ශාසන සම්ප්‍රදායන්ට පටහැනිව සහ විනය විරෝධීව හැසිරෙන භික්ෂූන් වහන්සේලා ශාසනයෙන් නෙරපා හැරීමට හැකිවන පරිදි, විහාර දේවාලගම් ආඥා පනතේ 41 සහ 42 වගන්ති කඩිනමින් සංශෝධනය කරන බව බුද්ධශාසන, ආගමික සහ සංස්කෘතික කටයුතු අමාත්‍ය ආචාර්ය හිනිදුම සුනිල් සෙනෙවි මහතා පවසයි. මල්වතු සහ අස්ගිරි මහනාහිමිවරුන් මහනුවරදී බැහැදැකීමෙන් අනතුරුව මාධ්‍ය වෙත අදහස් දක්වමින් අමාත්‍යවරයා මේ බව සඳහන් කළේය.
මෙම නීති සංශෝධනය සඳහා වූ කටයුතු වත්මන් රජය යටතේ අවසන් කර, එය නීති කෙටුම්පත් දෙපාර්තමේන්තුව වෙත යොමු කර ඇති බවත්, ඉතා කෙටි කලකින් පනතක් ලෙස පාර්ලිමේන්තුවට ඉදිරිපත් කිරීමට බලාපොරොත්තු වන බවත් අමාත්‍යවරයා කියා සිටියේය.
එම පනත සම්මත වීමෙන් පසු, කිසියම් භික්ෂුවක් විනය විරෝධීව කටයුතු කරන්නේ නම්, අදාළ නිකායේ මහානායක හිමියන්ගේ නිර්දේශය මත, අධිකරණ ක්‍රියාමාර්ග ඔස්සේ එම භික්ෂුව ශාසනයෙන් ඉවත් කිරීමට බුද්ධශාසන අමාත්‍යාංශයට බලය ලැබෙනු ඇත.
ඉදිරියේදී පැවැත්වීමට නියමිත මහනුවර දළදා මාලිගාවේ දියවඩන නිලමේ තේරීමේ නිලවරණය පිළිබඳවද මෙහිදී අදහස් දැක්වූ අමාත්‍යවරයා, එය පවතින නීති රීති යටතේම පැවැත්වෙන බව අවධාරණය කළේය. දියවඩන නිලමේ ධුර කාලය වසර 10ක් බව පනතේ පැහැදිලිව සඳහන් වන අතර, එය දිනකින් දෙකකින් හෝ අමාත්‍යවරයෙකුගේ තනි තීරණයකින් වෙනස් කළ නොහැකි බවද ඔහු පෙන්වා දුන්නේය.
තවද, වත්මන් රජයට කාදිනල් හිමිපාණන්ගෙන් කිසිදු බලපෑමක් නොමැති බවත්, ශ්‍රී ලංකාව බෞද්ධ රටක් බව උන්වහන්සේ පැහැදිලිව පිළිගෙන ඇති බවත් අමාත්‍යවරයා මෙහිදී සඳහන් කළේය. මෙම අවස්ථාව සඳහා නියෝජ්‍ය අමාත්‍ය ගමගෙදර දිසානායක මහතා ද සහභාගී වී සිටියේය.
Comments
Post a Comment
Your comment will be visible after approval