාචනාධිකරණයේ ලේඛනාගාරයට පිවිස නඩු ගොනුවක් ලබාගෙන එහි පිටු දෙකක් ඉරා ඉවත් කර ඇති බවයි. පසුව අභියාචනාධිකරණයේ ලේඛකාධිකාරි ඩබ්ලිව්.එස්.බී.එස්. ප්‍රනාන්දු මහතා මරදාන පොලිසියට කළ පැමිණිල්ලකට අනුව මෙම නීතිඥවරයා මාලිගාකන්ද මහේස්ත්‍රාත් අධිකරණයට ඉදිරිපත් කර 2023 වසරේ ජනවාරි 25 වැනිදා රුපියල් ලක්ෂ පහ බැගින් වූ ශරීර ඇප දෙකක් මත මුදා හැරිණ. ඉන් අනතුරුව නීතිඥ භාවය ඉවත් නොකිරීම සඳහා නිදහසට කරුණු දක්වන ලෙස දන්වා අධිකරණ සංවිධාන පනතේ 42 (3) යටතේ චෝදනා පත්‍රයක් නිකුත් කළ අතර ඔහු එම චෝදනාවලට නිවැරදිකරු බව අධිකරණය හමුවේ ප්‍රකාශ කළේය.පසුව මෙම චෝදනා සම්බන්ධයෙන් සාක්ෂි විභාගයක් පැවැති අතර, එහිදී වග උත්තරකාර නීතිඥවරයාද සාක්ෂි දුන්නේය.




ඉදිරිපත් වූ කරුණු මත තීන්දුව ප්‍රකාශයට පත් කළ අග විනිසුරු ප්‍රීති පද්මන් සූරසේන මහතා සඳහන් කළේ, අධිකරණ සංවිධාන පනතේ 40 වැනි වගන්තියට අනුව ශ්‍රේෂ්ඨාධිකරණය නීතිඥවරුන් ලෙස පිළිගෙන බඳවා ගන්නේ හොඳ කීර්තියක් ඇති සහ දක්ෂ දැනුමක් සහ හැකියාවක් ඇති පුද්ගලයන් පමණක් බවය. එවැනි නීතිඥවරුන්ට ලියාපදිංචි වූ පසු කිසිදු වංචාවක්, අක්‍රමිකතාවක්, අපරාධයක් හෝ වරදක් කළ නොහැකි අතර එය මහජනතාවගේ සහ රටේ යුක්තිය පසිඳලීමේ කටයුතුවලට සම්බන්ධ වූවන්ගේ සාධාරණ අපේක්ෂාවක් බවත් සඳහන් කළේය.

නීතිඥවරයකුට අපේක්ෂිත ප්‍රමිතිය පවත්වා ගැනීමට නොහැකි නම්, එවැනි නීතිඥවරයකුට තවදුරටත් එම තනතුරේ කටයුතු කිරිමට අවසර දිය නොහැකි අතර යහපත් කීර්තියක්, දැනුමක් සහ හැකියාවක් ඇති පුද්ගලයන් පමණක් නීතිඥවරුන් ලෙස කටයුතු කරන බවට මහජනතාව තුළ පවතින අභිලාෂය ද සැලකිල්ලට ගැනීම තම අධිකරණයේ යුතුකමක් බවත් අගවිනිසුරුවරයා සඳහන් කළේය.