මහනුවර ඇසළ පෙරහැරේ ආරක්ෂක කටයුතු සඳහා සිදුකළ සෝදිසි කිරීම්වලදී, හෙරොයින් සමග ඇත්ගොව්වෙකු සහ උණ්ඩ සමග තවත් පුද්ගලයන් දෙදෙනෙකු ඇතුළු තිදෙනෙකු පොලීසිය විසින් අත්අඩංගුවට ගෙන තිබේ.
පෙරහැර ආරම්භ වීමට පෙර සිදුකළ සෝදිසියකදී හෙරොයින් ග්‍රෑම් 100ක් සමග මෙම ඇත්ගොව්වා අත්අඩංගුවට ගෙන ඇත. ඔහු කොළඹ උප නගරයක විහාරස්ථානයක සිට අලියෙකු ද සමග පෙරහැරට සහභාගී වීම සඳහා පැමිණි අයෙකි. මෙම අත්අඩංගුවට ගැනීම හේතුවෙන්, අදාළ අලියාට මෙවර පෙරහැරට සහභාගී වීමට නොහැකි වී තිබේ.
මේ අතර, ආරක්ෂක අංශයට අයත් ගිලන් රථ රියදුරෙකු, T-56 වර්ගයේ ජීව උණ්ඩ තුනක් සමග පිරික්සුම් මුරපොළකදී අත්අඩංගුවට ගෙන ඇත. තවත් සිදුවීමකදී, පෙරහැර ප්‍රදේශයට ඇතුළු වීමට උත්සාහ කළ කොළඹ ප්‍රදේශයේ පාසල් රග්බි ක්‍රීඩකයෙකු ලඟ තිබී පතොරම් දෙකක් සොයාගැනීමෙන් පසු ඔහුවද අත්අඩංගුවට ගෙන තිබේ.
මෙම සිදුවීම් තුනට අදාළව අත්අඩංගුවට ගත් සැකකරුවන් තිදෙනාම අධිකරණයට ඉදිරිපත් කිරීමට නියමිත බව පොලීසිය පවසයි.
Comments
Post a Comment
Your comment will be visible after approval