දෙහිවල සහ කොහුවල පොලිස් ස්ථාන මගින් මත්ද්‍රව්‍ය චෝදනා මත අත්අඩංගුවට ගෙන රක්ෂිත බන්ධනාගාරගත කර සිටි පුද්ගලයන් 25 දෙනෙකු, ඔවුන් සතුව තිබූ බවට චෝදනා එල්ල වූ ද්‍රව්‍ය මත්ද්‍රව්‍ය නොවන බවට රජයේ රස පරීක්ෂක වාර්තා මගින් තහවුරු වීමෙන් අනතුරුව ගල්කිස්ස මහේස්ත්‍රාත් අධිකරණය විසින් නිදහස් කර තිබේ.
මෙම සිදුවීම් මාලාවේ අතිශය ශෝචනීය සිදුවීම ලෙස, මෙසේ නිදොස් කොට නිදහස් කරනු ලැබූ එක් අයෙකු, අත්අඩංගුවට ගැනීමෙන් අනතුරුව තම පවුලට මුහුණ දීමට සිදු වූ ගැටලු සහ සමාජ අපවාදය හේතුවෙන් ඇතිවූ දැඩි සිත් තැවුලෙන් සියදිවි නසාගෙන ඇති බවද වාර්තා වේ.
වින්දිතයන් වෙනුවෙන් පෙනී සිටි නීතිඥ ගීත්ම ප්‍රනාන්දු ගල්කිස්ස මහේස්ත්‍රාත් අධිකරණයේදී චෝදනා කර සිටියේ පොලීසිය විසින් තම සේවාදායකයන් ලඟ ව්‍යාජ මත්ද්‍රව්‍ය තබා ඔවුන්ව මෙම චෝදනාවලට හසුකර ඇති බවයි. රජයේ රස පරීක්ෂක වාර්තා ලැබී නිදොස් බව තහවුරු වීමට පෙර, මෙම පුද්ගලයන්ගෙන් බොහෝ දෙනෙකු මාස නවයක් තරම් දීර්ඝ කාලයක් රක්ෂිත බන්ධනාගාරයේ ගතකර ඇති බවද හෙළිවී තිබේ.
සියදිවි නසාගත් පුද්ගලයා සතුව හෙරොයින් ග්‍රෑම් 3.2ක් තිබූ බවට පොලීසිය මුලින් චෝදනා කර තිබූ අතර,
ඔහුට අධික වියදමක් දරා මහාධිකරණයෙන් ඇප ලබාගැනීමටද සිදුවී ඇත. අධිකරණයේදී ඔහු නිර්දෝෂී බවට ප්‍රකාශයට පත් කළ අවස්ථාවේ, ඔහුගේ මරණ සහතිකය ඉදිරිපත් කිරීමට පැමිණ සිටි ඔහුගේ සොහොයුරිය අධිකරණය තුළදී කඩා වැටී හඬා වැළපී තිබේ.
Comments
Post a Comment
Your comment will be visible after approval