ඝානාවේ අශාන්ති කලාපයේදී ඊයේ (2025 අගෝස්තු 6) හමුදා හෙලිකොප්ටර් යානයක් කඩා වැටීමෙන්, එරට ආරක්ෂක අමාත්‍ය එඩ්වඩ් ඔමානේ බෝමා සහ පරිසර අමාත්‍ය ඊබ්‍රාහිම් මුර්තාලා මොහොමඩ් ඇතුළු ජ්‍යෙෂ්ඨ රාජ්‍ය නිලධාරීන් සහ කාර්ය මණ්ඩල සාමාජිකයින් ඇතුළු එහි ගමන් ගත් පුද්ගලයින් අටදෙනාම ජීවිතක්ෂයට පත්ව තිබේ.
ප්‍රවාහන සහ වෛද්‍ය ඉවත් කිරීමේ කටයුතු සඳහා බහුලව භාවිතා වන Z-9 වර්ගයේ මෙම හෙලිකොප්ටර් යානය, ඊයේ උදෑසන අක්රා නුවරින් පිටත්ව,
වයඹ දෙසින් පිහිටි ඔබුවාසි රන් ආකර ප්‍රදේශය බලා පියාසර කර ඇත. අශාන්ති කලාපයට ඇතුළු වීමෙන් ටික වේලාවකට පසු, ගුවන් ගමනාගමන පාලක මැදිරිය සමඟ පැවති සබඳතා විසන්ධි වී එය රේඩාර් තිරයෙන් අතුරුදන් වී තිබේ. එහි සුන්බුන් පසුව අඩන්සි ප්‍රදේශයෙන් සොයාගෙන ඇති අතර, ඇසින් දුටු සාක්ෂි සහ වීඩියෝ දර්ශනවලට අනුව, ගිනි ගනිමින් තිබූ සුන්බුන් අතර කිසිදු දිවි ගලවාගත් අයෙකු නොවීය.
මියගිය පිරිස අතර අමාත්‍යවරුන් දෙදෙනාට අමතරව, පාලක ජාතික ප්‍රජාතන්ත්‍රවාදී කොංග්‍රසයේ උප සභාපති සැමුවෙල් සර්පොන්ග්, ජාතික ආරක්ෂක උපදේශක මුනිරු මොහොමඩ්, ආපදා සහන නියෝජ්‍ය අධ්‍යක්ෂ සැමුවෙල් අබෝයාග් සහ හෙලිකොප්ටර් යානයේ කාර්ය මණ්ඩලයේ තිදෙනෙකු ද වෙති.
ඝානා රජය මෙය ජාතික ශෝකයක් ලෙස ප්‍රකාශයට පත් කර ඇති අතර, අනතුරට හේතුව සොයා පරීක්ෂණයක් ආරම්භ කරන බව නිවේදනය කර තිබේ.
මෙම ජාතික ව්‍යසනය හේතුවෙන් ජාතික කොඩි අඩකුඹු කර ලෙළදීමට නියෝග කර ඇති අතර, මියගිය අයට ගෞරවයක් ලෙස ජනාධිපතිවරයා එදිනට නියමිතව තිබූ සියලු නිල කටයුතු අවලංගු කර ඇත. ඝානා සන්නද්ධ හමුදාව විසින් අනතුරට හේතුව සොයා බැලීම සඳහා විධිමත් පරීක්ෂණයක් ආරම්භ කර තිබේ.
Comments
Post a Comment
Your comment will be visible after approval