විධිමත් විනය පරීක්ෂණ කමිටු මගින් නිවැරදිකරුවන් ලෙස තීන්දු කරන ලද සෞඛ්‍ය වෘත්තිකයන් 19 දෙනෙකු, සෞඛ්‍ය අමාත්‍යාංශයේ විමර්ශන ඒකකය විසින් නැවත වරදකරුවන් බවට නිර්දේශ කර ඇතැයි වෛද්‍ය සිවිල් අයිතිවාසිකම් පිළිබඳ වෛද්‍යවරුන්ගේ වෘත්තීය සමිති සන්ධානය චෝදනා කරයි. එහි සභාපති, විශේෂඥ වෛද්‍ය චමල් සංජීව මහතා පවසන්නේ සෞඛ්‍ය අමාත්‍යාංශයේ නියෝජ්‍ය අධ්‍යක්ෂවරියක විසින් මෙම නිර්දේශය ඉදිරිපත් කර ඇති බවයි.
තොරතුරු දැනගැනීමේ පනත යටතේ සිදුකළ විමසීමකට අනුව, සෞඛ්‍ය අමාත්‍යාංශයේ විමර්ශන ඒකකයේ නියෝජ්‍ය අධ්‍යක්ෂිකා තාරකා මේධාවී දිසානායක මහත්මිය විසින් 2025 ජූලි 24 වන දින නිකුත් කරන ලද ලිපියකින් මෙම කරුණ සනාථ වන බව විශේෂඥ වෛද්‍ය චමල් සංජීව මහතා පෙන්වා දෙයි. විධිමත් විනය පරීක්ෂණ මගින් නිලධාරීන් නිවැරදිකරුවන් ලෙස තීරණය කළ ද, අමාත්‍යාංශයේ ඉහළ නිලධාරීන්ගේ අභිමතය පරිදි ආයතන සංග්‍රහයේ වගන්ති භාවිත කරමින් එම තීරණ වෙනස් කිරීමට විමර්ශන ඒකකය කටයුතු කරන බවට ඔහු චෝදනා කළේය.
රාජ්‍ය සේවා කොමිෂන් සභාව මගින් පත්කරන විනිශ්චය සභාවක් හරහා, විශාල මුදලක් සහ කාලයක් වැය කරමින් පවත්වන විධිමත් විනය පරීක්ෂණයක තීන්දුව මෙලෙස අභිබවා යන්නේ නම්, එම පරීක්ෂණ සඳහා වැය කළ මුදල අදාළ නිලධාරිනියගෙන් අය කර ගැනීමට රජය පියවර ගත යුතු බවද ඒ මහතා අවධාරණය කළේය.
මෙම ක්‍රියාකලාපය තුළින් විධිමත් විනය පරීක්ෂණ ක්‍රියාවලිය කෙරෙහි සහභාගිවන්නන් තැබූ විශ්වාසය සම්පූර්ණයෙන්ම කඩ වී ඇති බව පවසන වෛද්‍ය චමල් සංජීව මහතා, මෙය ඉතා කනගාටුදායක තත්ත්වයක් බව සඳහන් කළේය. එබැවින්, සෞඛ්‍ය අමාත්‍යාංශයේ විමර්ශන ඒකකයේ මෙම ක්‍රියාව පිළිබඳව වහාම වෙනම විමර්ශනයක් පවත්වන ලෙස තමන් සෞඛ්‍ය ලේකම්වරයාගෙන් ලිඛිතව ඉල්ලා සිටින බවද ඔහු වැඩිදුරටත් කියා සිටියේය.
Comments
Post a Comment
Your comment will be visible after approval