ශ්රී ලංකා ගමනාගමන මණ්ඩලයේ (ශ්රී ලංගම) ඇතැම් වෘත්තීය සමිති විසින් ආරම්භ කරන ලද වැඩ වර්ජනයක් හේතුවෙන් 87 මාර්ගයේ ගමන් ගන්නා මගීන් පෙරේදා (27) රාත්රියේ යම් අපහසුතාවයකට පත්වුවද, ඊයේ (28) දිනය වන විට බස් රථ ධාවනය යථා තත්ත්වයට පත්ව තිබිණි. ශ්රී ලංගම සහ පෞද්ගලික බස් රථ සඳහා ඒකාබද්ධ කාලසටහනක් හඳුන්වා දීමට විරෝධය පළ කරමින් මෙම වෘත්තීය ක්රියාමාර්ගය ආරම්භ කර තිබුණි.
කොළඹට පැමිණෙන ප්රධාන පිවිසුමක් වන පුත්තලම මාර්ගයේ ධාවනය වන බස් රථ සඳහා පසුගිය 25 වනදා මධ්යම රාත්රියේ සිට මෙම ඒකාබද්ධ කාලසටහන ක්රියාත්මක විය. එම කාලසටහන සකස් කිරීමේදී තම අදහස් විමසීමක් නොකළ බවට චෝදනා කරමින් ශ්රී ලංකා නිදහස් ප්රවාහන සේවක සංගමය ඇතුළු වෘත්තීය සමිති හතක් මෙම වර්ජනය කැඳවා තිබිණි.
කෙසේ වෙතත්, වර්ජනයට එක්වූ වෘත්තීය සමිති සාමාජිකයින් හැරුණු විට සෙසු ලංගම රියදුරන් සහ සේවකයින් ඊයේ (28) දිනයේ සාමාන්ය පරිදි සේවයට වාර්තා කර තිබූ අතර,
කොටුව මධ්යම බස් නැවතුම්පොළෙන් මහනුවර සහ අනුරාධපුරය වැනි දුර ගමන් සේවා බස් රථ අඛණ්ඩව ධාවනය කෙරිණි. සමස්ත ලංකා ප්රවාහන සේවක සංගමයේ ප්රධාන ලේකම් සේපාල ලියනගේ මහතා ද මෙම වර්ජනය අසාර්ථක බවත්, ලංගම බස් රථ බහුතරයක් සාමාන්ය පරිදි ධාවනය වූ බවත් ප්රකාශ කළේය.
මේ සම්බන්ධයෙන් අදහස් දැක්වූ ජාතික ගමනාගමන කොමිසමේ සභාපති පී. ඒ. චන්ද්රපාල මහතා, මෙම ඒකාබද්ධ කාලසටහන සකස් කරනු ලැබුවේ ජාතික ගමනාගමන කොමිසමේ සහ ශ්රී ලංගම නිලධාරීන්ගේ ඒකාබද්ධ සහභාගීත්වයෙන් බවත්, එමගින් ලංගම ආයතනයට කිසිදු අසාධාරණයක් සිදු නොවන බවත් අවධාරණය කළේය.
Comments
Post a Comment
Your comment will be visible after approval