බෞද්ධ කටයුතු කොමසාරිස් ජනරාල් ධූරයේ කටයුතු කළ ප්‍රේමසිරි රත්නායක මහතා එම තනතුරෙන් ඉවත් කිරීමට රජය තීරණය කර තිබේ. බුද්ධ ශාසන, ආගමික හා සංස්කෘතික කටයුතු නියෝජ්‍ය අමාත්‍ය ගමගෙදර දිසානායක මහතා සඳහන් කළේ භික්ෂුන් වහන්සේලා ගෙන් එල්ල වූ චෝදනා රැසක් මෙම තීරණයට පාදක වූ බවයි.
හිටපු කොමසාරිස් ජනරාල්වරයා, බෞද්ධ කටයුතු පිළිබඳ දෙපාර්තමේන්තුවේ පරිපාලනමය වගකීම් නිසි ලෙස ඉටු නොකරන බවටත්, භික්ෂූන් වහන්සේලා සමඟ සුහදශීලීව කටයුතු නොකරන බවටත් චෝදනා එල්ල වී තිබූ බව නියෝජ්‍ය අමාත්‍යවරයා පෙන්වා දුන්නේය.
ඒ අනුව, අමාත්‍ය මණ්ඩලයේ අනුමැතිය මත ප්‍රේමසිරි රත්නායක මහතා ඉවත් කර, එම ධූරයේ වැඩ බැලීම සඳහා බෞද්ධ කටයුතු අතිරේක කොමසාරිස්වරයා ලෙස කටයුතු කළ කසුන් වැල්ලහේවා මහතා තාවකාලිකව පත්කර ඇත.
ප්‍රේමසිරි රත්නායක මහතාට එරෙහිව විවිධ පාර්ශ්වයන්ගෙන් චෝදනා ඇතුළත් විශාල ලිපි ගොනුවක් පැවති බවත්, අමාත්‍යාංශ තීරණ ක්‍රියාත්මක කිරීමේදී සහ භික්ෂූන් වහන්සේලා සමඟ කටයුතු කිරීමේදී ගැටලුකාරී තත්ත්වයන් පැවති බවත් නියෝජ්‍ය අමාත්‍යවරයා වැඩිදුරටත් පැවසීය. රාජ්‍ය පරිපාලන අමාත්‍යාංශය සහ බුද්ධ ශාසන අමාත්‍යාංශය එක්ව සිදුකළ නිරීක්ෂණයකදී එම චෝදනා සනාථ වීම හේතුවෙන් ඔහු තවදුරටත් එම තනතුරේ තබාගෙන කටයුතු කළ නොහැකි බවට තීරණය විය.
Comments
Post a Comment
Your comment will be visible after approval